Jehovah deka kitai semak enggau Iya. Lebuh kitai nemu agi pasal kualiti Iya, utai ti digaga Iya sereta peneka Iya, kitai deka agi nyadi pangan Iya. Tang kati nuan amat ulih nyadi pangan Iya? (Bacha Masmur 25:14.) Nama patut digaga nuan ngambika ulih nyadi pangan Iya? Bup Kudus bisi saut ngagai tanya tu. Nuan deka belajar kebuah nyadi pangan enggau Petara Jehovah nya pekara ti pemadu beguna ba pengidup nuan.

1. Jehovah mai nuan ngereja nama?

Bup Kudus madahka, ‘Datai semak ngagai Petara, lalu Iya deka datai semak ngagai kita.’ (James 4:8) Nama reti iya? Reti iya, Jehovah deka kitai semak ngagai Iya lalu nyadi pangan Iya. Tang bisi sekeda orang ngasaika nya tusah nyadi pangan Petara laban sida enda ulih meda Iya. Kebendar iya, Jehovah meri kitai Bup Kudus ngambika kitai ulih ngelala Iya. Enggau macha Bup Kudus, kitai ulih semak ngagai Iya lalu nyadi pangan Iya.

2. Nama kebuah Jehovah nya Pangan kitai ti pemadu manah?

Nadai orang ulih rinduka kitai lebih agi ari Jehovah. Iya deka nuan ngiga Iya ba maya ti senang tauka tusah. Bup Kudus madahka, “serahka semua pengirau kita ngagai Iya, laban Iya ngibun kita.” (1 Peter 5:7) Jehovah seruran sedia deka nyukung, ngelantang sereta ningaka asai ati nuan. Amat, Jehovah deka nuan idup enggau lantang ati.—Bacha Masmur 94:18, 19.

3. Nama patut digaga kitai ngambika ulih nyadi pangan Jehovah?

Taja pan Jehovah rinduka semua mensia, tang Iya milih sapa ke ulih nyadi pangan Iya. Ayat Bup Kudus madah, “Iya ngaga orang ke lurus nyadika pangan Iya.” (Jaku Dalam 3:32) Jehovah dekaka bala pangan Iya ngereja utai ti dikumbai Iya manah sereta nyeliahka diri ari utai ti jai. Tang bisi sekeda ngasaika nya amat tusah sereta ngasaika diri enda ulih ngereja nya. Kingatka meh, Jehovah bisi penyinu sereta ulih meretika kitai. Nyadi, enti kitai rinduka Iya sereta bebendar deka ngelantangka ati Iya, Iya deka nyadi pangan kitai.—Masmur 147:11; Surat Kereja Rasul 10:34, 35.

 BELAJAR MAYUH AGI

4. Abraham nya pangan Jehovah

Cherita Abraham (tauka Abram) nunjukka kitai mega ulih nyadi pangan Jehovah. Bacha pasal Abraham ba Pemungkal 12:1-4, lalu kerandauka tanya tu:

• Jehovah ngasuh Abraham ngereja nama?

• Nama semaya Jehovah ngagai Abraham?

• Kati Abraham nitihka pesan Jehovah? Terangka.

5. Jehovah dekaka pangan Iya ngereja nama?

Kitai tentu gaga ati enti bala pangan kitai ngereja utai ti dikerinduka kitai.

• Nuan rindu bala kaban nuan ngereja utai nama ke nuan?

Bacha 1 John 5:3, lalu kerandauka tanya tu:

• Jehovah dekaka bala pangan Iya ngereja nama?

Enti kitai deka ngasika Jehovah, kitai engka patut ngubah sekeda ulah tauka tebiat ti enda dikerinduka Iya. Bacha Isaiah 48:17, 18, lalu kerandauka tanya tu:

• Nama kebuah Jehovah dekaka bala pangan Iya ngaga ubah?

 6. Nama digaga Jehovah ke bala pangan Iya

 LANSA

Jehovah dekaka nuan nyadi Pangan Iya, lalu Iya deka nulung nuan semak ngagai Iya.

Ulang Kaji

• Baka ni Jehovah nulung bala pangan Iya?

• Nama kebuah Jehovah dekaka bala pangan Iya ngaga ubah?

• Ba runding nuan, kati nya tusah deka nyadi pangan Jehovah? Nama kebuah?