ISHOMO RYA 08
Nobasa kuba munywani wa Yehova
Yehova nayenda ngu omumanye ge. Ahabw’enki? Nayenda ngu okizeho kwega ebiri kukwata aha mitwarize yeye, emirimo yeye n’ekigendererwa ceye, rero ogire ecetengo c’okuba munywani weye. Mbwenu shi nobasa kuba munywani wa Ruhanga? (Shoma omuri Yakobo 2:23.) Ni enki eki ori kubasa kukora ngu obe munywani wa Ruhanga? Bibuli negarukamu ebyo bibuzo kandi eyereka enshonga ahabw’enki kugira obunywani na Yehova ari co kintu kirungi eki ori kubasa kutunga.
1. Ni enki eki Yehova ari kukwendaho?
‘[Muhike] hihi Ruhanga, na we abone [kubahika] hihi.’ (Yakobo 4:8) Eco nikimanyisa ki? Yehova nayenda ngu obe munywani weye. Nikigumira abantu bingi kwikiriza ku bari kubasa kuba banywani ba Ruhanga, ahabw’okuba batari kubasa kumureba. Konka Yehova nakoresa Bibuli atugambira emitwarize yeye yona kugira ngu tumuhike hihi. Ku turi kushoma emitwarize ya Ruhanga omuri Bibuli, obunywani bwitu na we nibukizaho kuhama n’obu tutakamurebagaho.
2. Ahabw’enki Yehova ari we munywani murungi owu ori kubasa kugira?
Tihine omuntu ori kukukunda nka Yehova. Nayenda ngu oshemererwe kandi omushabe obwire bwona obu ori kwetenga obuyambi. Nobasa ‘kumwegecerera okushoberwa kwawe kona ahabw’okuba nakutaho omutima.’ (1 Petero 5:7) Yehova naba ayetegwire kushagika abanywani beye burijo, kubahumuriza n’okubahurikiza.—Shoma omuri Zaaburi ya 94:18, 19.
3. Ni enki eki Yehova ari kwenda ngu abanywani beye bakore?
Yehova nakunda abantu bona, konka ‘ab’omutima ogugororokire abesiga.’ (Enfumu 3:32) Yehova nayenda ngu abanywani beye bagezeho kukunda ebi ari kukunda kandi bange ebi ari kwanga. Abamwe nibahurira batari kubasa kubaho bari kugendera aha misinge ya Yehova y’ekirungi n’ekibi. Konka Yehova namanya embera ezi barimu. Nayikiriza buri muntu wena ori kumukunda abyihire aha mutima, kandi akakora ebi ari kubasa byona ngu akore ebi ari kukunda.—Zaaburi 147:11; Ebyakozirwe 10:34, 35.
YEGA BYINGI
Yega oku ori kubasa kukizaho kuba munywani wa Yehova, kandi omanye enshonga ahabw’enki ari we munywani murungi owu ori kubasa kutunga.
4. Aburahamu akaba ari munywani wa Yehova
Enkuru y’omuri Bibuli ya Aburahamu (nambwenu ori kwetwa Aburamu) netukwasa kumanya eki tushemerire kukora kugira ngu tube banywani ba Ruhanga. Shoma ebiri kukwata ahari Aburahamu omu Kutandika 12:1-4. Bwanyima muganire ahari ebi bibuzo:
-
Ni enki eki Yehova yashabire Aburahamu kukora?
-
Ni enki eki Yehova yamuraganisize?
-
Ni bata oku Aburahamu yakozire ebi Yehova yamushabire kukora?
5. Eki Yehova ari kushaba banywani beye
Hine ebintu ebi turi kuba turi kwenda ahari banywani bitu.
-
Ni biha bintu bimwe ebi ori kuba ori kwenda ngu banywani bawe bakukorere?
Shoma omuri 1 Yohaana 5:3, rero muganire ahari eki kibuzo:
-
Ni enki eki Yehova ari kuba nayenda ngu banywani beye bamukorere?
Kugira ngu tworobere Yehova tushemerire kuhindura emitwarize yitu. Shoma omuri Isaaya 48:17, 18, rero muganire ahari eki kibuzo:
-
Ahabw’enki Yehova ari kushaba banywani beye kukora empinduka?
Omunywani murungi natwijusya ebintu ebiri kubasa kuturinda kandi bikatugasira. Eco ni co Yehova ari kukorera banywani beye
6. Ni enki eki Yehova ari kukorera banywani beye
Yehova nakwasa banywani beye kwehanganira ebizibu. Zana VIDIYO, rero muganire ahari eki kibuzo.
-
Ni bata oku Yehova yakwasize omukazi owu twareba omuri vidiyo kwehanganira emitekatecere n’enyehurira mbi?
Shoma omuri Isaaya 41:10, 13, rero muganire ahari ebi bibuzo:
-
Ni enki eki Yehova ari kuraganisa banywani beye bona?
-
Mbehi notekateka ngu Yehova nabasa kuba omunywani murungi? Ahabw’enki ?
Omunywani wa hihi nakuha obuyambi obwire bwona obu ori kuba ori kubwetenga. Yehova na we ni co ari kukukorera
7. Kuba munywani wa Yehova nikitwariramu kuganira na we
Okuganira nikituma obunywani bwakizaho kuhama. Shoma omuri Zaaburi ya 86:6, 11, rero muganire ahari ebi bibuzo:
-
Ni bata oku turi kuganira na Yehova?
-
Ni bata oku Yehova ari kuganira n’itwe?
Nitugamba na Yehova birabire omu kushaba; kandi na we nagamba n’itwe birabire omuri Bibuli
ABANTU ABAMWE NIBAGAMBA NGU: “Okuhika hihi ya Ruhanga tikiri kubasika.”
-
Ni kiha cahandikirwe eki ori kubasa kukoresa kugira ngu oyereke ku turi kubasa kuba banywani ba Yehova?
EMPINYE
Yehova nayenda kuba munywani wawe kandi nayija kukukwasa kumuhika hihi.
Wayega ki?
-
Ni bata oku Yehova ari kukwasa banywani beye?
-
Ahabw’enki Yehova ari kuhabura banywani beye ngu bakore empinduka?
-
Mbehi notekateka ngu Yehova nashaba banywani beye ebi batari kubasa? Ahabw’enki?
CONDOZA
Ni bata oku obunywani obu oyine na Ruhanga buri kukukwataho omu kubaho kwawe?
“Yehova ni Ruhanga owu tushemerire kumanya” (Omunara g’Omurinzi, gw’aha kiro ca 15 Okwakabiri, 2003)
Yega oku turi kubasa kukizaho kuba banywani ba Ruhanga.
Manya enshonga ahabw’enki omukazi omwe yarebire oku obunywani bweye na Yehova bwamukirize.
Hurikiza oku eminyeto eri kugamba oku eri kwehurira ahari Yehova.
