ZASEŊƆ 08

Ho Wan Ta’an Dɛna Yehowa Zɔ

ŊMƐ

Yehowa boti ho baŋɛ en mɛ soŋa soŋa. Beni n sɔi? A boti la ho zamesɛ baŋɛ eŋa n de nɛresɛka taaba, a sarɔtɔ la a puti’irɛ, bala wan soŋɛ hɔ ti ho ta’an dɛna a zɔ. Ho wan ta’an dɛna Naayinɛ zɔ? (Kaalɛ Yooma 25:14.) Bem ti la nara ti ho eŋɛ ta’an dɛna Naayinɛ zɔ? Baabule la lebese sokere ana wa mɛ ge basɛ ti to baŋɛ sɛla n sɔi ti ho san dɛna Yehowa zɔ, la dela sɛla n gani za’a.

1. Yehowa boti ho eŋɛ la bem?

“Vurege ya du Naayinɛ ge a me wan vurege du ya.” (Yames 4:8) Bala pa’alɛ la bem? Yehowa beem ho ti ho dɛna a zɔ. Nɛreba basɛba ti’isɛ ti la kpe’em mɛ ti ba ta’an dɛna Naayinɛ zɔ se’ere n sɔi la, ba kan ta’an nyɛ en. Ge Baabule la poan, Yehowa pa’alɛ to la eŋa n de nɛresɛka taaba, la wan eŋɛ se’em ti to ta’an vurege lɛm en. To san kaala Naayinɛ yetɔɣum la, tomam la Yehowa zɔtɔ nyɔka la wan kpe’em hali la to puɣum ka tabelɛ nyɛ en la.

2. Beni n sɔi ti Yehowa dɛna Zɔsonkɔ n gani za’a?

Nɛra ka boi n nɔŋɛ hɔ gana Yehowa. Yele san paɛ hɔ, a boti la ho yele en ti a soŋɛ hɔ ti ho tara pupeelum. Ho wan ta’an “dekɛ ho putɛyiila bo en, se’ere n sɔi la a fabeli ho yele mɛ.” (1 Peter 5:7) Yehowa kɔ’ɔn nɔŋɛ la a kɛlesa, soŋera ge buɣela a zɔdoma sunya.—Kaalɛ Yooma 94:18, 19.

3. Yehowa boti a zɔdoma ita la bem?

Yehowa nɔŋɛ nɛra woo mɛ “ge a tari la bɔnsoŋa la tontɔɔdoma la.” (Magaha 3:32) Yehowa boti la a zɔdoma tiregɛ ita sɛla n ani soŋa ge basɛ tuunbe’ero. Nɛreba basɛba ti’isɛ ti bamam kan malum ta’an tuna Yehowa n yeti ba tuna som ge basɛ be’em la. Yehowa tari bɔkerɛ mɛ. Nɛra se’em woo n nɔŋɛ En ge tiregɛ ita sɛla ti A bɔta la, A puurɛ pee me la en.—Yooma 147:11; Tooma 10:34, 35.

VIISƐ PA’ASƐ

Zamesɛ baŋɛ hon wan eŋɛ se’em ta’an dɛna Yehowa zɔ ge baŋɛ sɛla n sɔi ti a dɛna Zɔsonkɔ n gani za’a.

4. Abraham yuun dela Yehowa zɔ

Baabule la n tɔɣɛ Abraham (mina ti ba yuun yi’ira Abram la) yele se’em la soŋɛ tɔ ti to bɔkɛ la vuurɛ n de se’em ti ho dɛna Naayinɛ zɔ. Kaalɛ Abraham yele n boi Pin’ileŋɔ 12:1-4 ge nyaa sɔsɛ sokere ana wa:

Yehowa yuun yele Abraham ti a eŋɛ la bem?
Yehowa yuun biŋe nɔɔrɛ ti a eŋɛ la bem bo en?
Abraham yuun nam Yehowa nɔɔrɛ la wani?

5. Yehowa n boti a zɔdoma ita sɛla

To ni ɛɛra la yɛla ase’a to zɔdoma zɛ’an.

Bem yɛla ti hon bɔta ti ho zɔdoma eŋɛ bo ho?

Kaalɛ 1 Yon 5:3 ge nyaa sɔsɛ sokere wa:

Yehowa boti a zɔdoma ita la bem?

To san bɔta ti to nana Yehowa, la nari ti to tee to sareŋɔ la to hala. Kaalɛ Isaiah 48:17, 18 ge nyaa sɔsɛ sokere wa:

Beni n sɔi ti Yehowa bɔta ti a zɔdoma tee ba vom?

Zɔsonkɔ ni pa’alɛ to la yelese’a n wan ta’an te’ele to ge soŋɛ tɔ. Yehowa iti la bala mea nɔɔ bɔ’ɔra a zɔdoma

6. Yehowa n iti sɛla bɔ’ɔra a zɔdoma

Yehowa soŋeri a zɔdoma mɛ ti ba maala ba yɛla. Ŋmɛ VIDIYO la ge nyaa sɔsɛ sokere wa:

VIDIYO: Yehowa Soŋɛ Mam Mɛ Zo’e Zo’e (3:20)

Vidiyo la poan, Yehowa soŋɛ pɔka la, la wani ti a ta’an basɛ a putɛyooro la ge maalɛ a yeledaaŋɔ la?

Kaalɛ Isaiah 41:10, 13 ge nyaa sɔsɛ sokere ana wa:

Yehowa biŋe nɔɔrɛ ti a eŋɛ la bem bo a zɔdoma?
Hon ti’isɛ ti Yehowa wan ta’an dɛna ho Zɔsonkɔ? Bem zuo?

Zɔsonkɔ ni soŋɛ ho mɛ se’em ma’a ti yele paɛ hɔ. Yehowa me wan soŋɛ hɔ

7. Ho san dɛna Yehowa zɔ, la dela ho sɔsera la en

Sɔsega n basɛ ti zɔtɔ nyɔka tara paŋa. Kaalɛ Yooma 86:6, 11 ge nyaa sɔsɛ sokere ana wa:

To wan eŋɛ la wani ta’an sɔsɛ la Yehowa?
Yehowa iti la wani sɔsera la tɔ?

Tomam doli la zusega poan tɔɣera bɔ’ɔra Yehowa; ti eŋa me dɔla Baabule la poan tɔɣera bɔ’ɔra tɔ

NƐREBA BASƐBA YETI: “La kan ta’an eŋɛ ti ho vurege lɛm Naayinɛ.”

Baabule la bɛ bɔba ti hon wan dekɛ pa’alɛ ti to wan ta’an dɛna Yehowa zɔ?

YELEKPINE

Yehowa boti la a dɛna ho Zɔ ge me wan soŋɛ hɔ ti ho vurege lɛm en.

Tiisegɔ Sokere

Yehowa soŋeri a zɔdoma la wani?
Beni n sɔi ti Yehowa kã’ana a zɔdoma ti ba tee ba vom?
Hon ti’isɛ ti la wan kpe’em bo ho ti ho ta’an dɛna Yehowa zɔ? Bem zuo bii bem zuo ti la daɣɛ bala?

To zamesɛ ba’asɛ la:

Mam Boti N Eŋɛ Sɛla

Dekɛ hon zamesɛ sɛla Yehowa zɛ’an la pa’alɛ ho zɔdoma.

Ase’a:

Your other goal

Ɛ BISƐ

Ho san dɛna Naayinɛ zɔ la wan ta’an tee ho vom la wani?

“Yehowa Dela Naayinɛ N Nari Ti To Mina” (The Watchtower, February 15, 2003)

Zamesɛ baŋɛ hon wan ta’an eŋɛ se’em nyɔɣɛ Naayinɛ zɔtɔ.

“Mam Wan Eŋɛ La Wani Ta’an Dɛna Naayinɛ Zɔ?” (Sokese’a Ti Bunbilipaalesi Sɔkera La Lebesego Se’a N Soŋeri Ba, Gɔŋɔ 2, a zuo 35)

Zamesɛ baŋɛ sɛla n sɔi ti pɔka ayima ti’isɛ ti, eŋa n nyɔɣɛ zɔtɔ la Yehowa la n basɛ ti a vom ana soŋa.

“Mam Daa Ka Boti N Ki!” (The Watchtower No. 1 2017)

Bisɛ bunbilipaalesi n tɔɣɛ pa’alɛ bamam n ti’isɛ Yehowa yele se’em.

Ho Dɛna Naayinɛ Zɔ Vuurɛ? (1:46)

Ho Me Ta'an Bɔta Yele Ana

SOKESE’A TI NƐREBA SƆKERA

Bem Baabule Zamesegɔ N Bala Ti Yehowa Sɛɛradoma Ita La Nɛreba?

Hon la Yehowa Sɛɛradoma san zamesa Baabule la, ho ta’an tara homea Baabule la kaala, zamesegɔ la poan. Ho ta’an yele ho yire nɛreba za’a la ho zɔdoma ti ba laɣum kelese zamesegɔ la.

TARA VOM SOMƆ DAAREWOO!—BAABULE ZAMESEGƆ N WAN SOŊƐ HƆ