LEKSIÓN 08
Ikatu oiko ndehegui Jehová amígo
Jehová ningo oipotaiterei reikuaa porã chupe, ¿mbaʼérepa? Pórke amáske reikuaa umi kualida porã haʼe orekóva, mbaʼéichapa ñandetrata ha umi mbaʼe porãite haʼe opreparáva ndéve g̃uarã, katuete reipotáta oiko chugui ne amígo. Péro, ¿ikatúpa añete rehupyty upéva? (Elee Salmo 25:14). ¿Mbaʼépa ikatu rejapo oiko hag̃ua ndehegui Ñandejára amígo? La Biblia omombeʼu ñandéve upéva ha oexplika avei mbaʼérepa iñimportantete oiko ñandehegui Ñandejára amígo, upéva haʼe voi pe amista iporãvéva ikatúva reguereko.
1. Jehová oipotaiterei oiko ndehegui iñamígo
Santiago 4:8 heʼi: “Peñemoag̃uíkena Ñandejárare, ha haʼe oñemoag̃uíta penderehe”. Koʼápe Jehová voi ojerure ndéve reñemoag̃ui hag̃ua hese, térã oiko hag̃ua ndehegui iñamígo. Oĩ heʼíva ndaikatuiha oiko ñandehegui Ñandejára amígo pórke ndajahechái chupe, péro la Bíbliape Jehová omombeʼupaite ñandéve umi mbaʼe tekotevẽva jaikuaa ñañemoag̃ui hag̃ua hese. Jalee vove Jehová heʼíva ñandéve la Biblia rupive ñane amista hendive imbaretevéta, ndajahecháiramo jepe chupe.
2. ¿Mbaʼérepa jaʼekuaa Jehová haʼeha pe mehór amígo ikatúva ereko?
Jehová ningo nderayhueterei, ndaipóri ótra persóna nderayhuve vaʼerã chugui. Haʼe oipota nde revyʼa ha remombeʼu chupe reikotevẽ jave ajúda. Nde ikatu ‘remoĩ ipópe entéro mbaʼe nekevrantáva, pórke haʼe ojepyʼapy nderehe’ (1 Pedro 5:7, nóta). Jehová siémpre oĩ preparádo oapoja, okonsola ha ohendu hag̃ua iñamigokuérape (elee Salmo 94:18, 19).
3. ¿Mbaʼépa Jehová oipota jajapo oiko hag̃ua ñandehegui iñamígo?
Jehová ningo ohayhu enterovépe, “péro umi ihústova iñamigoite hína” (Proverbios 3:32). Haʼe oipota iñamigokuéra ojapo umi mbaʼe haʼe heʼíva oĩ porãha, ha omboykete umi mbaʼe haʼe heʼíva oĩ vaiha. Oĩ opensáva núnka ndaikatumoʼãiha ojapo opa mbaʼe Jehová ojerurehaichaite, péro ndahaʼéi upéicha, pórke Jehová ñanentende porãiterei káda únope. Haʼe oasepta entéro umi ohayhúvape chupe ipyʼaite guive ha oñehaʼãmbaitévape ojapo haʼe oguerohorýva (Salmo 147:11; Hechos 10:34, 35).
EJEPYʼAMONGETAMÍNA
Jahechamína mbaʼe mbaʼépa ikatu rejapove oiko hag̃ua ndehegui Jehová amígo ha mbaʼérepa jaʼekuaa Jehová haʼeha pe mehór amígo ikatúva ereko.
4. Abrahán haʼe vaʼekue Jehová amigoite
Pe rreláto omombeʼúva Abrahán istória (oñehenóiva avei Abrán), ñanepytyvõ ñantende hag̃ua mbaʼépa jajapo vaʼerã oiko hag̃ua ñandehegui Ñandejára amígo. Elee mbaʼépa la Biblia heʼi Abrahán rehe Génesis 12:1-4-pe. Upéi erresponde koʼã porandu:
-
¿Mbaʼépa ojerure raʼe Jehová Abrahánpe ojapo hag̃ua?
-
¿Mbaʼépa Jehová opromete chupe?
-
¿Mbaʼépa ojapo Abrahán?
5. ¿Mbaʼépa Jehová ohaʼarõ iñamigokuéragui?
Entéro ningo ñahaʼarõ jepi álgo ñane amigokuéragui.
-
¿Mbaʼépa nde rehaʼarõ ne amigokuéra ojapo nderehehápe?
Elee 1 Juan 5:3, ha upéi erresponde ko porandu:
-
Según pe téxto, ¿mbaʼépa Jehová ohaʼarõ iñamigokuéragui?
Ikatu hag̃uáicha ñaneñeʼẽrendu Jehovápe sapyʼánte tekotevẽta ñakambia ñande lája ha avei mbaʼéichapa ñañekomporta. Elee Isaías 48:17, 18, ha upéi erresponde ko porandu:
-
¿Mbaʼérepa Jehová oipota iñamigokuéra okambia tekotevẽramo?
Peteĩ amígo ñanderayhúva ñanemomanduʼa umi mbaʼe ideprovéchotava ñandéve ani hag̃ua jajeperhudika, Jehová upeichaite avei ojapo
6. ¿Mbaʼéichapa Jehová oipytyvõ iñamigokuérape?
Jehová katuete oipytyvõ iñamigokuérape ombohovái hag̃ua iprovlemakuéra. Ehecha pe VIDÉO, ha upéi erresponde ko porandu:
-
¿Mbaʼéichapa Jehová oipytyvõ pe kuñataĩme ovyʼa jey hag̃ua ha ogueropuʼaka hag̃ua umi tráuma oreko vaʼekue imitãme?
Elee Isaías 41:10, 13, ha upéi erresponde koʼã porandu:
-
¿Mbaʼépa Jehová opromete ojapotaha iñamigokuéra rehehápe?
-
¿Mbaʼeichagua amígopa nde ere haʼeha Jehová? ¿Mbaʼérepa repensa upéicha?
Umi amígo ikalidáva siémpre ñanepytyvõ ñaikotevẽ jave, Jehová avei katuete nepytyvõta
7. Oiko hag̃ua ñandehegui Jehová amígo tekotevẽ ñañekomunika meme hendive
Peteĩ persónagui oiko hag̃ua ñane amigoite tekotevẽ siémpre ñañemongeta hendive. Elee Salmo 86:6, 11, ha upéi erresponde koʼã porandu:
-
¿Mbaʼéichapa ikatu ñañeʼẽ Jehovándi?
-
¿Mbaʼéichapa Jehová oñeʼẽ ñandéve?
Ñande ñañeʼẽ Jehovándi ñañemboʼe jave chupe, ha haʼe oñeʼẽ ñandéve la Biblia rupive
OĨRAMO HEʼÍVA: “Mbaʼe piko oikóta ñandehegui Ñandejára amígo, no kréo la ikatúne upéva”.
-
¿Mbaʼe téxtopa reipurúne rehechauka hag̃ua ikatuha oiko ñandehegui Jehová amígo?
RRESÚMEN
Jehová oipota oiko ndehegui iñamígo, ha haʼe voi nepytyvõta reñemoag̃ui hag̃ua hese.
Rrepáso
-
¿Mbaʼéichapa Jehová oipytyvõ iñamigokuérape?
-
¿Mbaʼérepa Jehová ojerure jepi iñamigokuérape okambia hag̃ua tekotevẽramo?
-
¿Ndépa ere Jehová iñexihentetereimaha iñamigokuérandi? ¿Mbaʼérepa repensa upéicha?
EINVESTIGA HAG̃UA
¿Mbaʼe iporãvapa rehupytýta oikóramo ndehegui Jehová amígo?
“Eikuaáramo Jehovápe ni mbaʼevéicharõ nerembyasymoʼãi” (La Atalaya 15 de febrero de 2003)
Eaprende mbaʼéichapa ikatu remombareteve ne amista Ñandejárandi.
Ehecha mbaʼéichapa Jehová amista tuichaiterei oipytyvõ peteĩ kuñakaraípe.
Ehecha mbaʼéichapa oñeñandu umi mitãrusu ha mitãkuña haʼéva Jehová amígo.