Gusto ni Jehova nga makilala mo pa gid sia. Ngaa? Kay kon mabal-an mo ang iya mga kinaiya, mga ginhimo, kag katuyuan, mas gusto mo pa gid nga mangin abyan sia. Puede gid bala nga mangin abyan ka sang Dios? (Basaha ang Salmo 25:14.) Ano ang himuon mo para mangin abyan ka niya? Ginasabat sang Biblia ini nga mga pamangkot kag ginapakita sini kon ngaa sa tanan nga puede mo mangin abyan, si Jehova ang pinakamaayo.

1. Ano ang pangagda ni Jehova sa imo?

“Magpalapit kamo sa Dios, kag magapalapit sia sa inyo.” (Santiago 4:8) Ano ang buot silingon sini? Ginaagda ka ni Jehova nga mangin abyan niya. Para sa iban, mabudlay mangin abyan ang Dios kay indi sia makita. Pero sa iya Pulong, ang Biblia, ginasugid ni Jehova ang tanan nga dapat naton mahibaluan para mangin malapit kita sa iya. Kon basahon naton ang Biblia, mangin abyan naton si Jehova bisan indi naton sia makita.

2. Sa tanan nga puede mo mangin abyan, ngaa si Jehova ang pinakamaayo?

Wala na sing makalabaw sa pagpalangga ni Jehova sa imo. Gusto niya nga mangin malipayon ka kag mangamuyo ka sa iya kon kinahanglan mo sang bulig. Puede mo ‘itugyan sa iya ang tanan mo nga kabalaka, kay nagaulikid sia sa imo.’ (1 Pedro 5:7) Si Jehova handa gid nga magbulig, magpaumpaw, kag magpamati sa iya mga abyan.—Basaha ang Salmo 94:18, 19.

3. Ano ang dapat mo himuon para mangin abyan ka ni Jehova?

Palangga ni Jehova ang tanan nga tawo, pero “nagapakig-abyan Sia sing suod sa mga matarong.” (Hulubaton 3:32) Gusto ni Jehova nga himuon sang iya mga abyan ang ginasiling niya nga maayo kag likawan ang ginasiling niya nga malain. Ang iban nagasiling nga indi nila matuman ang tanan nga sugo ni Jehova. Pero naintiendihan kita ni Jehova. Kag ginabaton niya ang tanan nga nagapalangga gid sa iya kag nagatinguha nga sundon sia.—Salmo 147:11; Binuhatan 10:34, 35.

 USISAA PA GID

4. Si Abraham abyan ni Jehova

Ang rekord sang Biblia parte kay Abraham (nga gintawag man Abram) nagahatag sa aton sing ideya kon paano mangin abyan sang Dios. Basaha ang parte kay Abraham sa Genesis 12:1-4. Dayon binagbinaga ini nga mga pamangkot:

• Ano ang ginpahimo ni Jehova kay Abraham?

• Ano ang ginpromisa ni Jehova sa iya?

• Gintuman bala ni Abraham si Jehova?

5. Ang gusto ni Jehova nga himuon sang iya mga abyan

May ginapaabot kita nga himuon sang aton mga abyan.

• Ano ang pila ka butang nga ginapaabot mo nga himuon sang imo mga abyan sa imo?

Basaha ang 1 Juan 5:3, dayon binagbinaga ini nga pamangkot:

• Ano ang gusto ni Jehova nga himuon sang iya mga abyan?

Para matuman naton si Jehova, mahimo kinahanglan naton bag-uhon ang aton mga batasan. Basaha ang Isaias 48:17, 18, dayon binagbinaga ini nga pamangkot:

• Ngaa gusto ni Jehova nga maghimo sing mga pagbag-o ang iya mga abyan?

 6. Ang ginahimo ni Jehova para sa iya mga abyan

 SUMARYO

Gusto ni Jehova nga mangin Abyan ka niya, kag buligan ka niya nga mangin malapit sa iya.

Rebyu

• Paano ginabuligan ni Jehova ang iya mga abyan?

• Ngaa ginasilingan ni Jehova ang iya mga abyan nga maghimo sing mga pagbag-o?

• Sa banta mo, mabudlay bala nga himuon ang ginapaabot ni Jehova sa iya mga abyan? Ngaa?