Yahuwah Alla no faalaa yo on anndu mo moƴƴa. Fii honɗun ? Ko fii himo tanƴinii si on ɓeydii anndugol sifaaji makko ɗin, no o waɗirta piiji non e faale makko on, on ɓurtay faaleede wonugol giɗo makko. E miijo mon, on waaway wonude giɗo Alla tigi tigi ? (Janngee Zabuura 25:14). Ko honno waawirton wonude giɗo makko ? Deftere Alla nden no jaabii ɗee lanndaale e hinde sifii fii honɗun wonugol giɗo Alla ko weldigal ɓurngal hittude.

1. Ko honɗun Yahuwah Alla faalaa yo on waɗu ?

« Ɓadee Alla, ɗun o ɓadoto on » (Yaaquuba 4:8). Ko honɗun oo aaya firi ? Yahuwah Alla no faalaa yo on wonu giɗo makko. No sattani woɓɓe wonugol giɗo Alla ɓayri ɓe yi’ataa mo. Kono e nder Daaluyee makko on, Yahuwah Alla no feɲɲinani en kala ko haanuɗen anndude fii makko fii no ɓadoren mo. E nder ko janngeten Deftere Alla nden kon, ɗun ko nelal makko ngal e men, weldigal men ngal e Yahuwah Alla ɓurtay tiiɗude, hay si en yi’ataa mo.

2. Fii honɗun Yahuwah Alla ko giɗo ɓurɗo kelɗude mo waawoton heɓude ?

Hay gooto yiɗaa on moƴƴa wa Yahuwah Alla. Himo faalaa yo on welto e toroɗon mo ballal e saa’i kala mo hatonjiniɗon. Hiɗon waawi ‘fawude anndeeji mon ɗin fow e hoore makko, ko fii o kippay fii mon’ (1 Petruusu 5:7). E saa’i kala Yahuwah Alla no hebilii tammbitagol yiɓɓe makko ɓen, multugol e heɗagol ɓe (janngee Zabuura 94:18, 19, VPFJ).

3. Ko honɗun Yahuwah Alla faalaa yo en waɗu fii wonugol giɗo makko ?

Yahuwah Alla no yiɗi yimɓe ɓen fow, kono « Joomiraaɗo on no weldi e feewuɓe ɓen » (Tindi 3:32, VPFJ). Fii wonugol giɗo Alla hiɗen haani wakkilaade waɗugol ko o yiɗi e wikkaade piiji ɗi o yiɗaa. Woɓɓe no miijii ɓe waawataa teddinde muk laawi Yahuwah Alla ɗin fii ko moƴƴi e ko boni. Kono Yahuwah Alla no moƴƴi ɓernde. O jaɓanay kala yiɗuɗo mo tigi tigi e kala wakkiliiɗo waɗugol piiji weltinayɗi mo (Zabuura 147:11, VPFJ ; Kuuɗe sahaabaaɓe ɓen 10:34, 35).

 LUGGINEE

4. Annabi Ibraahiima hari ko giɗo Yahuwah Alla

Taariika annabi Ibraahiima on (noddaaɗo kadi Abraama) ka nder Deftere Alla no holli en ko honɗun firi wonugol giɗo Alla. Janngee Fuɗɗoode nden 12:1-4 (VPFJ) e yewton fii ɗee lanndaale :

• Ko honɗun Yahuwah Alla daalani annabi Ibraahiima waɗugol ?

• Ko honɗun Yahuwah Alla fodi mo ?

• Ko honɗun annabi Ibraahiima waɗi fii teddingol yamirooje Yahuwah Alla ɗen ?

5. Ko Yahuwah Alla faaletee yo yiɓɓe makko ɓen waɗu

No haani ka tanƴinoren piiji goo yiɓɓe men.

• Ko piiji honɗi faaleteɗon yo yiɓɓe mon ɓen waɗan on ?

Janngee 1 Yuuhanna 5:3 e yewton fii ngal lanndal :

• Ko honɗun Yahuwah Alla faaletee yo yiɓɓe makko ɓen waɗu ?

Fii ɗoftagol Yahuwah Alla, haray hiɗen haani waylude jikkuuji men ɗin e sifaaji men goo. Janngee Isaaya 48:17, 18 e yewton fii ngal lanndal :

• Fii honɗun Yahuwah Alla no faalaa yo yiɓɓe makko ɓen waylu jikkuuji maɓɓe ɗin ?

 6. Ko Yahuwah Alla waɗata fii wallugol yiɓɓe makko ɓen

 RAWNOODE

Yahuwah Alla no faalaa yo on wonu giɗo makko e o wallay on wonugol ɗun.

Ndartannde

• Ko honno Yahuwah Alla wallirta yiɓɓe makko ɓen ?

• Fii honɗun Yahuwah Alla yamiri yiɓɓe makko ɓen waylugol jikkuuji maɓɓe ɗin ?

• Hiɗon miijii Yahuwah Alla no tanƴinori yiɓɓe makko ɓen ko ɗuuɗi ? Fii honɗun ?