IJihova tịtọ ká ka jọ́ọ gụ ọwọwa. Ịyẹ tị́ du? Ọ yẹhị rịrị nyori, jaabwọ ká wẹẹ jẹ́ ang u-uhye nya abwụma nyamwụ, abwọlẹ kọ kaa họ ang, bala ang ọlẹ kọ tịtọ hang, ịnyị à ka tịtọ nyọka ri oligu nyamwụ gụ ọwọwa lẹ. À ka jẹ́-ẹ ri oligu nya Ohe Oluhye ịnyịlẹhị? (Wa Eje Ọnyịịla 25:14.) Ịyẹ a tị́ ka họ nyọka ri oligu nyamwụ? ỊBayịbụụ wẹ ịtọ ẹla ịwẹ, ọ myịmyị ya jehi ang odudu ká igu oriri bala iJihova à ri igu ọlẹ kọ baba gụgụ wuu.

1. Ịyẹ iJihova à tị́ wụrụng nyọka họ?

“Ọ́ ri kanụ tụ ịlọnụ ju Ohe Oluhye chwẹẹ aalẹ, Ohe Oluhye tịtị ka tụ junu chwẹẹ ịnyịnyị.” (IJemsi 4:8) Etu nya ẹlẹwẹ tị́ ri ányị? IJihova wẹẹ wụrụng nyọka ri oligu nyamwụ. Ọ ka la angịhyẹ ujwo nyọka myị ọnụ nyori ịwa nyị ka jẹ́-ẹ ri aligu nya Ohe Oluhye chajị áhị jẹ́-ẹ yọọ ka. Ma, iJihova chị ang myị́ ang ọlẹ kahị baba nyọka jẹ́ u-uhye abwụma nyamwụ ehe ẹ-ẹpwụ nya ịBayịbụụ chajị kahị ka tụ́ jwoo chwẹẹ. Ụka kahị wa Omyi Ẹla nya Ohe Oluhye ọlẹpwụ nya ịBayịbụụ, igu oriri nyahị balọọ kaa nwà, nanana nyori áhị jẹ́-ẹ yọọ ka.

2. Ịyẹ tị́ du ká iJihova à ri oligu ọlẹ kọ há gụ wuu ká ka la?

Á há ọngọngọhẹ lala iJihova ka. Ọ tịtọ á ka chị ọkẹkẹnị bala o-ya ẹla balọọ ụka myị́ ụka ká baba nya ụbwọ ọdada. À ka jẹ́-ẹ ‘kpa imahị omeme nyang wuu kịla Ohe Oluhye. Chajị, Ọngọ họ ịbaba nyang wuu hang, Ohe Oluhye ayịdang a ri lẹ.’ (1 iPita 5:7) IJihova nwụlanọ ụka myị́ ụka nyọka chẹkpẹ ju aligu nyamwụ, kpaa ẹjẹ, bala o-ke ụrụ wo laa.—Wa Eje Ọnyịịla 94:18, 19.

3. Ịyẹ iJihova à tị́ tịtọ ká aligu nyamwụ ka họ?

Angịnyị wuu há iJihova, “ọ tịị ri igu ta angị họ ang ọnyịịla.” (Etu 3:32) IJihova yẹhị rịrị ká aligu nyamwụ ka maga nyọka họ ang ịlẹ kọ ya nyị ri ang ịnyịịla bala o-cheji ba hi ang ịlẹ kọ ya nyị ri ang ịtịpyọ. Angịhyẹ ka me irya myị́ nyori ịwa nyị́ ka jẹ́-ẹ họ ang ịlẹ wuu ká iJihova byaa nyị họ lee o-cheji ba ang ịtịpyọ ka. Ma, iJihova ri ọla ahyẹẹrwẹrwa. Ọng myị́ ọng ọlẹ kọ la ọháha nyịlẹhị ẹ-ẹga nyamwụ bala ọ-kaa maga dịịlọmwụ nyọka họ ẹla kpọọ ịpyọ, ọ kaa yoo myị.—Eje Ọnyịịla 147:11; Ụkụrwọ nya Alẹrụ 10:34, 35.

 JẸ́ GỤ ỌỌWA

4. Ebiraham ri oligu nya iJihova

Oja nya Ebiraham ọlẹpwụ nya ịBayịbụụ (ịị wụrwọọ nya Ebiram ịnyịnyị) dahị ụbwọ nyọka jẹ́ ang ọlẹ kọ juwa ẹ-ẹpwụ nya igu oriri bala Ohe Oluhye. Wa oja nya Ebiraham ụ-ụpwụ nya Ọmwụ Ọdada 12:1-4. Kanụ ya ẹla u-uhye nya ịtọ ẹla ịlẹ:

• Ẹlịyẹ iJihova à tị́ byi Ebiraham nyị họ?

• Ehe oyina iJihova à tị́ chị Ebiraham?

• Ányị Ebiraham à tị́ họ?

5. Ẹlịyẹ iJihova à tị́ yẹhị rịrị ká aligu nyamwụ ka họ?

Ahị kaa tịtọ ká aligu nyahị ka họ ịngịhyẹ lee ọkịla.

• Ang iyina a tịị tịtọ ká aligu nyang ka họ hang?

Wa 1 ịJọn 5:3, kanụ ya ẹla u-uhye nya ịto ẹla ọlẹ:

• Ẹlịyẹ iJihova à tị́ tịtọ ká aligu nyamwụ ka họ?

Kori kahị tịtọ nyọka ju ihi nya iJihova aalẹ, ahị ka baba nya ọ-yẹ abwẹla nyahị lee abwọlẹ kahị la da. Wa Ayịsaya 48:17, 18, kanụ ya ẹla u-uhye nya ịtọ ẹla ọlẹ:

• Ịyẹ tị́ du ká iJihova kaa byi aligu nyamwụ nyị yẹ abwẹla nyaa da?

 6. Ang ọlẹ ká iJihova kaa họ ha aligu nyamwụ

 ẸLỊYẸ A TỊ́ JẸ́?

IJihova tịtọ nyọka ri Oligu nyang, ọ tị ka dang ụbwọ nyọka tụ́ jwoo chwẹẹ.

Ẹlịyẹ A Tị́ Yụbwọ Chị?

• Ányị iJihova à tị́ kaa da aligu nyamwụ ụbwọ?

• Ịyẹ tị́ du ká iJihova kaa byi aligu nyamwụ nyị yẹ abwẹla nyaa da?

• À me irya kọ lujwo kpoye nyọka ri oligu nya iJihova? Ịyẹ tị́ du ká ya ịnyị?