Jiowa a mochen óm kopwe silefichi. Pwata? A mochen pwe lapólóón óm káé usun napanapan kewe, féfférún ngeni aramas me letipan, epwe pwal ina lapólóón óm mochen chiechi ngeni. Itá mi tufich óm kopwe chiechi ngeni Kot? (Álleani Kölfel 25:14.) Met ka tongeni féri pwe kopwe wiliti chiechian? Ewe Paipel a pélúweni ekkena kapas eis, me a áiti ngonuk ika pwata óm chiechi ngeni Jiowa, ina ewe sókkun chiechi mi kon aúchea seni meinisin.

1. Met Jiowa a etiwok le féri?

“Oupwe arap ngeni Kot, iwe, epwe arap ngenikemi.” (James 4:8) Met weween ena? Jiowa a etiwok óm kopwe wiliti chiechian. Eli a weires ngeni ekkóch ar repwe lúkú pwe ra tongeni chiechi ngeni pokiten rese tongeni kúna. Nge Jiowa a erenikich lón an we Kapas ewe Paipel minne mi lamot ren ach sipwe silei napanapan kewe pwe sipwe tongeni chiechi ngeni. Atun sia álleani an pwóróus ngenikich lón ewe Paipel, a lallapóló ach chiechi ngeni inaamwo ika sisaamwo kúkkúna i fán eú.

2. Pwata Jiowa i chiechiom mi múrinné lap seni meinisin?

Ese wor emén a tongeok usun án Jiowa tongeok. A mochen óm kopwe pwapwa me seppiti lón iótek ese lifilifil ineet a lamot ngonuk álillis. Ka tongeni ‘likiti ngeni Kot om öürek meinisin, pun i a ekieki met kopwe feiöch ren.’ (1 Petrus 5:7) Jiowa a chék mommolnetá le álisi chiechian kewe, oururuur, me aúseling ngeniir.​—Álleani Kölfel 94:18, 19.

3. Met Jiowa a mochen án chiechian kewe repwe féri?

Jiowa a tongei aramas meinisin, ‘nge i a mochen epwe chiechi ngeni ekkewe mi wenechchar.’ (Än Salomon Fos 3:32, Testament Söfö​—Agapé) Jiowa a mochen án chiechian kewe repwe achocho le féri ekkewe mettóch mi pwúng me ren, me ttii seniir ekkewe mettóch mi ngaw me ren. Eli ekkóch ra meefi pwe rese tongeni féri meinisin met Jiowa a mochen ar repwe féri me met resap féri. Iwe nge, Jiowa a úméúméch. A etiwa meinisin chókkewe mi enletin tongei me achocho úkúkún ar tufich le apwapwaai i.​—Kölfel 147:11; Föför 10:34, 35.

 KÚTTAFICHI

4. Apraham i chiechien Jiowa

Pwóróusen Apraham lón ewe Paipel (ewe mi pwal iteni Apram) a áiti ngenikich weween án emén chiechi ngeni Kot. Álleani pwóróusen Apraham lón Keneses 12:1-4. Mwirin pwóróusfengen wóón ekkeei kapas eis:

• Met Jiowa a ereni Apraham an epwe féri?

• Met Jiowa a pwone ngeni?

• Met Apraham a féri ren met Jiowa a eáni éúréúr ngeni?

5. Minne Jiowa a ereni chiechian kewe ar repwe féri

Sia kan mochen án chiechiach kewe repwe féri ekkóch mettóch.

• Ikkefa ekkóch mettóch ka mochen án chiechiom kewe repwe féri ngonuk?

Álleani 1 Johannes 5:3, me mwirin pwóróusfengen wóón ei kapas eis:

• Met Jiowa a mochen án chiechian kewe repwe féri?

Ren ach sipwe álleasochisi Jiowa, a lamot ach sipwe ekkesiwili napanapach are féfférúch. Álleani Aisea 48:17, 18, me mwirin pwóróusfengen wóón ei kapas eis:

• Pwata Jiowa a mochen án chiechian kewe repwe ekkesiwil?

 6. Minne Jiowa a féri ngeni chiechian kewe

 MENLAPAN

Jiowa a mochen óm kopwe Chiechian, me epwe álisuk le chiechiéch ngeni.

Enniwili

• Ifa usun Jiowa a álisi chiechian kewe?

• Pwata Jiowa a ereni chiechian kewe ar repwe ekkesiwili manawer?

• Óm ekiek nge a áweires ach sipwe chiechi ngeni Jiowa? Pwata a ina meefiom?