Jìhóvà gbĩ́ kọ ó palàge nyimàèe ló. Ló éé? À ẹbmà dẽe kọọ̀ bé eo gé nó nú ea kil ló gbò a kpãa naa, bé ea ólò naa nu naa, nè gbò a tóm̀ bùlà kìlmà ní ló, níà bé ea é náa kọ ó gbĩ́ gè dú a kóò naa ẽ́. É kọọ̀ àé láá valí kọ ó dú kóò Bàrì? (Bugi Psalm 25:14.) Éé ní eo é láá naa kọbé ò dú a kóò e? Kpá Káí áálá gbò bíbvá vaá à kọ́ nú ea náa vaá gè bã̀àà kóò Jìhóvà ní ea dú kà lé gbaa ló ea bọọ lọ̀l vaá à lee eo é láá iéé.

1. Éé ní e Jìhóvà kọ́ ó naa ẽ́?

“Tõonii bãí ló Bàrì, mè àé tõo bã̀í ló.” (Jém̀z 4:8) Éé ní e níí tõó dọ̀ ẹ? Jìhóvà gé kólí ni kọ ó duè a kóò. À ólò tavala ló sìgà gbò ge zìgà kọọ̀ bàé láá bãàè kóò nen e bà náa monmà dẽe, à bẽ̀ènà ge láá bã̀àà kóò Bàrì. Sõò, mm̀ a Moǹ Bel ea dú Kpá Káí, Jìhóvá kọ́ dénè nú e íè bíi ló gè nyimá ea kil ló íb nen e ẹlẹ dú kọbé è láá tõonìè bãèé ló. Tṍó e bugì gbò a moǹ bel mm̀ Kpá Káí, à ólò naa kọọ̀ bẹẹ gbaa ló kìlmàé ló á kpáá agaló, náa kal ló béè kọọ̀ née monmàe dẽe.

2. Éé ní ea náa kọọ̀ Jìhóvà á dú kà lé Kóò ea tõo lọ̀l vaá à lee eo é láá iéé?

Náa íe nen ea vulè ni èlmà bé e Jìhóvà vulè ni naa. À gbĩ́ kọọ̀ nyíé ni á ẹẹ vaá ò kọ́ o bíi neèe kọ̀láá tṍó eo íè bíi ló nvèè bá. Òó láá ‘tú dénè nú ea gé tãagẽ́ ni gbẹẹẹ́ bá, boo béè kọọ̀ à gé bulà nú ea kil ní ló.’ (1 Pítà 5:7) Jìhóvà ólò di kpènà ló gè nvèè bá, nvèè nyíé gbàà, vaá pãane tṍ ló pá a kóò.—Bugi Psalm 94:18, 19.

3. Éé ní e Jìhóvà ẹbmà dẽe kọ pá a kóò á naa ẽ́?

Jìhóvà vulè kọ̀láá nen, “sõò à ólò zọ̀ nen ea tõo lèlà bã̀àà díì díílá kóò.” (Próvẹẹ̀b 3:32) Jìhóvà gbĩ́ kọọ̀ pá a kóò á pììga boo gè naa nú e ẹlẹ ẹb kọ à dú lé vaá aa ló gè naa nú ea kọọ̀ à dú pọ́lọ́. À tõó ló sìgà gbò kọọ̀ bà náa gé láá tõonìè boo gbò nòòkúù Jìhóvà ea kil ló lé nè pọ́lọ́. Kọ̀láá bé ea dì naa, Jìhóvà dã́i ból ló. À ólò tenmà kọ̀láá nen ea vulèe vaá pììga boo gè naa nú ea léémáe.—Psalm 147:11; Tóm 10:34, 35.

 KPÁÁ NÓ BỌ̀Ọ̀VẸ̀

4. Ébràhàm beè dú kóò Jìhóvà

Nòòtẽ́ ea di mm̀ Kpá Káí ea kil ló Ébràhàm (ea beè kọ̀là nàgé Ébràm) náa kọ é nyimá nú e gè bã̀àà kóò Bàrì dú. Bugi nòòtẽ́ ea kil ló Ébràhàm mm̀ kpá Jénesìs 12:1-4. Vaá ò gbóó aalai gbò bíbví:

• Éé ní e Jìhóvà beè kọọ̀ Ébràhàm á naa ẽ́?

• Éé ní e Jìhóvà beè zìgà nèe ẽ́?

• Ébràhàm beè labví láb naa vàẹ kilma ló tùle e Jìhóvà beè nèe ẽ́?

5. Nú e Jìhóvà gbĩ́ kọ pá a kóò á naa

À íe sìgà nú e ólò gbĩ́ kọọ̀ pá bẹẹ kóò á naa.

• Sìgà éé ní eo ólò gbĩ́ kọọ̀ pá o kóò á naa nè ni ẽ́?

Bugi 1 Jọ́ọ̀n 5:3, vaá ò gbóó aalai nakà bíbví:

• Éé ní e Jìhóvà ẹbmà dẽe kọ pá a kóò á naa ẽ́?

Kọbé è láá gbàntṍ ló Jìhóvà, àé dú bíi kọ é nyaaná bẹẹ láb àbèè bé e ólò tõó dùm naa. Bugi Àìzáíà 48:17, 18, vaá ò gbóó aalai nakà bíbví:

• Éé ní ea náa vaá Jìhóvà à gbĩ́ kọọ̀ pá a kóò á nyaaná ba sĩ́deè tõò dùm ẽ?

 6. Gbò nú e Jìhóvà ólò naa ge nvèèmà bá nè pá a kóò

 NÚ E NI NÓ

Jìhóvà gbĩ́ gè dú o Kóò, vaá àé nveè bá nè ni kọ ó láá tõonìè bãèé ló.

Ge Òòa Boo

• Mósĩ́ deè ní e Jìhóvà ólò nvèè bá nè pá a kóò e?

• Éé ní ea náa vaá Jìhóvà à kọ́ nè pá a kóò kọ bàá nyaaná ba sĩ́deè tõò dùm ẽ?

• É kọ ò bulà kọọ̀ gbò nú e Jìhóva kọ́ pá a kóò á naa palàge tàvàlà? Be ò náà ẽei àbèè ẽ́èe, ló éé?