Yéhova a yi na o yem nyè. Amu dzé? Amu a bele afiri na ntié wò yègè na wò yem akia mot a ne, mimbòen mié, nyien woé, wò yi bi ngong ya bò mvoé dzié. Nde, ye bi ne fò dzam bò bemvoé be Zamba ngaa? (Lang’a Salmen 25:14). Dzé o ne dzam bò asu yi na o tòbò mvoé dzié? Bibel a ve biyalen ya minsili mité ai a timi fe bia amu dzé a tòbò amvoé ai Yéhova a ne amvoé da dang nfi aloro memvoé mese mevòk.

1. Yéhova a banda wò na o bò dzé?

“Subugen Zamba babi, ndò nyè a yi mina subu babi” (Yakòbus 4:8). Dzé éfus té ya tilen? Yéhova a banda wò na o tòbò mvoé dzié. Abui da yebe ki na be ne bò bemvoé be Zamba amu ba yen ki nyè. Ve a Bibel, Yéhova a ve bia é mam mese bia yang’en ai mò asu yi na bi yem nyè ai na bi subu nyè babi. Ane bia yi lang Bibel, é kalara Zamba a nga tili bia, nala fe amvoé daan ai nyè da yi bò ngul, tò ane bia yen ki nyè.

2. Amu dzé Yéhova a ne mbembe mvoé o ne dzam bi?

Mot mfe a seki wò ding akui ane Yéhova. A yi na o tòbò mintak ai na o dzaa nyè nvòlen woé abog ase wò yi. O ne ‘nyè dzam kat meyang’en moé mese, amu a nòng ngab ai wò’ (1 Pétrus 5:7). Yéhova a ne babi ya sug, ya wono ai a vogolo bemvoé boé (Lang’a Salmen 94:18, 19).

3. Asu yi na bi bò amvoé ai Yéhova, dzé a yanga na bi bò?

Yéhova a ding mot ose, “betetele bebot be ne afiri dié” (Minkana 3:32). Asu yi na o tòbò amvoé ai Yéhova, wò yeane ve mengul moé mese asu yi na o bò é mam a yen na me ne mbeng, o saala fe é ma a yen na me ne abé. Abui da yen na be seki dzam baala betebega Yéhova a ve bia. Ve Yéhova a ne ényò a wog bia. A yebe na a bò amvoé ai é ba ba ding nyè nya nding’en, ai é ba ba ve mengul na ba fû nyè nnem (Salmen 147:11; Mimbòen mi apostel 10:34, 35).

 TUENE FAG

4. Abraham a nga be mvoé Yéhova

Nlang Bibel Abraham (be loégé fe nyè na Abram) wa lere bia dzé ya tilen na a bò amvoé ai Zamba. Lang’a Yénésis 12:1-4 ai yalen minsili mi tsaa mi:

• Dzé Yéhova a nga sili Abraham na a bò?

• Ngaaga fé Yéhova a nga bò Abraham?

• Abraham a nga bò ya éyòng Yéhova a nga ve nyè betebega?

5. É mam Yéhova a yanga na bemvoé boé be bò

A ne été na bia kare yanga na bemvoé baan be bò mam mezing asu daan.

• Dzé wò ding na bemvoé boé be bò asu doé?

Lang’a 1 Yohannes 5:3 ai yalen a nsili hi:

• Dzé Yéhova a yanga na bemvoé boé be bò?

Asu yi na bi bò Yéhova mewog, dzam bò na bia yeane tséndé akol dulu daan ngeki mefulu maan. Lang’a Yésaya 48:17, 18 ai yalen a nsili hi:

• Amu dzé Yéhova a yi na bemvoé boé be tséndé?

 6. É mam Yéhova a bò asu bemvoé boé

 OBALBAS

Yéhova a yi na o tòbò mvoé dzié, ai a yi wò vòli mfaa té.

Dzé bia baala

• Akia afé Yéhova a vòli bemvoé boé?

• Amu dzé Yéhova a dzo ai bemvoé boé na be bò mintsénden?

• Mfaa woé, ye wò tsog na é ne ayié ya tòbò mvoé Zamba? Asu dzé?