AJUMTALÁB 08
Tatáʼ a éjtowal ka jaʼúbnaʼ a Jehová
A Jehová in léʼ abal tatáʼ ka exlaʼ jantʼiniʼ játs Jajáʼ in ey. ¿Jaleʼ? Kom Jajáʼ in exlál abal neʼets ka léʼnaʼ ka jaʼúbnaʼ tam ka éxlanchij jantʼiniʼ játs in ey ani jawaʼ in tsálpayal kin tʼajaʼ. Pero, ¿chubax i éjtowal ki jaʼúbnaʼ a Dios? (Ka ajiy Salmo 25:14). ¿Jantʼoj kwaʼal ka tʼajaʼ tatáʼ abal ka jaʼúbnaʼ? An Biblia tu tókʼtsinchal axéʼ ani tu exóbchal jaleʼ ti lej alwaʼ ki jaʼúbnaʼ a Jehová.
1. ¿Jantʼoj ti léʼnanchal a Jehová?
«Kit utat kʼwajiy kʼal a Dios ani Jajáʼ neʼets ka utat kʼwajiy kʼal tatáʼchik» (Santiago 4:8). ¿Jantʼoj tu exóbchal axéʼ xi kaw? Abal a Jehová in léʼ ti jaʼúbnaʼ. Jitakits neʼets kin uluw abal lej kʼibat ki jaʼúbnaʼ jitaʼ axi yab i tsuʼtal, ani más a Dios. Pero Jajáʼ tu olchámal ban Biblia jantʼiniʼ játs in ey abal wawáʼ ki ejtow ku utey kʼal Jajáʼ. Tam wawáʼ ki ajiy ti Biblia jantʼoj in tsálpayal a Dios nixéʼ tu tʼajál abal ki léʼnaʼ ki jaʼúbnaʼ, bélits abal yab i éjtowal ki tsuʼuw.
2. ¿Jaleʼ ti yab waʼats nibal jun i jaʼúb ejtíl a Jehová?
A Jehová játs axi más ti kʼanidhál. Jajáʼ in léʼ abal tatáʼ kit kʼwajiy kulbél ani ka konchij ti tólmiy etsʼey tam ka yéjenchij. Ka «wátʼbanchij patal an tʼeʼpintaláb axi a kwaʼal ta ichích» kom Jajáʼ in léʼ ti tólmiy (1 Pedro 5:7). A Jehová etsʼey in léʼ kin otsʼowiy, kin kanatbédhaʼ ani kin tólmiy in jaʼúbchik (ka ajiy Salmo 94:18, 19).
3. ¿Jantʼoj in konchal a Jehová kin tʼajaʼ in jaʼúbchik?
A Jehová in kʼanidhál patal an atikláb, pero «expidh in jaʼubnál jitaʼchik in tʼajál jawaʼ tekedh» (Proverbios 3:32). A Jehová in léʼ abal in jaʼúbchik kin jilaʼ kin tʼajaʼ jawaʼ kidháb ani kin tsápnanchij kin tʼajaʼ jawaʼ alwaʼ. Walám talchik kin tsalpay abal yab jaykʼiʼ neʼets kin ejtow kin tʼajaʼ patal jawaʼ a Jehová tu konchal. Pero Jajáʼ in lej tʼajál ti kwéntaj patal an tsapláb axi in tʼajál an atiklábchik kʼal axi tu kʼanidháb ani in tsápnanchal kin tʼajaʼ jawaʼ alwaʼ (Salmo 147:11; Hechos 10:34, 35).
ABAL KA EXÓBNAʼ MÁS
Ki exóbnaʼ jantʼiniʼ i éjtowal ki jaʼúbnaʼ más a Jehová ani jaleʼ ti yab waʼats kʼeʼat i jaʼúb ejtíl Jajáʼ.
4. A Abrahán in tʼajaʼ tin jaʼúb a Jehová
Jawaʼ an Biblia in ulal tin kwéntaj a Abrahán (axi jayej u bijiyábak Abrán) tu tejwamédhanchal jantʼoj kwaʼal ki tʼajaʼ abal ki bajuw ti jaʼúb a Jehová. Ka ajiychik tin kwéntaj a Abrahán ti Génesis 12:1-4 ani ka tsálpaychik kʼal axéʼ:
-
¿Jantʼoj konchat a Abrahán kʼal a Jehová kin tʼajaʼ?
-
¿Jantʼoj uchan abal neʼets kin batsʼuw?
-
¿Jantʼoj in tʼajaʼ a Abrahán?
5. Jawaʼ a Jehová in léʼ abal in jaʼúbchik kin tʼajaʼ
Patal i léʼ ki koʼoy i alwaʼ jaʼúbchik.
-
¿Jantʼoj a aychal tatáʼ abal kin tʼajaʼ a jaʼúb?
Ka ajiychik 1 Juan 5:3 ani ka tsálpaychik kʼal axéʼ:
-
¿Jantʼoj in léʼ a Jehová abal kin tʼajaʼ in jaʼúbchik?
Abal ki belkaʼ a Jehová walám neʼets ki yéjenchij ki jalkʼuy i tsalápil ani jawaʼ i tʼajál. Ka ajiychik Isaías 48:17, 18 ani ka tsálpaychik kʼal axéʼ:
-
¿Jaleʼ in konchal a Jehová in jaʼúbchik kin jalkʼuy jawaʼ in tʼajál tin ejatal?
Jun i jaʼúb axi tu kʼanidhál tu ólchal jantʼoj kwaʼal ki tʼajaʼ abal ku kʼwajiy alwaʼ. Jayetsej in tʼajál a Jehová kʼal in jáʼúbchik.
6. Jawaʼ a Jehová in tʼajál abal kin tólmiy in jaʼúbchik
A Jehová in tólmiyal in jaʼúbchik abal kin watʼenchij an kʼibataláb. Ka tsuʼuwchik an VIDEO ani ka tʼilaʼchik jawaʼ a tsuʼuw:
-
¿Jantʼiniʼ ti tolmiyámej axéʼ xi mimláb kʼal a Jehová abal yabáts kin lej yajnaʼ jawaʼ in watʼaʼ tam ti tsipilej?
Ka ajiychik Isaías 41:10, 13 ani ka tsálpaychik kʼal axéʼ:
-
¿Jantʼiniʼ in ulal a Jehová abal neʼets kin tólmiy in jaʼúbchik?
-
¿Jaleʼ a tsálpayal tatáʼ abal a Jehová pel jun i alwaʼ jaʼúb?
A jaʼúbchik axi ti kʼanidhál etsʼey neʼets ti tólmiy. A Jehová jayetsej neʼets kin tʼajaʼ abal kʼal tatáʼ.
7. Abal ki jaʼúbnaʼ a Jehová lej exbadh ki tʼilmay
Tam i tʼilmayal i jaʼúb i éjtowal ki exlaʼ más. Ka ajiychik Salmo 86:6, 11 ani ka tsálpaychik kʼal axéʼ:
-
¿Jantʼiniʼ i éjtowal ki tʼilmay a Jehová?
-
¿Jantʼiniʼ tu tʼilmayal Jajáʼ?
Wawáʼ i tʼilmayal a Jehová tam i olonchal, Jajáʼ tu tawnál kʼal an Biblia.
JAWAʼ TALCHIK IN TSÁLPAYAL: «Yab jitaʼ in éjtowal kin jaʼúbnaʼ a Dios».
-
¿Jantʼoj tam texto axi ti Biblia a éjtowal ka eyendhaʼ abal ka tejwamédhanchij jitaʼ abal i éjtowal ki jaʼúbnaʼ a Jehová?
JAWAʼ I EXOBNÁMAL
A Jehová neʼets ti tólmiy abal ka jaʼúbnaʼ.
Ki tʼilaʼ jawaʼ i exóbnaʼ
-
¿Jantʼiniʼ in tólmiyal a Jehová in jaʼúbchik?
-
¿Jaleʼ in konchal a Jehová in jaʼúbchik kin jalkʼuy jawaʼ in tʼajál tin ejatal?
-
¿A tsálpayal abal lej kʼibat jawaʼ a Jehová tu konchal? ¿Jaleʼ a tsálpayal antsanáʼ?
KA EXÓBNAʼ JANTʼOJ ÍT
¿Jantʼoj tam alwataláb neʼets ka batsʼuw max ka jaʼúbnaʼ a Dios?
«Neʼets ka lej kulbétnaʼ ka exlaʼ a Jehová» (La Atalaya, 15 de febrero de 2003)
Ka exóbnaʼ ka tʼajaʼ ta jaʼúb a Dios.
Ka exóbnaʼ jaleʼ ti jun i mimláb in ulal abal kʼaninchat in ejatal kʼal a Jehová.
Ka otsʼowiy jawaʼ talchik i tsakam in tsálpayal tin kwéntaj a Jehová.
Puede que también le interese
JAWA’ YAN I ATIKLÁB TU KONÓWIYAL
¿Jantʼiniʼ játs an exobchixtaláb axi in binál an ólchixchik kʼal a Jehová?
Kʼal an exobintaláb axi in binál an ólchixchik kʼal a Jehová, tatáʼ a éjtowal ka eyendhaʼ jawakits tam Biblia axi a kwaʼal, jayej a éjtowal ka kaniy a yanél o a jaʼúbchik ban exobintaláb ani yab kwaʼal ka jalbiy.
