TOLI 08
I sa toon Yehofa mati
Yehofa wani i kon sabi en moo bun. A wani i kon sabi den manii fi en, fa ai libi anga taawan, anga san a abi a pakisei gii. Saide? Bika a sabi taki te yo sabi den sani ya, yo wani toon en mati. I si enke i sa toon Gadu mati? (Leisi Psalm 25:14.) Sai mu du fi yu anga Gadu toon mati? Beibel e piki den akisi ya. Ai soi i tu saide Yehofa na a moo bun mati di u sa abi.
1. San Yehofa wani i du?
Beibel taki: ‘Kon koosube a Gadu, da enseefi o kon koosube a yu’ (Yakowbesi 4:8). San a sani ya wani taki? Yehofa e kai i fu toon en mati. Son sama e si enke den naw poi toon Gadu mati fu di den á poi si en. Ma Yehofa soi wi ala den manii fi en aini Beibel fu di a wani u toon en mati. Te we leisi Beibel, we kon moo lobi Yehofa, winsi fa wa poi si en.
2. Saide Yehofa na a moo bun mati di i sa abi?
Sama á de di lobi yu enke fa Yehofa lobi i. Yehofa wani i piisii. A wani i begi en te sani e moo i. I sa ‘fika ala den polobelema fii gi en, bika ai booko en ede anga i’ (1 Peitilisi 5:7). Yehofa e holibaka gi den mati fi en. Ai gi den taanga-sikin te sani e moo den. Ala yuu ai aliki den.—Leisi Psalm 94:18, 19.
3. San u mu du efu u wani toon Yehofa mati?
Yehofa lobi ala sama, ma a den sama ‘di e du sani anga wan kiin ati wawan ai si enke en mati’ (Odo 3:32). Yehofa wani den mati fi en du den sani di ai leli den. Den á mu e du ogii. Son sama e si enke den naw poi libi enke fa Yehofa wani, ma Yehofa sabi san u poi du anga san wa poi du. Efu u lobi en tuutuu, neen we meke moiti fu libi enke fa a wani, ao si wi enke en mati.—Psalm 147:11; Toli fu den apostel 10:34, 35.
LUKU A TOLI YA MOO FINI
Wo luku san u sa du fu toon Yehofa mati, anga saide Yehofa na a moo bun Mati di u sa abi.
4. Abalaham a be Yehofa mati
A toli fu Abalaham e yeepi u fu fusutan san a wani taki fu de Gadu mati. (Den be e kai en Abalam tu). Leisi a toli fu Abalaham a Genesesi 12:1-4, da i luku efii poi piki den akisi ya:
-
San Yehofa be akisi Abalaham fu du?
-
San Yehofa be paamisi en?
-
San Abalaham du di Yehofa akisi en a sani ya?
5. San Yehofa wani den mati fi en du?
Son leisi we wani den mati fu u du son sani gi u.
-
Sai be o wani i mati du gii?
Leisi 1 Yohanisi 5:3, da i luku efii poi piki a akisi ya:
-
San Yehofa wani den mati fi en du?
Efu u wani aliki Yehofa, kande wo abi fu kengi son manii fu u. Kande wo abi fu tapu anga son sani di u be gwenti du tu. Leisi Yesaya 48:17, 18, da i luku efii poi piki a akisi ya:
-
Saide Yehofa wani den mati fi en kengi son manii fu den?
Wan bun mati o soi u san u mu du fu ogii á miti u. A so Yehofa e poti wi a pasi tu
6. Yehofa e yeepi den mati fi en
Te den mati fu Yehofa abi polobelema, ai yeepi den. Pee a FELON, da i luku efii poi piki den akisi ya.
-
Fa Yehofa yeepi a uman aini a felon ya?
Leisi Yesaya 41:10, 13, da i luku efii poi piki den akisi ya:
-
San Yehofa taki aw du gi ala den mati fi en?
-
I si enke Yehofa a wan bun mati? Saide i taki so?
Bun mati e yeepi u. Yehofa a wan bun mati di e yeepi wi ala yuu
7. Efu u wani wi anga Yehofa toon mati, u mu e taki anga en, u mu e aliki en tu
Te mati e taki anga denseefi, den e moo lobi denseefi. Leisi Psalm 86:6, 11, da i luku efii poi piki den akisi ya:
-
Faw sa taki anga Yehofa?
-
Fa Yehofa e taki anga u?
Te we begi, a taki we taki anga Yehofa. Te we leisi Beibel, a taki Yehofa e taki anga u
SON SAMA E TAKI: ‘Wi anga Gadu á poi toon mati.’
-
Sowtu tekisi i be o leisi fu soi wan sama taki wi anga Gadu poi toon mati?
SAI LELI?
Yehofa wani i toon en mati. Ao yeepi i tu fu toon en mati.
Sai be o piki?
-
Fa Yehofa e yeepi den mati fi en?
-
Saide Yehofa wani den mati fi en kengi son manii fu den?
-
I si enke den sani di Yehofa wani den mati fi en du taanga tumisi? Saide i taki so?
MOO SANI FU A TOLI YA
Sowtu wini ye fende te yu anga Gadu a mati?
‘Yehovah—Wan Gadu di ala sama mu sabi’ (A Saanantongo Wakititolen fu 15 Februari 2003)
Luku saide wan uman taki en libi e go moo bun di a kon sabi Gadu.
‘Mia be wani dede’ (A Saanantongo Wakititolen fu 2017 No.1 )
Aliki fa wantu yonkuuwan e pakisei fu Yehofa.
