Ujehofa tine ku a jé ɔ lɔɔlɔhi. Ɔdiya? Ó leyice ku abɔ a yɔ i nwu ɛlā lɛyikwu ɔ tōōtɔ̄ɔ̄ a, a géē wa i jé auce o ya ku nu, ɔwɛ nɛ ó gē ya odee mla ācɛ mla aɔdā nɛ ó dɔka ō ya gā uwɔ. Ɛnyā géē ya ka ó ŋmo uwɔ unwu ō je piya ɔya ku nu. A wɛ ɔya ku Ɔwɔico ɔkwɔɔkwɛyi gla? (Jé Aíjē Kú Ɛ̄gbā 25:14.) Ɔdi nɛ a géē ya o ya ɛɛ ku a kwu piya ɔya ku nu a? Ubáyíbu cila ohi ku aɔka nyā klla mafu ɔdā nōo ya ɛɛ nɛ ō wɛ ɔya ku Ujehofa wɛ ɛma olɔhi fiyɛ duu nɛ a géē lɛ a.

1. Ɔdi nɛ Ujehofa hi uwɔ igwú ku a ya a?

“Aá túblá Ɔwɔicō, ó kē í túbla aá.” (Ujɛ́mīsi 4:8) Ɔdi wɛyi ɛlā nyā a? Ujehofa yɔ i hi uwɔ igwú ku a kwu piya ɔya ku nu. Ó gē lɔnɔ ta ācɛ ōhī ō miyɛ cɛ ka é géē wɛ ɔya ku Ɔwɔico gla, ohigbu kē má ɔ eyī ŋ. Naana a, ipu ɛlā ku nu nōo wɛ Ubáyíbu a, Ujehofa lɛ ɛjɛɛji ɔdā nɛ alɔ cika ō jé lɛyikwu uce o ya ku nu mafu lɛ alɔ o ya ɛɛ ku alɔ tubla ɔ. Eko duuma nɛ alɔ lɛ olɛhɔ ku Ɔwɔico nōo yɔ ipu Ubáyíbu a jé, ɛma ku alɔ mla anu géē lɔfu iyē naana nɛ alɔ i má ɔ jejee ɛ ŋ ma.

2. Ɔdiya nɛ Ujehofa wɛ Ɔya olɔhi fiyɛ duu nɛ a lɔfu lɛ a?

Ɔcɛ duuma i yihɔtu uwɔ fiyɛ ɛgɛ nɛ Ujehofa yihɔtu uwɔ a ŋ. Ó dɔka ku a gweeye klla gbɔɔkɔ lɛ ɔ eko duuma nɛ a cɛgbá otabɔ. A lɔfu ‘lɛ ɛjɛɛji unwalu mɛmla ɔtoplico ku uwɔ kpo ka lɛ ɔ, ohigbu kóō lɛ ɛlá wu uwɔ.’ (1 Upíta 5:7) Ujehofa le tutu eko doodu ō je otabɔ lɛ aɔya ku nu, ō ta uwa ɔtu lé klla jahɔ lɛ uwa.—Jé Aíjē Kú Ɛ̄gbā 94:18, 19.

3. O ya ɛɛ ku a wɛ ɔya ku Ujehofa, ɔdi nɛ ó dɔka ku a ya a?

Ujehofa yihɔtu ɛjɛɛji ācɛ, amáŋ “Óndú ā wɛ oklóbīya kú ācɛ dúúmā nēe gē yúufi nū ā.” (Aíjē Kú Ɛ̄gbā 25:14) Ujehofa leyice ka ācɛ nōo wɛ ɔya ku nu géē ceyitikwu kéē ya ɔdā okpaakpa nɛ ó dɔka a klla habɔ aɔdā nōo wɛ ɔdobɔbi a ta. Ācɛ ōhī gē gbɛla kóō gáā tɔɔtɛ lɛ uwa kéē ya ɛjɛɛji ɔdā nōo kpaakpa ɛgiyi Ɔwɔico a gla ŋ, kéē klla gáā habɔ ɛjɛɛji ɔdobɔbi ta gla ŋ. Naana a, Ujehofa gē meyinyinyi. Ó gē miyɛ ɛjɛɛji ācɛ nōo yihɔtu nu ɔkwɔɔkwɛyi nōo klla gē ceyitikwu o ya ɛɛ kéē ya ɔdā nōo he ɔ ɔtu a.—Aíjē Kú Ɛ̄gbā 147:11; Úklɔ́ kú Ācotɛ̄hɔ̄ 10:34, 35.

 JÉ GƆBU

4. Ebraham wɛ ɔya ku Ujehofa

Ɔ̄kā ku Ubáyíbu lɛyikwu Ebraham (néē klla gē hi ka Ebram duu a) ta alɔ abɔ jé ɔdā nōó wɛ ō wɛ ɔya ku Ɔwɔico a. Jé odee lɛyikwu Ebraham ipu ɔkpá ku Ohútu 12:1-4. Cɛɛ ku aa kɔka lɛyikwu aɔka nōo ba nyā:

• Ɔdi nɛ Ujehofa da Ebraham kóō ya a?

• Ɔdi nɛ Ujehofa cokonu nu lɛ ɔ a?

• Ɔdi nɛ Ebraham ya lɛyikwu aukɔ́ nɛ Ujehofa tu ɔ a?

5. Ɔdā nɛ Ujehofa yɔ i leyice ŋma ɛgiyi aɔya ku nu a

Alɔ gē leyice ɔdā ōhī ŋma ɛgiyi aoklobiya mla ancɛnya alɔ.

• Ɔdi wɛ aɔdā ōhī nɛ a géē dɔka ka aoklobiya mla ancɛnya uwɔ kéē ya gā uwɔ a?

Jé 1 Ujɔ́ni 5:3, cɛɛ ku aa kɔka lɛyikwu ɔka nyā:

• Ɔdi nɛ Ujehofa cɛgbá ŋma ɛgiyi aɔya ku nu a?

O ya ɛɛ ku alɔ lɛyitaajɛ lɛ Ujehofa a, alɔ cɛgbá ō piya uce o ya ku alɔ abɔ. Jé Ayisáya 48:17, 18, cɛɛ ku aa kɔka lɛyikwu ɔka nyā:

• Ɔdiya nɛ Ujehofa gē da aɔya ku nu kéē ya opiyabɔ a?

 6. Ɔdā nɛ Ujehofa gē ya o ya ɛɛ ka ó ta aɔya ku nu abɔ a

 ƆDI NƐ A NWU A?

Ujehofa dɔka ō wɛ Ɔya ku uwɔ, ó kéē géē ta uwɔ abɔ tubla ɔ ajaajɛ.

Aɔka ō tu alɔ ɛlá kwu ɔdā nɛ alɔ nwu

• Ɛgɛnyá nɛ Ujehofa gē ta aɔya ku nu abɔ a?

• Ɔdiya nɛ Ujehofa gē da aɔya ku nu kéē ya opiyabɔ a?

• A gbɛla kóō lɔnɔ ō wɛ ɔya ku Ujehofa a? Ɔdiya nɛ a ka lɛ a?