Zeova i anvi ou konn li pli byen. Akoz? I swete ki ler ou aprann konn son personnalite, son fason fer keksoz e sa ki i anvi pour ou, ou pou anvi vin son zanmi. Me eski ou kapab vreman vin zanmi avek Bondye? (Lir Psonm 25:14.) Ki ou kapab fer pour vin zanmi avek li? Labib i reponn sa bann kestyon e i montre akoz ou lanmitye avek Zeova i sa lanmitye pli enportan ki ou kapab annan.

1. Ki Zeova i envit ou pour fer?

“Vin pros avek Bondye e i pou vin pros avek zot.” (Zak 4:8) Ki sa i vedir? Zeova pe envit ou pour vin son zanmi. Serten dimoun i kapab vwar li difisil pour vin zanmi avek Bondye akoz zot pa kapab vwar li. Pourtan, dan son Parol Labib, Zeova in dir nou tou sa ki nou bezwen konnen lo son personnalite pour nou kapab vin pros avek li. Ler nou lir sa mesaz ki Bondye in anvoy pour nou dan Labib, nou vin pli pros avek li menm si nou pa’n deza vwar li.

2. Akoz Zeova i sa pli bon zanmi ki ou kapab annan?

Napa personn ki pli kontan ou ki Zeova. I anvi vwar ou zwaye e i anvi ki ou koz avek li nenport ki moman ou bezwen led. Ou kapab “larg tou [ou] traka lo li parski i enterese avek [ou].” (1 Pyer 5:7) Zeova in toultan pare pour siport, konsol e ekout son bann zanmi.​—Lir Psonm 94:18, 19.

3. Ki Zeova i ekspekte avek son bann zanmi?

Zeova i kontan tou dimoun, “me i vin bon zanmi avek dimoun ki drwat.” (Proverb 3:32, NWT) Zeova i ekspekte ki son bann zanmi i fer bann keksoz ki li i vwar i byen e evite fer bann keksoz ki i konsider konman mal. Serten dimoun i panse ki zot pa kapab arive fer tousala. Me Zeova i konpran nou. I aksepte tou dimoun ki vreman kontan Li e ki fer zot mye pour fer Li plezir.​—Psonm 147:11; Akt 10:34, 35.

 AL PLI O PROFON

4. Abraam ti zanmi Zeova

Zistwar Abraam dan Labib (ki ti osi apel Abram) i donn nou en lide ki savedir vin zanmi Bondye. Lir konsernan Abraam dan Zenez 12:1-4. Apre reponn sa bann kestyon:

• Ki Zeova ti demann Abraam pour fer?

• Ki Zeova ti promet li?

• Ki mannyer Abraam ti reazir anver sa ki Zeova ti demann li pour fer?

5. Ki Zeova i ekspekte avek son bann zanmi

Normalman nou ekspekte serten keksoz avek nou bann zanmi.

• Ki serten keksoz ki ou kontan ou bann zanmi i fer pour ou?

Lir 1 Zan 5:3 e apre reponn sa kestyon:

• Ki Zeova i ekspekte avek son bann zanmi?

Pour nou obei Zeova, petet nou bezwen sanz nou konportman oubyen serten latitid dan nou personnalite. Lir Izai 48:17, 18 e apre reponn sa kestyon:

• Akoz Zeova i demann son bann zanmi pour fer serten sanzman?

 6. Ki Zeova i fer pour son bann zanmi

 REZIMEN

Zeova i anvi ou vin son zanmi e i pou ed ou pour vin pros avek li.

Revizyon

• Ki mannyer Zeova i ed son bann zanmi?

• Akoz Zeova i demann son bann zanmi pour fer serten sanzman?

• Eski ou krwar Zeova i ekspekte tro bokou avek son bann zanmi? Akoz ou dir sa?