KALANSEN 08

I be se ka teriya kɛ ni Jehova ye

A LAMƐN KAAN NIN NA

Jehova b’a fɛ i k’ale lɔn ka ɲɛ. Mun na do? A jigi b’a la ko n’i tora ka dɔ lɔn a ka jogow koo la, a ka kokɛcogo ani a ka laɲinita koo la, a bena diya i ye ka kɛ a teri ye. I lanin b’a la ko mɔgɔ be se ka kɛ Ala teri ye wa? (Zaburuw 25:14 kalan). I be se ka mun lo kɛ walisa ka kɛ a teri ye? O ɲiningaliw jaabili be sɔrɔ Bibulu kɔnɔ. Bibulu b’a yira fana ko nɛɛmaba lo ka teriya kɛ ni Jehova ye. O teriya ɲɔgɔn tɛ yen.

1. Jehova b’a ɲini i fɛ i ka mun lo kɛ?

“Aw ye gwɛrɛ Ala la, ale fana bena gwɛrɛ aw la.” (Zaki 4:8). O kuma kɔrɔ ko di? Jehova b’a ɲini i fɛ i ka kɛ ale teri ye. A ka gwɛlɛ dɔw ma ka la a la ko u be se ka kɛ Ala teri ye sabu u tɛ se k’a ye. Nka, an mako b’a la ka fɛɛn o fɛɛn lɔn Jehova koo la walisa ka se k’an magwɛrɛ a la, Jehova y’o yira an na a ka Kuma kɔnɔ, o min ye Bibulu ye. N’an tora ka Ala ka Kuma kalan, teriya min be an n’ale cɛ, o barika bena bonya hali n’an tɛ se k’a ye.

2. I tɛ se ka Jehova ɲɔgɔnna teri sɔbɛ sɔrɔ. Mun na do?

Mɔgɔ si tɛ i kanu ka se Jehova ma. A b’a fɛ i ka ninsɔndiya ani i ka kuma a fɛ n’i mako be dɛmɛ na tuma o tuma. I be se k’i ‘ka haminankow bɛɛ to a bolo, bari a be janto i la.’ (1 Piyɛri 5:7). Jehova labilanin lo tuma bɛɛ k’a teriw dɛmɛ, k’u dusu saalo ani k’u lamɛn.—Zaburuw 94:18, 19 kalan.

3. Jehova be mun lo ɲini a teriw fɛ?

Jehova be mɔgɔw bɛɛ kanu, “nga a be mɔgɔɲumanw [lo] kɛ a teriw ye.” (Talenw 3:32). Jehova be min jati koo ɲuman ye, a b’a ɲini a teriw fɛ u ka banba k’o lo kɛ, ani a be min jati koo jugu ye, u kana o kɛ. Jehova ye sariya minw sigi ɲuman ani juguman koo la, dɔw b’a miiri k’u tɛna se k’o sariyaw labato a ɲɛɛ ma ka ye. Nka Jehova dusu man gwɛlɛ, a b’an faamu. Mɔgɔ o mɔgɔ b’a kanu sɔbɛ la, ani a b’a seko bɛɛ kɛ k’a koo diya a ye, a be sɔn ka teriya kɛ n’o tigi ye.—Zaburuw 147:11; Kɛwaliw 10:34, 35.

A ƝINI KA DƆ LƆN TUGUN

A ɲini k’a lɔn i be se ka kɛ Jehova teri ye cogo min na ani fɛɛn min kama a ka teriya ɲɔgɔn tɛ yen.

4. Ibrayima tun ye Jehova teri ye

Ka teriya kɛ ni Ala ye, o kɔrɔ ko di? Ibrayima (wala Abramu) ka maana b’an dɛmɛ k’o faamu. Min fɔra Ibrayima koo la Zɛnɛzi 12:1-4 na, o kalan. O kɔ, a’ ye ɲiningali nunu kɛ ani ka baro kɛ u kan:

Jehova y’a fɔ Ibrayima ye ko a ka mun lo kɛ?
Jehova y’a daa di a ma ko a bena mun lo kɛ a ye?
O cikanw sɔrɔnin kɔ, Ibrayima ye mun lo kɛ?

5. Jehova b’a fɛ a teriw ka mun lo kɛ?

An ka teli ka koo dɔw ɲini an teriw fɛ.

A bena diya i ye i teriw ka mun lo kɛ i ye?

Vɛrise nin kalan: 1 Zan 5:3. O kɔ, a’ ye ɲiningali nin kɛ ani ka baro kɛ o kan:

Jehova be mun lo ɲini a teriw fɛ?

N’an b’a fɛ ka mɛnni kɛ Jehova fɛ, n’a sɔrɔ an ka ɲi ka yɛlɛmani don an tagamacogo wala an sɔɔn na. Ezayi 48:17, 18 kalan. O kɔ, a’ ye ɲiningali nin kɛ ani ka baro kɛ o kan: