LONGESO 08
Yena Muhasa Kupwa Sepa lia Yehova
Yehova kanazange hanga umunyingike. Mumu liaka? Mumu muze munyingika kanawa utu, yitanga ni upale wenyi, muzanga kupwa sepa lienyi. Shina mutu mahasa lume kupwa sepa lia Zambi? (Tanga Samu 25:14.) Yika watamba kulinga mba upwe sepa lia Yehova? Mbimbiliya yinakumbulula yihula ayi. Yinasolola nawa mumu liaka chili chilemu kupwa sepa lia Yehova.
1. Yika Yehova anazange hanga ulinge?
Mbimbiliya yinambe ngwo: “Kundamenu kuli Zambi, mba iye kumakakundama kuli yenu.” (Tiangu 4:8) Yika chino chinalumbunuka? Chinalumbunuka ngwo, Yehova kanakusanyika hanga upwe sepa lienyi. Kuli atu amwe, chakupwa chikalu kutayiza ngwo mahasa kupwa sepa lia Yehova mumu keshi kumumona. Alioze kupalikila mu Mbimbiliya Yehova kakutulweza yuma yeswe hakutwala ku utu wenyi hanga tuhase kukundama kuli iye. Chipwe ngwe kutushi kumumona, nihindu muze mututanga Mbimbiliya, usepa wetu ni Yehova muukola.
2. Mumu liaka Yehova ali sepa mupema yoze watamba kupwa nenyi?
Kukushi mutu mukwo yoze wakukuzanga chinji kuhiana Yehova wakuhi. Iye kanazange hanga uwahilile ni kulemba kuli iye ha shimbu lieswalio mufupiwa ukwaso. Muhasa ‘kukunjika yipikalo ye yeswe kuli iye, mumu iye kakukufunga.’ (1 Petulu 5:7) Yehova kakuzanga kukwasa, kulembejeka ni kupanjika masepa jenyi.—Tanga Samu 94:18, 19.
3. Yika Yehova akwita kuli masepa jenyi?
Yehova kakuzanga atu eswe, alioze “kakulikata ni mukwa ululi.” (Yishima 3:32) Yehova kakwita kuli masepa jenyi hanga alinge yuma yalita ni kwehuka yuma yipi. Amwe kakunyonga ngwo, kechi kuhasa kulinga yuma yeswe yize Yehova akwita ni kwehuka yuma yipi. Yehova kananyingika kanawa chikuma chacho. Atu eswe waze akuzanga Yehova ni kusa tachi hanga amuvwise kuwaha, mahasa kupwa masepa jenyi.—Samu 147:11; Yilinga 10:34, 35.
NYINGIKA NAWA
Nyingika chize muhasa kupwa sepa lia Yehova, ni mumu liaka iye ali Sepa mupema yoze watela kupwa nenyi.
4. Apalahama kapwile sepa lia Yehova
Yuma yize Mbimbiliya yakwamba hakutwala kuli Apalahama (yoze avuluka nawa ngwo Apalama) yakutukwasa kunyingika yize yinalumbunuka kupwa sepa lia Zambi. Tanga hakutwala kuli Apalahama ha mukanda wa Uputukilo 12:1-4, mba nushimutwine yihula yino:
-
Yika Yehova alwezele Apalahama hanga alinge?
-
Yika Yehova alakenyene kuli Apalahama?
-
Yika Apalahama alingile?
5. Yuma yize Yehova akushimbwila hali masepa jenyi
Kanji-kanji twakushimbwila yuma yimwe hali masepa jetu.
-
Yuma yika wakushimbwila hanga masepa je akulingile?
Tanga 1 Yoano 5:3, mba nushimutwine chihula chino:
-
Yika Yehova akushimbwila hali masepa jenyi?
Twatamba kwalumuna utu ni yitanga yetu mba tuhase kwononokena Yehova. Tanga Izaia 48:17, 18, mba nushimutwine chihula chino:
-
Mumu liaka Yehova akwita hanga masepa jenyi alumune yitanga yo?
Masepa apema manunga ni kukukwasa muze mufupiwa ukwaso. Yino ye Yehova akulinga.
6. Yuma yize Yehova akulingila masepa jenyi
Yehova kakukwasa masepa jenyi kukumba yipikalo. Tala CHINEMA, mba nushimutwine chihula chino:
-
Kuchi Yehova akwashile pwo twamona ha chinema yoze te wakupinda ni manyonga api?
Tanga Izaia 41:10, 13, mba nushimutwine yihula yino:
-
Yuma yika Yehova analakenya kuli masepa jenyi?
-
Ku nyonga lie, shina Yehova mahasa kupwa Sepa mupema? Mumu liaka wakumbulula chocho?
Sepa mupema kali yoze wakututoweza ku yuma yize muyihasa kutusa mu ponde. Yino ye Yehova akulinga hali mesepa jenyi
7. Twatamba kuhanjika ni Yehova ni kumupanjika mba tupwe masepa jenyi
Usepa wakukola muze masepa akuhanjeka. Tanga Samu 86:6, 11, mba nushimutwine yihula yino:
-
Kuchi mutuhasa kuhanjika ni Yehova?
-
Kuchi Yehova akuhanjika ni yetu?
Muze twakulemba twakuhanjika ni Yehova. Iye kakuhanjika ni yetu muze twakutanga Mbimbiliya
ATU AMWE KAKWAMBA NGWO: “Chili chikalu kupwa sepa lia Zambi.”
-
Chisoneko chika cha mu Mbimbiliya chize muhasa kuzachisa hanga usolole ngwe mutuhasa kupwa masepa ja Zambi?
YIZE WALILONGESA
Yehova kanazange kupwa Sepa lie, makukwasa kukundama kuli iye.
Kuhitulula
-
Kuchi Yehova akukwasa masepa jenyi?
-
Mumu liaka Yehova akwita hanga masepa jenyi alumune yitanga yo?
-
Shina wakunyonga ngwe chili chikalu kupwa sepa lia Yehova? Mumu liaka wakunyonga chocho?
HENGWOLA NAWA
Kuchi kupwa sepa lia Zambi muchihasa kukuyukisa?
“Yehova—Zambi Yoze Twatela Kunyingika” (Kaposhi wa Kutalila 15 wa Fevereiro, 2003)
Nyingika chize muhasa kupwa sepa lia Zambi.
“Kuchi Munguhasa Kupwa Sepa Lia Zambi?” (Makumbululo a Yihula Yize Akweze Akuhula, Volume 2, Kapitulu 35)
Tala chize usepa uze umwe pwo apwile nawo ni Zambi walamwinyine mwono wenyi.
Twivwenu yize akweze amwe akunyonga hali Yehova.
