Iehova ia ura ia do oi diba namonamo. Dahaka dainai? Ia ura iena kara, iena dala bona ia karaia gaudia oi dibaia, unai amo do oi ura ia oi tura henia. Dirava oi tura henia diba, a? (Salamo 25:14 duahia.) Dahaka oi karaia diba iena turana ai oi lao totona? Baibel ese unai henanadai ia haerelaia, bona do ia hahedinaraia Iehova oi tura henia karana be mai anina bada.

1. Iehova ese oi ia boiria dahaka oi karaia totona?

“Dirava kahirakahira umui lao, bona ia be umui kahirakahira do ia mai.” (Iamesi 4:8) Unai ena anina be dahaka? Iehova ese oi ia boiria iena turana ai oi lao totona. Haida idia laloa Dirava idia tura henia be auka, badina ia idia itaia diba lasi. To Iehova ese ena Hereva, Baibel amo iena kara idauidau ia hahedinaraia, bona unai ita dibaia neganai, ia kahirakahira ita lao diba. Dirava ena hereva be ita sibona ese ita duahia neganai, iseda hetura karana Iehova ida ia goada ia lao, ena be ia ita itaia lasi.

2. Dahaka dainai Iehova be emu Tura namona?

Iehova sibona be oi ia lalokau henia bada. Ia ura do oi moale bona heduru totona ia dekenai oi lao diba. “Emui lalohekwarahi ibounai be ia dekenai umui negea lao, badina ia be umui ia laloa bada.” (1 Petero 5:7) Iehova be ia noho hegaegae iena turadia do ia durua, hagoadaia bona kamonai henidia totona.​—Salamo 94:18, 19 duahia.

3. Iehova ia ura iena turadia be dahaka do idia karaia?

Iehova be taunimanima ibounai ia lalokau henia, “to kara maoromaoro tauna be Dirava ena turana namona.” (Aonega Herevadia 3:32) Iehova ia ura iena turadia ese gau namodia idia karaia, bona gau dikadia do idia dadaraia. Haida idia laloa idia be Iehova ena taravatu namo bona dika dekenai idia badinaia be auka. To Iehova be hebogahisi Diravana. Ia idia lalokau henia momokani bona idia hekwarahi ia idia hamoalea taudia ibounai ia abia dae.​—Salamo 147:11; Kara 10:​34, 35.

 DIBA MA HAIDA ABIA

4. Aberahamo be Iehova ena turana

Baibel lalonai Aberahamo (ladana ma ta be Aberamo) ena sivarai ese ita ia durua Dirava tura henia karana ena anina ita lalopararalaia totona. Genese 12:1-4 ai Aberahamo ena sivarai oi duahia. Bena inai henanadai herevalaia.

• Iehova ese Aberahamo ia noia dahaka ia karaia totona?

• Iehova ese Aberahamo dekenai dahaka ia gwauhamatalaia?

• Aberahamo be dahaka ia karaia?

5. Iehova ia ura ena turadia be dahaka do idia karaia?

Vaia ita ura iseda turadia be gau haida idia karaia.

• Oi ura emu turadia ese dahaka gaudia do idia karaia?

Ioane Ginigunana 5:3 duahia, bena inai henanadai herevalaia:

• Iehova ia ura iena turadia be dahaka do idia karaia?

Iehova ita badinaia totona, namona be iseda kara eiava mauri dalana do ita haidaua. Isaia 48:17, 18 duahia, bena inai henanadai herevalaia:

• Dahaka dainai Iehova ese ena turadia ia noia edia mauri dalana idia haidaua totona?

6. Iehova ese iena turadia totona ia karaia gaudia

 POINT BADANA

Iehova ia ura ena turana ai oi lao, bona oi do ia durua ia kahirakahira oi lao totona.

Riviu

• Edena dala ai Iehova ese iena turadia ia durua?

• Dahaka dainai Iehova ese ena turadia ia hadibaia edia mauri dalana idia haidaua totona?

• Oi laloa ia auka Iehova ena turana ai oi lao totona, a? Dahaka dainai unai bamona oi hereva?