Jehovah like you fo know him moa betta. How come? He hope dat da moa you learn about him, da moa you goin like be his fren. You tink you can be Jehovah’s fren, o wat? (Read um From James 2:23.) So wat you can do fo be Jehovah’s fren? Da Bible get da ansas, an it show you how come Jehovah is da bestes fren you can eva have.

1. Wat Jehovah invite you fo do?

“Come close to God, an he goin come close to you.” (From James 4:8) Dat mean Jehovah invite you fo be his fren. Some peopo believe dey no can be frenz wit God, cuz dey no can see um. But Jehovah show us in da Bible eryting we gotta know about wat kine person he stay, so we can come close to him. So even tho we no can see him, we can come tight wit Jehovah wen we read wat he tell us in da Bible.

2. How come Jehovah is da bestes fren you can eva have?

Nobody get moa love an aloha fo you den Jehovah. He like you fo be happy an ask him fo help weneva you need um. “Let God take kea all da stuffs dat bodda you guys cuz he get one big heart fo you guys.” (1 From Peter 5:7) Jehovah always stay ready fo kokua, malama, an lissen to his frenz.​—Read um Songs Fo God 94:18, 19.

3. Wat Jehovah like his frenz fo do?

Jehovah get love fo peopo, “but da peopo dat stay do wass right, dey stay his good frenz.” (Smart Guys 3:32) Jehovah like his frenz fo try do tings he tink stay good, an no do stuff he tink stay bad. Some peopo feel az too hard fo follow wat Jehovah tink is good an bad. But Jehovah, he get one big heart. He like be frenz wit erybody who love him fo real kine an do dea bes fo make him happy.​—Songs Fo God 147:11; Jesus Guys 10:34, 35.

 DIG MOA DEEP

4. Abraham was frenz wit Jehovah

Wat da Bible tell about Abraham (o Abram) show us wat mean fo be God’s fren. Read um about Abraham at Da Start 12:1-4. Den talk about dese questions:

• Wat Jehovah wen ask Abraham fo do?

• Wat Jehovah wen promise him?

• So wat Abraham wen do den?

5. Wat Jehovah ask his frenz fo do

Get tings we gotta do fo be somebody’s fren.

• Wat some tings dat you like yoa frenz do fo you?

Read um 1 From John 5:3, an den talk story about dis question:

• Wat Jehovah like his frenz fo do?

Fo lissen wat Jehovah tell, maybe us gotta change da tings we do, o da way we ack. Read um Isaiah 48:17, 18, an den talk story about dis question:

• How come Jehovah ask his frenz fo lissen wat he tell?

 6. Wat Jehovah do fo his frenz

 WAT WE WEN TALK ABOUT

Jehovah like be yoa Fren, an he goin help you come close to him.

Wat You Wen Learn

• How Jehovah help his frenz?

• How come Jehovah ask his frenz fo lissen wat he tell?

• You tink az too hard fo be Jehovah’s fren? How come?