IRUẸMWI 08
U Gha Sẹtin Gu E Jehova Ru Ọse
E Jehova hoo ne u rẹn irẹn sayọ. Vbọzẹ? Rhunmwuda, ọ rẹnrẹn wẹẹ, deghẹ u na rẹn irẹn sayọ, u na rẹn aro ọmwa ne irẹn khin kevbe emwamwa ne irẹn mwẹ ne emwa nagbọn, u ghi gha hoo ne u sikẹ ọre sayọ. Uwẹ gha gele sẹtin gha re ọsie Osanobua ra? (Tie Psalm 25:14.) Vbọ khẹke ne u ru, ne u mieke na gha re ọsiọre? E Baibol rhie ewanniẹn ye avbe inọta na. Ọ vbe ya ima rẹn evbọzẹe ne Jehova na re Ọse nọ ghi maan sẹ.
1. De emwi ne Jehova hoo ne u ru?
“Wa sikẹ Osanobua, irẹn gha vbe sikẹ uwa.” (Jems 4:8) Vbe ọna demu? E Jehova hoo ne u gha re ọse irẹn. Emwa eso keghi roro ẹre wẹẹ, iran i sẹtin gha re ọsie ọmwa ne iran ma rẹn, amaiwẹ Osanobua nai bẹghe. Sokpan vbe Baibol, e Jehova keghi gi ima rẹn aro ọmwa ne irẹn khin, ne ima mieke na sẹtin do gha re ọsiọre. Ma ghaa tie Baibol nọ re Ẹmwẹ Ọghe Osanobua, ma ghi do gha sikẹ e Jehova sayọ, agharhemiẹn wẹẹ ima i bẹghe ẹre.
2. Vbọzẹ ne Jehova na re Ọse nọ ghi maan sẹ ne u gha sẹtin gha mwẹ?
Orhunmwu ọkpa i rrọọ nọ hoẹmwẹ ruẹ sẹ vbene Jehova ya hoẹmwẹ ruẹ. Ọ hoo ne u gha ghọghọ vbe ẹghẹ hia, ọ vbe hoo ne u gha tu tie irẹn vbe ẹghẹ ke ẹghẹ ne u ya gualọ iyobọ. U gha sẹtin “ye enegbe ruẹ hia yan rẹn, rhunmwuda, irẹn ẹre ọ gbaroghe ruẹ.” (1 Pita 5:7) E Jehova mu egbe nọ ya gha ru iyobọ ne avbe ọsiọre, ọ mu egbe nọ ya fu iran ẹko rre vbe iran ghaa rre uwu ibavbaro, ọ vbe mu egbe nọ ya gha danmwehọ iran vbe iran gha tu tie ẹre.—Tie Psalm 94:18, 19.
3. De emwi ne Jehova hoo ne ima ru, ne ima mieke na gha re ọsiọre?
E Jehova hoẹmwẹ emwa hia, sokpan te irẹn “mu iro ma emwa ẹmwata,” nọ rhie ma wẹẹ, emwa vbenian ẹre irẹn gu ru ọse. (Itan 3:32) E Jehova hoo ne avbe ọse irẹn gha hia ne iran gha ru emwi nọ yẹẹ irẹn, iran ghi vbe gha lẹẹ ne emwi nọ sọnnọ irẹn. Sokpan emwa eso keghi roro ẹre wẹẹ, iran i sẹtin lele uhi ọghe Jehova hia. Vbọrhirhighayehẹ, e Jehova rẹnrẹn wẹẹ emwa ni ma gba ẹre ima khin. Deghẹ ima na ya ekhọe hia hoẹmwẹ ọnrẹn, ma na vbe gha hia ne ima gha ru emwi nọ yẹẹ ọre, ọ gha miẹn ima yi.—Psalm 147:11; Iwinna 10:34, 35.
GUALỌ OTỌ RE SAYỌ
Gia ziro yan rẹn sayọ, emwi nọ khẹke ne u ru, ne u mieke na gha re ọsie Osanobua, kevbe evbọzẹe ne Osanobua na re Ọse nọ ghi maan sẹ ne u gha sẹtin gha mwẹ.
4. Ọsie Jehova ẹre Ebraham ghaa khin
Okha ọghe Ebraham (na vbe tie ẹre Ebram) nọ rre Baibol ya ima rẹn evbọ demu na gha re ọsie Osanobua. Tie vbekpa Ebraham vbe Gẹnẹsis 12:1-4. Iyeke ọni, uwa ghi ziro yan avbe inọta na:
-
De emwi ne Jehova wẹẹ ne Ebraham ru?
-
De eyan ne Jehova ru ma Ebraham?
-
De emwi ne Ebraham ru vbe Jehova ghi wẹẹ nọ kpa hin ẹvbo nọ ye rre?
5. Emwi ne Jehova hoo ne avbe ọsiọre gha ru
Ọ mwẹ emwi eso ne ima hoo ne avbe ọse ima gha ru.
-
De emwi eso ne u hoo ne avbe ọse ruẹ ru nuẹn?
Tie 1 Jọn 5:3, iyeke ọni, uwa ghi ziro yan inọta na:
-
De emwi ne Jehova hoo ne avbe ọsiọre gha ru?
Ma ghaa hoo ne ima gha re emwa ni họn ẹmwẹ ne Jehova, te ima gha fi uyinmwẹ werriẹ. Tie Aizaia 48:17, 18, iyeke ọni, uwa ghi ziro yan inọta na:
-
Vbọzẹ ne Jehova na hoo ne avbe ọsiọre fi uyinmwẹ werriẹ?
Ọse nọ hoẹmwẹ ruẹ, ẹre ọ khian bu ruẹ ude nọ maan, ne agbọn mieke na maan ruẹ. Erriọ e Jehova wa vbe ye zẹẹ
6. Iyobọ ne Jehova ru ne avbe ọsiọre
E Jehova keghi ru iyobọ ne avbe ọsiọre vbe iran ghaa rre ọlọghọmwa. Kpee VIDIO na, iyeke ọni, uwa ghi ziro yan inọta nọ lelẹe.
-
De vbene Jehova ya ru iyobọ ne okhuo na, ne iro te han, rhunmwuda emwi nọ sunu daa re vbe ẹghẹ nọ gberra?
Tie Aizaia 41:10, 13, iyeke ọni, uwa ghi ziro yan avbe inọta na:
-
De emwi ne Jehova wẹẹ irẹn khian ru ne avbe ọsiọre?
-
Uwẹ yayi wẹẹ Ọse ne u gha sẹtin guobọ re, ẹre Jehova khin ra? Vbua gu kha vberriọ?
Ọse na miẹn vbe emwi ghaa lọghọ ọmwa, ẹre ọ gele re ọsie ọmwa. Ọse vberriọ, ẹre Jehova khin
7. U ghaa re ọsie Jehova, ọ khẹke ne uwa gha gu egbe guan
Ọse eva ghaa gu egbe guan vbe ẹghẹ hia, iran ghi do guobọ egbe. Tie Psalm 86:6, 11, iyeke ọni, uwa ghi ziro yan avbe inọta na:
-
Vbe ima ya gu e Jehova guan hẹ?
-
Vbe Jehova ya gu ima guan hẹ?
Erhunmwu ẹre ima ya gu e Jehova guan; e Baibol ẹre Jehova loo ya gu ima guan
EMWA ESO KEGHI KHA WẸẸ: “Ọmwa i sẹtin gha re ọsie Osanobua.”
-
De ako ọghe evbagbẹn nọhuanrẹn nọ ya ima rẹn wẹẹ, ma gha sẹtin gha re ọsie Jehova?
OLIKA ẸMWẸ
E Jehova hoo ne u gha re ọse irẹn, ọ vbe mu egbe nọ ya si ruẹ kẹ egbe.
Ogbewerriẹ
-
De vbene Jehova ya ru iyobọ ne avbe ọsiọre hẹ?
-
Vbọzẹ ne Jehova na hoo ne avbe ọsiọre fi uyinmwẹ werriẹ?
-
Uwẹ ghee ẹre wẹẹ emwi nọ lọghọ nọ, ne ọmwa do gha re ọsie Jehova ra? Vbua gu kha vberriọ?
RUẸ SAYỌ
De ere ne u gha miẹn deghẹ u na gha re ọsie Osanobua?
“E Jehova Keghi Re Osa Nọ Khẹke Na Rẹn” (The Watchtower, February 15, 2003)
Ghee emwi ne u gha ru, ne u mieke na gha re ọsie Osanobua.
Ghee evbọzẹe ne okhuo ọkpa na kha wẹẹ, rhunmwuda ne irẹn na gu e Jehova ru ọse, ẹre ọ zẹe ighẹ ẹdagbọn irẹn fi werriẹ.
Ghee emwi ne igbama eso tae vbekpa aro ne iran ya ghee Jehova.
You May Also Like
AVBE INỌTA NE EMWA MỌBỌ NỌ
Vbọre Iruẹmwi Ọghe Baibol?
Gualọ otọre, nu miẹn ewanniẹ ọghe avbe inọta ni dekaan emwamwa iruẹmwi e Biabol ọghọhẹ ọghomwa.
