E loto a Seova ke ke iloa pe ko ai a ia. Koleā lona tupuʼaga? Talie kāpau e ke iloa ona agaaga, mo gaʼoi alā na fai e ia ti mo ana fakatuʼutuʼu, ti e ke fia kauneʼa loa mo ia. Kae e mafai ko ia ke ke kauneʼa mo le Atua? (Lau Pesalemo 25:14.) Koleā e tonu ke ke fai ke ke kauneʼa ai mo ia? E tali ki ai a le Tosi-Tapu ti e toe fakasā mai i ai pe koleā e maʼuiga ai ke tou fakakauneʼa mo Seova.

1. Koleā e loto a Seova ke ke fai?

“Kotou fakafeofi ki le Atua, ti e fakafeofi atu loa a ia kia koutou.” (Sakopo 4:8) Koleā lona fakaʼuiga? E loto a Seova ke ke kauneʼa mo ia. E faigataʼa ki ʼiki lalātou tui e mafai ke lotou kauneʼa mo le Atua o tupu talie e leʼaise lotou tio mata kiate ia. Kae e fakasā mai e Seova i le Tosi-Tapu, a neʼa fuli alā e ʼaoga ke ke iloa o uiga mo ia ke mafai ai ke ke fakafeofi kiate ia. Kāpau e ke lau tuʼumaʼu le Tosi-Tapu, ti e makeke loa lau fakakauneʼa mo Seova, logo ai e leʼese ke tio mata kiate ia.

2. Ko Seova ko se kauneʼa mālie?

E alofa a Seova kiate koe. E loto aia ke tou maʼuli fiafia ti ke tou kole kiate ia a lana tokoi mokā e ʼaoga. E mafai ke ke ‘teki kiate ia ou mafaʼia fuli, talie e tokaga aia kiate koe.’ (1 Petelo 5:7) E tokoi tuʼumaʼu a Seova ki lana kakai, o fakafīmālieʼi lātou.​—Lau Pesalemo 94:18, 19.

3. Koleā e tonu ai ke ke kauneʼa mo Seova?

E alofa Seova ki kakai fuli, kae e ‘kauneʼa aia mo tagata māʼokiʼoki.’ (Taagapati 3:32) E tonu ke tou faiga fakamālotoloto ke tou fai le neʼa leia e mālie kae tiʼaki le fai o le neʼa leia e veli. Ki le manatu a ʼiki, e mata faigataʼa kia lātou lalātou fakaʼapaʼapa ki fakatotonu fuli a Seova. Kae ko Seova e manavaʼalofa lasi. E kauneʼa aia mo kakai fuli alā e alofa māʼoki kiate ia ti mo fai a neʼa fuli ke mālie kiate ia.​—Pesalemo 147:11; Tosi Gaoi 10:34, 35.

 MANATU LOLOTO

4. Na kauneʼa a Apalamo mo Seova

E fakasā mei le isitolia o Apalamo i le Tosi-Tapu, pe koleā le fakaʼuiga o le fakakauneʼa mo le Atua. Lau Senesi 12:1-4 ti fai a vesili anei:

• Koleā na fakatotonu e Seova kia Apalamo?

• Koleā na fakapapapauʼi e Seova kiate ia?

• Ti koleā loa na fai e Apalamo?

5. Koleā leia e loto e Seova ke fai e ona kauneʼa?

E tou fiafia mokā fai e otātou kauneʼa le neʼa leia e tou loto ki ai.

• Koleā e tou loto ke fai e otātou kauneʼa kia tātou?

Lau 1 Soane 5:3, ti fai le vesili leinei:

• Koleā e loto ai Seova ke fai e ona kauneʼa?

E tonu ke fetogi a agaaga o otātou maʼuli ke mafai ai latātou fakalogo kia Seova. Lau Esaia 48:17, 18, ti mo fai le vesili leinei:

• Koleā e loto Seova ke fai ona kauneʼa ni fetogi i olātou maʼuli?

 6. Koleā e fai e Seova ki ona kauneʼa?

 MANATU TĀFITO

E fia kauneʼa Seova mo koe, ti e tokoi atu loa aia ke ke liliu ko lona kauneʼa.

Fakamanatu

• E tokoi fefeʼaki a Seova ki ona kauneʼa?

• Koleā e kole ai a Seova ki ona kauneʼa, ke fai ni fetogi i olātou maʼuli?

• E faigataʼa ko ia a neʼa alā e fakatotonu e Seova ki ona kauneʼa? Koleā lona tupuʼaga?