Jehovah ị́mịnị ụ nimi dẹịn kị dọụ emi. Tetuu a o? Jehovah nimi amọ omịnị wo emi bara, ye mịẹ mịnị bara, má wo dọụ ye nimipẹlẹ dẹ ifiesẹ, ụ mọ mọ́ ikie kẹrị mụ yọmị gaan dẹịn mịnị. Ị́mịnị laa Ọkpọnanaowei mọ ikie kẹrị a paa emi? (Psalm 25:14 goo.) Ị́mịnị teeki mịẹ dẹkị laa Ọkpọnanaowei ikie kịmị a paa mịnị a o? Bible bei biibịbịmọ paraị wẹrị emi má Jehovah mọ ikie kẹrị yọ kị yelaa dẹịn emi bara kpọ gbaa mị.

1. Jehovah te tịịnpọụn ka kị ị́ pịrị mịnị a o?

“Ọkpọnanaowei mọ naịn, omịnị kpọ ị́ mọ mọ́ naịn mịnị.” (James 4:8) Ọkpọnanaowei mọ naịn bị, teeki wo tuu a o? Jehovah ị́mịnị bo ụ mọ mọ́ ikie kẹrị mụ yọ ka kị ị́ tịịn mịnị. Zụa kịmịama laa ẹrịgha kịmị mọ ikie kẹrịgha, anịkị duonị Ọkpọnanaowei mọ ikie kẹrị mụ yọmị kụrọ a pịrị mịnị. Mọabịkpọ, Jehovah, Bible bolou bọọ, ị́mịnị mịẹ dẹkị laa bo wo ikie kịmị a paa mịnị bara sẹ gbaa gaan wẹrị emi. Ọkpọnanaowei ẹrịgha kpọ, omịnị Bible duo wo gbaa egberimọ goo wẹrị wo emi bara nimi daba, omịnị wo ikie otuama ghọ paa mịnị.

2. Jehovah kị iné nana agbẹị dẹịn ikie, tetuu a?

Jehovah kị ị́ tarị dẹịn emi. Ị́mịnị pọwẹị pọwẹị timi mụ yọ kị omịnị mọ dọụ mịnị má bụụdọọnye ị́ laa daba tẹẹ ụ yarị. “iné ghọ bụụdọọn mịnị yesẹ gbeinmọ akị Jehovah yarị, tuubị omịnị ị́ kekere mịnị.” (1 Peter 5:7) Jehovah ifiemọsẹ baratụa wo ikie-otumọ pịrị, a kụrọmọ, má beritịẹmọ a pei mịnị.—Psalm 94:18, 19 goo.

3. Jehovah te ka kị wo ikie-otumọ ghọ dọụ wẹrị emi a o?

Jehovah kịmịsẹ kị tarị emi, “anịa omịnị kịrịị ye mịẹ mịnị otumọ ka kị ikie mịẹ mịnị.” (Proverbs 3:32) Jehovah wo ikie-otubo wo dọụ ye mịẹ má wo dọụgha ye mịẹ kụmọ bara kị dọụ emi. Zụa kịmịama iroro mịnị bara bị amịnị laa Jehovah dọụ wẹrị emi yemọ mịẹgha fa. Mọabịkpọ, Jehovah sụọtuu nimi wẹrị emi. Gesii bara akị ụ tarị má wo dọụ ye kẹrị mịẹ mịnị otumọ laa wo ikie kịmị ghọ paa mịnị.—Psalm 147:11; Acts 10:34, 35.

 EBIBARA TUUDỌỤ

4. Abraham Jehovah ikie kịmị a paa mị

Bible bolou bọọ Abraham (Abram kpọ akị ụ tịịn mị) egberi bị baratụa wó pịrị wẹrị Ọkpọnanaowei mọ ikie kẹrị mụ bara nimi mịnị. Abraham egberi bị akị Genesis 12:1-4 bọọ goo. Má bei biibịbịmọ akị ẹrẹtei:

• Jehovah teeki gbaa akị Abraham pịrị ma o?

• Jehovah teeki kii koromọ akị Abraham pịrị ma o?

• Jehovah egberi gbaa akị Abraham pịrị bị, omịnị tebara kị mịẹ ma?

5. Jehovah wo ikie-otumọ ghọ dọụ wẹrị emi yebị

Kịmịsẹ anị ikie-otumọ bara ghọ ye dọụ weri emi.

• Ị́ kpọ te ka kị iné ikie kịmị bara ghọ dọụ wẹrị emi a o?

1 John 5:3 goo dá, bei biibịbị akị ẹrẹtei:

• Jehovah te ka kị wó ikie-otumọ ghọ dọụ wẹrị emi a o?

Omịnị Jehovah dọụ bara kẹrị wẹnị dọụ mịnị sẹ, omịnị wó sei inyenrinbụọmọ dei mịnị. Isaiah 48:17, 18 goo dá, bei biibịbị kẹrị ẹrẹtei:

• Tetuu kị duonị Jehovah wo ikie-otumọ anị inyenrinbụọmọ dei bara gbaa ma o?

 6. Jehovah mịẹ akị wo ikie-otumọ pịrị mịnị yemọ

 KỊLỌỌBARA

Jehovah ị́ mọ mọ́ Ikie kẹrị dọụ emi, má baratụa ị́ pịrị wẹrị ụ mọ mọ́ naịn mịnị.

Waị diitụa

• Jehovah tebara ka kị baratụa wo ikie-otumọ pịrị mịnị a o?

• Tetuu ki duonị Jehovah wo ikie-otumọ anị inyenrinbụọmọ dei bara gbaa ma o?

• Jehovah ikie kịmị ghọ paa mụ yọbị kụrọ emi a? Tetuu a?