Jehová nrajoʼ chë rït natamaj más ruwäch. ¿Achkë rma? Rma retaman chë taq más xtatamaj chrij ryä—chrij ri naʼoj ye kʼo rkʼë, chrij runaʼoj nuʼän kikʼë ri winäq chqä chrij ruraybʼal—más xtarayij xkatok rachiʼil. Ye kʼa, ¿kantzij komä chë yakowin yatok rachiʼil Dios? (Taskʼij ruwäch Salmo 25:​14). ¿Achkë ütz naʼän rchë yatok rachiʼil? Le Biblia yeruqʼalajsaj ri kʼutunïk riʼ chqä nuʼij achkë rma ri yatok rachiʼil Jehová kʼo más ruqʼij chwäch ri yatok rachiʼil xa bʼa achkë chik jun winäq.

1. ¿Achkë nrajoʼ Jehová chë rït naʼän?

«Kixjelun rkʼë Dios, y ryä xtjelun pä iwkʼë rïx» (Santiago 4:8). ¿Achkë ntel chë tzij riʼ? Chë Jehová nrajoʼ chë rït yatok rachiʼil. Rkʼë jbʼaʼ ye kʼo jojun kan kʼayewal nuʼän chkiwäch nkinmaj chë yekowin yeʼok rachiʼil jun winäq ri ma yekowin ta nkitzʼët y más we najin nqtzjon chrij Dios. Ye kʼa ryä ruyaʼon qa chpan le Biblia, ri Ruchʼaʼäl, jontir ri nkʼatzin nqatamaj chrij runaʼoj rchë nqjelun apü rkʼë. Taq nqaskʼij chpan le Biblia achkë nrajoʼ Dios chë nqaʼän, más junan xtuʼän qawäch rkʼë tapeʼ ma nqkowin ta nqatzʼët.

2. ¿Achkë rma Jehová ya riʼ ri más ütz awachiʼil xtjeʼ?

Jehová kowan yatrajoʼ, nrajoʼ chë kiʼ akʼuʼx naʼän chqä chë nakʼutuj rutoʼik taq nkʼatzin chawä. Rït ütz nayaʼ qa «pa ruqʼaʼ ryä ronojel ri nbʼanö chë nchʼpü akʼuʼx» rma ryä kan nrajoʼ yaturtoʼ pä (1 Pedro 5:7). Jehová ronojel mul yerutoʼ ri rachiʼil, nukʼuqbʼaʼ kikʼuʼx chqä nuyaʼ ruxkïn chkë (taskʼij ruwäch Salmo 94:​18, 19).

3. ¿Achkë nrajoʼ Jehová chë nkiʼän ri rachiʼil?

Jehová kan yerajoʼ jontir winäq, ye kʼa «kan junan nuʼän ruwäch kikʼë ri nkikʼwaj jun jïk kʼaslemal» (Proverbios 3:​32). Jehová nrajoʼ chë ri rachiʼil nkitäj kiqʼij rchë nkiʼän ri nqä chwäch ryä y ma yë ta ri ma nqä ta chwäch. Rkʼë jbʼaʼ ye kʼo jojun nkinaʼ chë majun bʼëy xkekowin ta xtkiʼän jontir ri nrajoʼ Jehová. Ye kʼa ryä kan nqʼax chwäch ri nqanaʼ. Rma riʼ ri winäq ri kan rkʼë ronojel kan nkajoʼ Jehová chqä nkitäj kiqʼij rchë nkiʼän ri nqä chwäch, ryä kan nuyaʼ qʼij chkë rchë yeʼok rachiʼil (Salmo 147:​11; Hechos 10:​34, 35).

 TQATAMAJ MÁS CHRIJ RE NAʼOJ REʼ

4. Abrahán xok rachiʼil Jehová

Ri nuʼij le Biblia chrij Abrahán (ri nbʼix chqä Abrán che rä) nukʼüt chqawäch achkë riʼ ri yatok rachiʼil Dios. Tiskʼij chrij Abrahán chpan Génesis 12:​1-4 y kixtzjon chrij reʼ:

• ¿Achkë xuʼij Jehová che rä Abrahán chë tbʼanaʼ?

• ¿Achkë xtzüj Jehová che rä?

• ¿Achkë xuʼän Abrahán taq xkʼoxaj yän ri xuʼij Jehová che rä?

5. Ri nukʼutuj Jehová chkë ri rachiʼil

Kʼïy mul nqajoʼ chë ri qachiʼil kʼo nkiʼän qmä röj.

• ¿Achkë ta nawajoʼ chë nkiʼän awachiʼil awmä rït?

Tiskʼij ruwäch 1 Juan 5:3 y kixtzjon chrij reʼ:

• ¿Achkë nrajoʼ Jehová chë nkiʼän ri rachiʼil?

Rchë nqanmaj rutzij Jehová, rkʼë jbʼaʼ kʼo jojun nkʼatzin nqajäl pa qakʼaslemal, achiʼel ri qanaʼoj. Tiskʼij ruwäch Isaías 48:​17, 18 y kixtzjon chrij reʼ:

• ¿Achkë rma Jehová nuʼij chkë ri rachiʼil chë kʼo tkijalaʼ pa kikʼaslemal?

 6. Ri nuʼän Jehová kimä ri rachiʼil

 RI XQATAMAJ QA

Jehová nrajoʼ ntok awachiʼil chqä xkaturtoʼ rchë xkajelun más rkʼë.

Tqakamluj ri xqatzʼët qa

• ¿Achkë rubʼanik yerutoʼ Jehová ri rachiʼil?

• ¿Achkë rma Jehová nuʼij chkë ri rachiʼil chë kʼo tkijalaʼ pa kikʼaslemal?

• ¿Naʼij rït chë Jehová kan nqʼax ruwiʼ ri nukʼutuj chkë ri rachiʼil? ¿Achkë rma naʼij riʼ?