Jehová pɨreuyehɨwá matsi waɨkawa pemeitimamatekeni. ¿Títakɨ? Kepaitsɨ́ Yuútsi katineuyehɨaká matsi waɨká pemekumaiká —kemɨtiukaʼiyaari, kemɨtikuyuruwa metá ʼuxaʼá warié kemɨtiyurieni—mɨpaɨ matsi hamikuya peheuyeimɨtɨ pepayeiwé. ¿Mɨɨtá yeme tiyɨwe Yuútsi hamikuya pemayaní? (Nakaterɨwa Salmo 25:14). ¿ʼEkɨtá kepetiuyuriwe hamikuya pemayanikɨ? Biblia ʼikɨ ʼiwaurikate pɨkuʼeiya metá yapɨtarahɨawe titakɨ kwinié mɨrayeʼaxé Jehová pemɨhamikutani.

1. ¿Jehová kemetikuʼiniwa hamikuya pemɨhɨɨkɨtɨnikɨ?

«Hurawa xekeneyekɨni Yuútsi hetsɨa metá mɨkɨ xehetsɨa hurawa pɨyeyani» (Santiago 4:8). ¿Ketɨtɨ haitɨ paine? Jehová pɨʼatsiʼinié hamikuya pemɨhɨɨkɨtɨnikɨ. Hiipatɨ meputiyuane kenaame keane memɨkaʼixeiyawawe hamikumama memakɨɨné mekayɨwawe, matsi xɨka hɨɨkɨtɨni Yuútsi. Mɨɨtá mɨkɨ pɨtatiukuhayewi yuniuki Bibliatsíe, mana naime tepɨteʼukaxexeiya kemɨtiukaʼiyaari metá ʼauriena hurawa ketemɨteyekɨniwawe. Kepauka Yuútsi niukieya temakaterɨwa taheetsíe mieme kemɨreukuʼuxa, matsi waɨkawa hamikumama tepakɨká tseepá temɨkaʼixeiyawawe.

2. ¿Títakɨ teteʼutiyɨwe kenaame xewitɨ hamiku kaʼuyeika Jehová hepaɨ tiukaʼiyaaritɨ?

Jehová waɨká pɨʼatsinakeʼerie. Mɨkɨ pɨreuyehɨwá ʼekɨ pemɨʼatemawieka metá pareewiya pemitawawiriwani kepauka pemeiyehɨakatsíe. Mɨkɨ paine: «Naime yuhɨawerikate heetsiena xeketeneuxɨrɨwani» kepaitsɨ́ mɨkɨ ʼakɨmana peuyuʼiyaaritɨa (1 Pedro 5:7). Jehová pɨtaʼikwewa wareupareewimɨtɨ, wareunɨtɨamɨtɨ metá yuhamikuma wareuʼeniemɨtɨ (nakaterɨwa Salmo 94:18, 19).

3. ¿Jehová tita titakwewie yuhamikuma waheetsíe?

Jehová meyunaime teuteri pɨwanakiʼerie, mɨɨtá «keane ʼaixɨ memɨteʼuʼiyaari kaniwanakeʼerieka matsi waɨkawa» (Proverbios 3:32). Jehová pɨreuyehɨwá hamikumama ʼaixɨ memɨtekuyuruwani mɨkɨ mɨreuyehɨwá hepaɨ metá haxa memɨkatekuyuruwanikɨ. Hiipatɨ mepɨteʼuʼeriwe kenaame mekaʼuyɨwekaxɨawe memɨteʼayeʼatɨwani Jehová tita mɨtiwawatsíe. Mɨɨtá mɨkɨ yeme pɨwaretiʼenietɨyeika pɨwaranunanake meyunaime keane meminakiʼerie metá memɨyuwaɨriya ʼaixɨ meteheiʼeritɨakutɨ (Salmo [Nɨawari] 147:11; Hechos 10:34, 35).

 MATSI WAƗKÁ TINETIMAʼÍ

4. Abrahán Jehová hamikuya pɨhɨɨtɨkai

Bibliatsíe kemɨtikuxaxaatsiwa Abrahán (tsiere pɨtiuterɨwarɨwakai Abrán) pɨtatikuhekɨatsitɨwa tita mɨranuyɨne Yuútsi hamikuya mɨhɨɨkɨtɨni. Xetenakaterɨwa Abrahán heetsíe Génesis 12:1-4 metá xeteneutixaata ʼikɨtsíe:

• ¿Jehová tita tiutawawiri Abrahán?

• ¿Jehová ketitahɨawixɨ tita tiyetuirienikekai?

• ¿Ketiuyuri Abrahán, Jehová mitanɨʼatsíe?

5. Jehová tita mɨtiwakuwawiriwa yuhamikuma

Tahamikuma waheetsíe ʼaixɨ tiʼaneneeme tepɨtekwewie.

• ¿ʼEkɨ tita petikwewie ʼahamikuma waheetsíe?

Xenakaterɨwa 1 Juan 5:3 metá xeteneutixaata ʼikɨtsíe:

• ¿Jehová tita tikwewie yuhamikuma waheetsíe?

Jehová temeuʼeniekakɨ peuyewetsé temɨyukuwapani ketemɨʼitɨtɨatsíe metá ketemɨteʼuʼiyaaritsíe. Xenaketerɨwa Isaías 48:17, 18 metá xeteneutixaata ʼikɨtsíe:

• ¿Títakɨ Jehová yuhamikuma tiwakɨhɨawe memɨyukuwapani?

 6. Jehová kemɨtikuyuruwa yuhamikuma waheetsíe

 TITA PEMƗRETIMÁ

Jehová ʼahamiku peuyeimɨkɨ metá pɨʼatsipareewieni ʼauriena hurawa pemayaanikɨ.

Mɨrayeʼerieni

• ¿Ketiwakupareewiwa Jehová yuhamikuma?

• ¿Títakɨ Jehová yuhamikuma tiwakuwawiriwa memɨyukuwapani?

• ¿ʼAumɨ́ Jehová waɨkawa tikwewie yuhamikuma waheetsíe? ¿Títakɨ yapetikuʼeriwa?