ARUFUDAHANI 08
Gayaraati lumada humá Heowá
Busenti Heowá lun hasubudiruni buidu. Ka uagu? Ladüga hemenigiti eibu lanme hafurendeirun luagu lubuidun burí ligaburi, luagu le labusenrubei woun luma luagu ligaburi ladügüni katei, busentimabadün lan humada lan. Le san lúgubu gayara lan gamadagua humá luma Bungiu? (Aliiha huméi Sálumu 25:14). Ka lunbei hadügüni lun lumada humá? Ru tumuti Bíbülia óunabagülei, ariñagatéi woun ka lan uagu umadaguaü lubéi luma Heowá súdinitimabei lídangiñe súngubei.
1. Ka agunbirahani ladügübei Heowá hun?
“Yarafa humá lun Bungiu, ábame giñe layarafadun hun” (Santiagu 4:8). Ka mini lubéi le? Lagunbirahañadün lan Heowá lun lumada humá. Másiñati añahein lan gürigia ha úntiña gürewei lan hafiñeruni gayara lan lumadagu hamá Bungiu ladüga siñá lan harihini. Ligía ígira laali lubéi sun le wemegeirubei wasubudirun luagu tidan Bíbülia, to Lererun, lun gayara lan wayarafadun lun. Dan le waliihanu, ábatima gamadagua wamá luma íbini siñá lan warihini.
2. Ka uagu Heowá lubéi umadaü buítimati le gayaraabei gamada humani?
Hínsiñetimatün lun Heowá sügǘ lau hínsiñe lun furumiñeguarügü amu gürigia. Busenti lun gunda humá luma lun hafurieidun lun sagü hemegeiruni. Gayaraati hígiruni sun hidiheri lun Bungiu “lugundun lóunigiruñadün le tímatimaati” (1 Féduru 5:7). Súnwandan aranseñu liña lan lun líderaguniña lumadagu, laganbuniña luma líchugun gurasu houn (aliiha huméi Sálumu 94:18, 19).
3. Ka lagurabubei Heowá hámagiñe lumadagu?
Lau sun hínsiñe hamá sun gürigia lun Heowá, “hama ha buídubaña” gamadagua lan (Ariñawagúni 3:32). Agurabati lun háfaagun lumadagu lun hadügüni le buídubei ligibugiñe luma lun madügün hamani le wuribabei. Añahein saminatiña siñabei lan hagunfulirun lau le lagurabubei hámagiñe. Gama lumoun, gudemehabuti Heowá ani ánhati houn sun ha hínsiñehabubaña lun, adüga haméi sun hayaraati lun hagundaaragüdüni (Sálumu 147:11; Adügaü 10:34, 35).
SIGÍ HUMÁ AFURENDEIRA
Sigí wamá afurendeira luagu ida luba lan gamadagua wamá luma Heowá luma ka lan uagu Heowá lubéi umadaü le buídutimabei hádangiñe súngubei.
4. Lumada meha Heowá Abüraámü
Íderagua lumutiwa abahüdaguni tídangiñeti Bíbülia luáguti Abüraámü (le giñe subudiwabei kei Abürámü) lun gunfuranda wamani ka lan mini lubéi gamadagua wamá luma Bungiu. Aliiha humá luagu Abüraámü lidan Agumesehani 12:1-4 ábameti hayanuhan luagu álügüdahani burí le:
-
Ka lamuriahabei Heowá luma Abüraámü?
-
Ka füramase lubéi Heowá lun?
-
Ka ladügübei Abüraámü lárigiñebei lasubudiruni le labusenrubei Heowá lun ladügüni?
5. Le lagurabubei Heowá hámagiñe lumadagu
Liibe-agei dan, anihein katei wagurabun hámagiñe wamadagu.
-
Ka hagurabubei hámagiñe humadagu?
Aliiha huméi 1 Huan 5:3, ábameti hayanuhan luagu álügüdahani le:
-
Ka lagurabubei Heowá hámagiñe lumadagu?
Lun gaganbadi wamá lun Heowá, háfuga mosu lan wadügün asansiruni lidan wagaburi luma ligaburi wóuserun. Aliiha huméi Isaíasi 48:17, 18, ábameti hayanuhan luagu álügüdahani le:
-
Ka uagu lamuriaha Heowá hama lumadagu lun hadügün asansiruni?
Haritaguagüda lumuti aban umadaü buiti woun ka lan lunbei wadügüni lun wóunigiragun woungua luma lun buidu lan lidin woun. Adüga lumuti Heowá ligiaméme houn lumadagu.
6. Le ladügübei Heowá hawagu lumadagu
Íderagua lumutiña Heowá lumadagu agagibudagua luma turobuli le úmati hadunragua lidan habagari. Ariha huméi BIDÉU, ábameti hayanuhan luagu álügüdahani le:
-
Ida liña líderagunu Heowá würi to lídanboun bidéu lun tagagibudagun luma luriban burí katei le tasaminarubei luma le tasandirubei?
Aliiha huméi Isaíasi 41:10, 13, ábameti hayanuhan luagu álügüdahani burí le:
-
Ka füramase lubéi Heowá houn lumadagu?
-
Afiñetün san aban lan umadaü buiti Heowá? Ka uagu?
Íderagua hamutün umadagu ha buítiña dan le hemegeiruni. Líderagubadün giñe Heowá.
7. Lun gamadagua wamá luma Heowá, mosu wayanuhan luma ani aganba wameime
Dan le wayanuhan hama wamadagu, ábatima gamadagua wamá hama. Aliiha huméi Sálumu 86:6, 11, ábameti hayanuhan luagu álügüdahani burí le:
-
Ida liña wayanuhan luma Heowá?
-
Ida liña layanuhan Heowá wama?
Ayanuhatiwa lun Heowá dan le wafurieidun, ani ayanuhati woun dan le waliihanu Bíbülia.
LE HARIÑAGUBEI FIU GÜRIGIA: “Siñati gamadagua wamá luma Bungiu ladüga marihin wamani”.
-
Kaba hamuga bérusu tídangiñeti Bíbülia hayusura lun harufuduni gayara lan gamadagua wamá luma Heowá?
LE HAFURENDEIRUBEI
Busenti Heowá lun gamadagua lan huma ani líderagubadün lun hayarafadun lun.
Águyuguagüdüni
-
Ida liña líderaguniña Heowá lumadagu?
-
Ka uagu lariñaga Heowá houn lumadagu lun hadügün asansiruni?
-
Afiñetün san aguraba lan Heowá saragu hámagiñe lumadagu? Ka uagu hasaminara ítara?
FURENDEI HUMÁ LANWOUN
Ka buiti gayaraabei hasagaruni lídangiñe gamadagua humá luma Bungiu?
“Jehová, un Dios que vale la pena conocer” (La Atalaya, to lánina 15 lidan bián-hati, irumu 2003)
Furendei huméi ida luba lan gamadagua humá luma Bungiu.
Ariha huméi ka lan uagu tariñaga aban würi adüga lan gamadagua tan luma Heowá lun lesefurun tibagari.
Aganba huméi ka lan hasaminarubei fiu nibureintiña luagu Heowá.
Háfuga hínsiñebei lan giñe le hun
ÁLÜGÜDAHANI LE GABÜGÜRÜGUATI LADÜGǗN
Ida liña aturiahani tídangiñeti Bíbülia le híchugubei gefentiña luagu Heowá?
Gayaraati hayusurunu hibibülian lidan aturiahani le híchugubei gefentiña luagu Heowá maguburahanga luagu. Gayaraati hagunbirahaniña hiduheñu hama humadagu lidoun.
