Jɛhova mɔ́ ɓɛ́ m̀ kéɛ dyí dyuò nɔ̀mɔ̀ dyíin. Xwíníínɔ̀ nyɛ́ kɔ̃̀ jèɛ́? Ɔ dèɛ̀ hwòɖò kɔ̃ kà nì muà ɔ kpeɖe ɓè kè nyuu-ɖɛ̀ ɓè ɔ kè ɔ hwòɖòɛ̀-gbɔ-po-ɖɛ̀ ɓè jè cɛ̃́ìn nyɛɛ, kàà nì mu ɔ ɓàto jùɛ mɔ́ùn. M̀ ɓɛ́ìn Geɖepɔɔ ɓàto jùɛ jàà cáà? (Zà Wɛ́ɖɛ́ 25:14 wuɖuún.) Ðɛ́ m̀ ɓɛ́ìn nyuɛ ɓɛ́ m̀ ké ɔ ɓàto jù kɛ́? Baɓoɔ jù dyi-diè-ɖɛ̀ ɓèa gɔ̃̀, ké ɔ tɛ̀mɛ̀ìn xwíníín kɔ̃̀ jè Jɛhova ɓàto jù-jù mɔ̀à ɖɛ kpa ɖɛ mìɔ ɖò cá ɓɛ́ m̀ ɓɛ́ìn ɓéɖéɛ kɛ.

1. Ðɛ́ Jɛhova ɖá m̀ mɛ nyu kɛ́?

“Xwɛ̃́ìn Geɖepɔɔ bũ̀in, nìí, ɔ mu . . . mɔ̀ùn bũ̀in xwɛ̃́ìn.” (Jĩ́ìn 4:8) Ðɛ́ mɔ̀ɔ̀ xwíníín nyɛ́? Jɛhova nì m̀ ɖáuń, ɓɛ́ m̀ ké ɔ ɓàto jù. Ɔ ɓɛ́ìn mú kàmàà ɓó nyɔ ɖíɛ́ ɓè bìì ɓɛ́ wa kéɛ hwìɖìi poìn kà wa ɓɛ́ìn nyɔ ɖò ɓɛ́ wa se dyéɛ ɓɛ́ìn nyɛɛ ɓàto jù kɛ, hwɛ̀ ḿ po níìn, Geɖepɔɔ mìɔùn kpo. Kɛɛ, ɖé ɔ Wuɖu mɔ̀à Baɓoɔ kɛ múɛɛ, Jɛhova tɛ̀mɛ̀ìn ɖɛ séín à kɔ̃̀ à ké dyí dyuò ɓá ɔ kpeɖe ɓèɔ̀ jè dyíɛɛ à dyí, ɓɛ́ à ké ɔ bũ̀in xwɛ̃́ìn ɓɛ́ìn. À dyi Geɖepɔɔ cuò-wùɖù ɖé à gboɛɛ wuɖuún zà ɖé Baɓoɔ mú ní, nìí, gbo-kpɔ̃ìn-kpɔ̃ìn nìà à kè Jɛhova pṹa kɛɛ mu dyi kuùn, kɛbì à mɛ séè ɔ dyé ɖòɛ̀.

2. Xwíníínɔ̀ nyɛ́ kɔ̃̀ jè Jɛhova mɔ̀à ɓàto kpa ɖɛ ɓɛ́ m̀ ɓɛ́ìn ɓéɖéɛ kɛ́?

Nyɔ ɖò se m̀ mú ɖɛ̀ɓɛ̀ ɓɛ́ ɔ ké Jɛhova dyí zi. Ɔ mɔ́ ɓɛ́ m̀ ké múàùn kpá kè ɓɛ́ m̀ ké ɔ gbo gmɔ̀ìn ti séín ɖò m̀ mɔ́ gbo-kpá-kpá kɛ. M̀ ɓɛ́ìn nì ‘hwòɖò-dyií-gbàìn-ɖɛ̀ séín ɓèɔ̀ Geɖepɔɔ xwa nyíɛ, sepoɛɖe ɔ kɔ̃̀ ɖé m̀ jè gbo.’ (1 Píɖɛ̀ 5:7) Jɛhova nì ɓɛ́ɖɛ́ kɔ̃ ti séín, ɓɛ́ ɔ ké ɔ ɓàto ɓèɔ̀ gbo kpá, kè ɓɛ́ ɔ ké wa hwòɖò dyi dè, ɔ kè ɓɛ́ ɔ ké wa ɖùù gbo tò.​—Zà Wɛ́ɖɛ́ 94:​18, 19 wuɖuún.

3. Ðɛ́ Jɛhova mɔ́ ɓɛ́ ɔ ɓàto ɓèɔ̀ ké nyu kɛ́?

Jɛhova ɖɛ̀ɓɛ̀ nyɔ séín mú, “kɛɛ ɔ hwòɖò dèìn dyí-sɛ́ɖɛ́ìn-nyɔ̀ ɓèɔ̀ múin.” (Nɔ́ɔ́ 3:​32) Ðɛ Jɛhova mɔ́ ɓɛ́ ɔ ɓàto ɓèɔ̀ ké nyuɛɛ mɔ̀, ɓɛ́ wa ké vɔ̃, ɓɛ́ wa ké ɖɛ ɓè mɔ̀ ɖɛ sɛ́ɖɛ́ìn dyí ɖé ɔ gboɛɛ nyu, ɔ kè ɓɛ́ wa ké ɖɛ mɔ̀ ɖɛ gbà ɖé ɔ gboɛɛ dyí ɓàɖàìn. Nyɔ ɖíɛ́ ɓè ɓɛ́ìn hwìɖìi poɛ̀n kà wa se ɖɛ ɓè ɓɛ́ Jɛhova mɔ́ kɛɛ séín nyuɛ ɓɛ́ìn ɓɛ́ wa ké ɖɛ gbà dyí ɓàɖàìn nyɛ. Kɛɛ, Jɛhova ɓéɖé wìì-hwòɖò. Ɔ kpɔ̃ nyɔ séín ɓè ɓɛ́ wa ɖɛ̀ɓɛ̀ ɔ mú jàà, ké wa vɔ̃ ɓɛ́ wa ké Ɔ hwòɖò dyi dè kɛɛ jè dyi.​—Wɛ́ɖɛ́ 147:​11; Àpɔ́sò 10:​34, 35.

 ÐE ÐƐ MÚIN CÁ

4. Ééɓòɖòhɛ̃́ɛ̀ mɔ̀ ma Jɛhova ɓàto

Ðɛ Baɓoɔ cɛ̃ ɓá Ééɓòɖòhɛ̃́ɛ̀ (ɓɛ́ wa ɖáìn ma kà Éébànà kɛɛ jè dyíɛɛ) tɛ̀mɛ̀ìn ɖɛ mɔ̀ Geɖepɔɔ ɓàto jù-jù xwíníín nyɛɛ à dyí ɖɛ-wè. Zà nɔ́ɔ́ ɓáà Ééɓòɖòhɛ̃́ɛ̀ jè dyíɛɛ wuɖuún ɖé Jɛ́nɛ́sì 12:​1-4 mú. Nìí, ɓè dèìn dyi-diè-ɖɛ̀ ɓè nìà kɛ dɔ́ɔ́ kɔ̃in:

• Ðɛ́ Jɛhova ɖá Ééɓòɖòhɛ̃́ɛ̀ mɛ nyu ma kɛ́?

• Ðɛ́ Jɛhova ɖáìn ma ɔ nyɛ́nɛ́ín nyɛ́?

• Ðɛ́ Ééɓòɖòhɛ̃́ɛ̀ nyu ma ɓá Jɛhovaa ná-wùɖù ɓèɔ̀ jè dyíɛ́?

5. Ðɛ́ Jɛhova ɖá ɔ ɓàto ɓèɔ̀ mɛ nyu kɛ́?

Tiɔ̀ ɖíɛ́ ɓè ní, à dè à ɓàto ɓè hwòɖò kɔ̃, ɓɛ́ wa ké ɖɛ ɓè nyu.

• Ðɛ́ mɔ̀ ɖɛ ɖíɛ́ ɓè ɓɛ́ m̀ ɖɛ̀ɓɛ̀ mú ɓɛ́ nì ɓàto ɓè ké m̀ bìì nyu kɛ́?

Zà 1 Jɔ̃́ɔ́ 5:3 wuɖuún, ɓɛ́ ɓè ké dyi-diè-ɖɛ̀ nìà kɛ dɔ́ɔ́ kɔ̃in dèìn:

• Ðɛ́ Jɛhova mɔ́ ɓɛ́ ɔ ɓàto ɓèɔ̀ ké nyu kɛ́?

Ɓɛ́ à ké Jɛhova wuɖu nyu ní, à ɓéɖé ɓɛ́ à ké à nyuu-ɖɛ̀ mɔɔ à kpeɖe ɓèɔ̀ gbo zĩàìn. Zà Àzédyà 48:​17, 18 wuɖuún, nìí, ɓɛ́ ɓè ké dyi-diè-ɖɛ̀ nìà kɛ dɔ́ɔ́ kɔ̃in dèìn:

• Xwíníínɔ̀ nyɛ́ kɔ̃̀ jè Jɛhova ɖá ɔ ɓàto ɓèɔ̀ mɛ zĩàìn wa kpeɖe ɓèɔ̀ gbo kɛ́?

 6. Ðɛ́ Jɛhova nyu ɓó ɔ ɓàto ɓèɔ̀ bìì kɛ́?

 SṸÌN-XWÍNÍÍN

Jɛhova mɔ́ ɓɛ́ ɔ ké nì Ɓàto jù, ké ɔ mu m̀ gbo kpáùn, ɓɛ́ m̀ ké ɔ bũ̀in xwɛ̃́ìn.

Ðɛ-kɔ̃in-kpa-kpa

• Xwɛ̀ Jɛhova nyu ɔ ɓàto ɓèɔ̀ gbo kpáa kɛ́?

• Xwíníínɔ̀ nyɛ́ kɔ̃̀ jè Jɛhova cɛ̃à ɔ ɓàto ɓèɔ̀ gbo, ɓɛ́ wa kéà wa kpeɖe ɓèɔ̀ gbo zĩàìn nyɛ́?

• Nì hwòɖò ɖá ɔ kàmà mú cá ɓɛ́ à ké Jɛhova ɓàto ɓè jùù? Xwíníínɔ̀ nyɛ́ kɔ̃̀ jè ɔ nìà ná mɔɔ ɔ seà ná nì kɛ́?