Zehova kaa bɔ ə́ gɔlɔn gbɔ a neelee. Lə mɛni ɓa ? Maahɔlɔɓo a kɛ gaai yɛ kɛ ma duwɔ pələɠaa, pələi a nua hon na, yii gaa bɔ nua maamɛni ɓa, ə́ kaa lɔ kɛi mɛniɠaa tii kɔlɔn ɉii ŋɔ ɓəlannaa wɛli yɛ too yɛ́. Ə́ laana kpɔ a neelee yɛ́ ma ya pɛli ə́ kɛ a Yálá məlanmun ? (Ɉakə 2:23 ɓo). Ya kɛ bɔ ə́ kɛ a Yálá məlanmun lə ɓə maanɛɛ ə́ gɛ ? Biblə a gɛɛmaalənŋaa tii mukulɔ ə lɛɛ a ɉukulɔ guɔ yɛ ma nu ya kɛ a Yálá məlanmun yili kpɔ ɓə nɛlɛɛ dɛɛ mɛni kəlee ɓa.

1. Lə ɓə Zehova kaa kɛi yɛ́ ə́ gɛ ?

“ Ka ka maalɛɠɛ Yálá ɓa, a maalɛɠɛ kaa ” (Ɉakə 4:8). Vɛlisɛɛ ŋɛi mukulaa ɓaa lə ? Zehova kaa bɔ ə́ kɛ a məlanmun, a kɛ nutaɠaa di wɔ kili ɓa di hwa pɛli kɛi a Yálá məlanmun maahɔlɔɓo gu hwa Yálá kaa. Mɛniɠaa kpɔ gu maakpaan gaa ma yɛ hwilɛn na Zehova túwɔ́ pələɠaa ɓa, Zehova a gəlee lɛ guɔ Nawoo hu yii yaan gu gu maalɛɠɛ ma. Ɉɛɓɛi ŋɛi Yálá ə dɛɛ nukanŋaa pɔ yai a Biblə gwa lɛɛ lɔ ma guɔ mo, gwa Zehova ni gu wɔ ɓəlannaa hu kaa pai kɛnɛi pələi ma gu ho ta gaa li la.

2. Ya kɛ a Zehova məlanmun lə mɛni ɓa ɓəlannaa ta ho laa nɛlɛɛ dɛɛ yili ɓa ?

Pələi Zehova a ə́ wɛlilakɛ lai nu lɔpee ta ho laa yii a ə́ wɛlilakɛ tii. Gaa bɔ ə́ kɛ kwəinɛɛ hu ə lɛɛ ə́ kpɔnmaa hu hwɛli ma ɓɛlowai lɔpee ə́ maakpaan a kɛ la ma. Ya pɛli ‘ ə́ ə́ kpaan mɛniɠaa kəlee laa niila gbala ə tɔɔ a ə́ maakpaan gbɛɛ ’ (Piɛrə dɔlɔɔ 5:7). Zehova kɛ pələ pɛliɛi a lowai lɔpee gəlee ə kpɔnmaa tɛɛ məlaa pɔ ə di hwaŋalɔ ə lɛɛ yɛ nwəlitɔɔ diɛ (Maatɛnɛ 94:​18, 19 ɓo).

3. Lə ɓə maanɛɛ gu gɛ guɔ pɛli kɛi a Zehova məlan ?

Nu kəlee wɛli kaa Zehova ɓa, “ kəlaa a gwəi mɛni lɛ nua da ɲɔu ma diɛ ” (Maatɛnɛ 25:​14). Gwa kɛ bɔ gu kɛ a Zehova məlanmun maanɛɛ gu gu ɲaawala mɛniɠaa nwɛli ho ma gu nɛɛlaa, yiiɠaai nwɛli kaa ma gu gɛ. A kɛ nutaɠaa di wɔ kili ɓa mɛniɠaa kpɔ Zehova a kɛ guɔ gu gɛ di hwa pɛli gəlee kɛi, ə lɛɛ yiiɠaa a kɛ guɔ gu nɛɛlaa di hwa pɛli gəlee lɛɛ laa. Kɛlɛɛ, Zehova ə gu lii hu mɛniɠaa kəlee kɔlɔn. Ə lɛɛ nua kpɔ da di sə-mɛni kəlee kɛ diɛ nwɛlilakɛ a ɲee hee di mu ə di kɛ a məlaa. (Maatɛnɛ 147:11 ; Gɛlaɠaa 10:34, 35).

 Ə́ WƆ MƐNI KƆLƆNŊAA TA PƐLƐ MA

4. Abrahamə ə kɛ a Zehova məlanmun

Da kɛ ma nu ə kɛ a Yálá məlan Abrahamə (yaai nwɔnɔ da kɛ ma Abramə) ŋɔ pɔlɔkiliinŋaa a kpɔnmaa tɛɛ gu pɔ guɔ pɛli yili ɲaakaai a neelee. Abrahamə maamɛni ɓo Gɔwɔtɔɔi 12:1-4, ə lɛɛ ka lono kɛ gɛɛmaalənŋaa ŋɛi mɛi :

• Lə ɓə Zehova ə mo Abrahamə ɓa yii yaan ə gɛ ?

• Lə ɓə Zehova ə naakwəlamo ma ?

• Lə ɓə Abrahamə ə gɛ ?

5. Yii Zehova kaa bɔ məlaa diɛ gɛ

Mɛniɠaa kaa laa gwa kɛ bɔ gu ɓəlaa diɛ gɛ guɔ.

• Mɛni ləkɛɛɠaa ɓə ə́ kaa bɔ ə́ ɓəlaa diɛ gɛ yɛ́ ?

Ɉaan dɔlɔɔ 5:3 ɓo, ə lɛɛ ka lono kɛ gɛɛmaalən ŋɛi mɛi :

• Lə ɓə Zehova kaa bɔ məlaa diɛ gɛ ?

Maanɛɛ kiɛ gu gu tuwɔ pələɠaa taɠaa maahwalən awala kɛtii gu hiɛ pələɠaa, yii yaan gu pɛli lɛɛi Zehova woo mu. Esai 48:​17, 18 ɓo, ə lɛɛ ka lono kɛ gɛɛmaalən ŋɛi mɛi :

• Lə mɛni ɓa Zehova a kɛ məlaa diɛ di di túwɔ́ pələ maahwalən ?

 6. Kpɔnmaai Zehova a dɛɛ məlaa pɔ

 YII GU GALAN

Zehova kaa bɔ ə́ kɛ a məlanmun, ə lɛɛ gaa pai kpɔnmaa tɛɛ ə́ pɔ ə́ ə́ maalɛɠɛ ma.

Nɛɛ ə́ kili pɔ

• Zehova a kpɔnmaa tɛɛ ləi məlaa pɔ ?

• Lə mɛni ɓa Zehova a kɛ məlaa diɛ di di túwɔ́ pələ maahwalən ?

• Ə́ wɔ kili ɓa gɛ laa walaa kpɔ kɛnɛ gu kɛ a Zehova məlanmun ? Lə mɛni ɓa ə́ kaa kɛi ma ee, awala kɛtii kpaa ?