Jehoova boɔrɔŋ ka ho baŋoo soŋ. Ananso la wala? A eɛ o boɔbo ka, saŋa na hoŋ moɔ̃ niŋe a zanna o gyog-sonne na yɛlɛ, soe na oŋ maŋ tu kyɛ erɛ yɛlɛ ane teɛroŋ na o naŋ taa kyaare bo na, a na vɛŋeŋ ka ho boɔrɔ ka ho e o zɔmeŋɛ. Ho sagedieŋ ka ho na toɔ̃ eɛ Naaŋmen zɔmeŋɛ bee? (Kanne Yieme 25:​14.) Boŋ aŋ seŋ ka ho e a toɔ̃ e o zɔmeŋɛ? A Baabole iree a soorebie ŋa nɔɛ ko te. A Baabole lɛ wuli teŋ ka, Naaŋmen zɔmennoŋ la soma yaga zaa a gaŋ zɔmennoŋ zaa.

1. Boŋ ka Jehoova toŋboɔle bo ka ho wa e?

“Yɛ tage peɛle Naaŋmen, O na tage peɛle yɛ la.” (Gyimisi 4:8) Wala ka lɛ wuli? Jehoova tonɔ boɔlɔ boŋ ka ho wa e o zɔmeŋɛ. A maŋ eɛ kpeɛŋaa ko noba mine ka ba sagedi ka ba neŋ Naaŋmen na toɔ̃ eɛ zɔmenne, bonso ba koŋ toɔ̃ de ba nimie nyɛ o. Kyɛ, yelzaa naŋ seŋ ka te baŋ kyaare Jehoova gyogo, ka lɛ vɛŋ ka te toɔ̃ tage peɛloo be la o Yelbiri a Baabole poɔŋ. Aneazaa ka te daaŋ ba nyɛ Naaŋmen, kyɛ ka te naŋ moɔ̃ niŋe kanna a Baabole, a na soŋ teŋ ka te neŋ Jehoova zɔmennoŋ na maaleŋ e kpeɛŋaa.

2. Bonso ka Jehoova e Zɔmeŋɛ naŋ soma gaŋ zɔmeŋɛ zaa ho naŋ taa?

Neɛzaa ba nɔnɔ bo gaŋ lɛ Jehoova naŋ nɔnɔ bo na. O boɔrɔŋ ka ho taa popeɛloŋ a maŋ yele yɛlɛ koroo wagre zaa ho naŋ wa boɔrɔ o sommo. Ho na toɔ̃ de la “[ho] yelwonnii zaa ko O, bonso, O taa la [ho] yɛlɛ.” (1 Piita 5:7) Wagre zaa Jehoova maŋ eɛ siri ka o soŋ o noba, a dii ba sukyie, a kyɛ kyɛlle woŋ o zɔmenne yelfɛree meŋ.​—Kanne Yieme 94:​18, 19.

3. Bo ka Jehoova boɔrɔ ka o zɔmenne maŋ erɛ koroo?

Jehoova nɔnɔ la nembooree zaa, “kyɛ O neŋ suntuuro maŋ laŋɛɛ zɔmennoŋ naŋ e kpeɛŋaa.” (Yeng Yelibie 3:​32) Jehoova boɔrɔŋ ka o zɔmenne mɔɔrɔ ba mɔɔbo zaa ka ba erɛ yɛlɛ naŋ tori a kyɛ tage ba menne yi yelfaare eŋɛŋ. Noba mine maŋ teɛreŋ ka ba koŋ toɔ̃ pɛle Jehoova poɔ zaa. Kyɛ, Jehoova waa la nimimaaroŋ soba. O maŋ sage deɛ la neɛzaa naŋ nɔmoo a kyɛ mɔɔrɔ o mɔɔbo zaa ka o pɛlɛ O poɔ na.​—Yieme 147:​11; Toma 10:​34, 35.

 ZANNE YƐLƐ YAGA POƆ

4. Aboraham da eɛ Jehoova zɔmeŋɛ

Aboraham (ba naŋ da boɔlɔ Aboram) ka o yɛlɛ be a Baabole poɔ na wuli teŋ lɛ Naaŋmen zɔmennoŋ naŋ waa. Kanne Aboraham yɛlɛ a yi Munpiilee 12:1-4. A kyɛ gyieli a soorebie ŋa yɛlɛ:

• Boŋ ka Jehoova da yelko Aboraham ka o e?

• Boŋ noɔre ka Jehoova da eŋ ko Aboraham?

• Wala ka Aboraham da e kyaare Jehoova sowuli na?

5. Yɛlɛ Jehoova naŋ boɔrɔ yire o zɔmenne zieŋ

Te maŋ kaarɛɛ soriŋ ka te zɔmenne e yɛlɛ mine ko te.

• Boŋ yɛlɛ mine hoŋ na boɔrɔ ka ho zɔmenne e ko bo?

Kanne 1 Gyɔɔn 5:​3, a kyɛ gyieli a soorebiri ŋa yɛlɛ:

• Boŋ ka Jehoova boɔrɔ ka o zɔmenne erɛ koroo?

Ka te naŋ na toɔ̃ kyɛllɛ wono Jehoova yɛlɛ, a na fɛreŋ ka te leɛre te eebo ane te gyogri. Kanne Aizeeya 48:​17, 18, a kyɛ gyieli a soorebiri ŋa yɛlɛ:

• Bonso ka Jehoova maŋ yelko o zɔmenne ka ba leɛre ba eebo?

 6. Lɛ Jehoova naŋ maŋ e soŋ o zɔmenne

 A ZANNOO YELNIMIZEERE

Jehoova boɔrɔŋ ka o e ho Zɔmeŋɛ, o na soŋ boŋ ka ho tage peɛloo.

Bo Hoŋ Zanne

• Sobuo ka Jehoova maŋ soŋ o zɔmenne?

• Bonso ka Jehoova maŋ yelko o zɔmenne ka ba leɛre ba eebo?

• Ho teɛre ka a eɛ tuo yaga zaa ka Jehoova e te zɔmeŋɛ bee? Bonso hoŋ teɛrɛ lɛ?