LEKSION 08
Mabalinmo ti Makigayyem ken Jehova
Kayat ni Jehova a mas maam-ammom isuna. Apay? Namnamaenna a no mas maam-ammom dagiti kualidadna, ti panangtratona kadagiti tattao, ken ti kayatna para kenka, mas kayatmo ti makigayyem kenkuana. Talaga kadi a posible nga agbalinka a gayyem ti Dios? (Basaen ti Salmo 25:14.) Ania ti mabalinmo nga aramiden tapno agbalinka a gayyemna? Sungbatan ti Biblia dagita a saludsod ken ibagana kenka no apay a ti pannakigayyem ken Jehova ti kasayaatan a relasion a maadda kenka.
1. Ania ti iyaw-awis ni Jehova kenka?
‘Umasidegka iti Dios, ket umasidegto kenka.’ (Santiago 4:8) Ania ti kayat a sawen dayta? Aw-awisennaka ni Jehova nga agbalin a gayyemna. Pampanunoten ti dadduma a narigat ti makigayyem iti saanda a makita, a kas iti Dios. Ngem iti Saona, ti Biblia, ipakpakaammo ni Jehova ti amin a masapul a maammuantayo maipapan kadagiti kualidadna tapno agbalintayo a nadekket kenkuana. No basaentayo ti mensahe ti Dios kadatayo iti Biblia, lumagda ti pannakigayyemtayo ken Jehova uray ditay makita.
2. Apay a ni Jehova ti kasayaatan nga agbalin a Gayyemmo?
Awanen ti mas mangay-ayat kenka no di ni Jehova. Kayatna a naragsakka ken agkararagka kenkuana no kasapulam ti tulong. ‘Ipalladawmo kenkuana ti amin a pakadanagam, ta ipatpategnaka.’ (1 Pedro 5:7) Kanayon a nakasagana ni Jehova a dumngeg, tumulong, ken mangpalag-an iti rikna dagiti gagayyemna.—Basaen ti Salmo 94:18, 19.
3. Ania ti kayat ni Jehova nga aramiden dagiti gagayyemna?
Ay-ayaten ni Jehova ti amin a tattao, ngem ibilangna a ‘nasinged a gayyemna dagiti nalinteg.’ (Proverbio 3:32) Kayat ni Jehova nga agporsegi dagiti gagayyemna a mangaramid iti nasayaat ken saan a mangaramid kadagiti ibilangna a dakes. Pampanunoten ti dadduma a saanda a kaya dagiti ipapaaramid ni Jehova. Ngem mannakaawat ni Jehova. Awatenna ti amin a mangay-ayat kenkuana ken mangar-aramid iti amin a kabaelanda a mangparagsak kenkuana.—Salmo 147:11; Aramid 10:34, 35.
AMMUEM TI AD-ADU PAY
Ammuem ti ad-adu pay no kasano nga agbalinka a gayyem ni Jehova, ken kitaem no apay nga isu ti kasayaatan a Gayyem.
4. Ni Abraham ket gayyem ni Jehova
Ti salaysay ti Biblia maipapan ken Abraham (a maawagan met Abram) matulongannatayo a mangammo no kasano ti agbalin a gayyem ti Dios. Basaen ti maipapan ken Abraham iti Genesis 12:1-4, sa pagsaritaan dagitoy a saludsod:
-
Ania ti impaaramid ni Jehova ken Abraham?
-
Ania ti inkari ni Jehova kenkuana?
-
Ania ti inaramid ni Abraham kadagiti imbilin ni Jehova kenkuana?
5. Ti kayat ni Jehova nga aramiden dagiti gagayyemna
Adda dagiti ekspektarentayo nga aramiden dagiti gagayyemtayo.
-
Ania ti kayatmo nga aramiden dagiti gagayyemmo para kenka?
Basaen ti 1 Juan 5:3, sa pagsaritaan daytoy a saludsod:
-
Ania ti ekspektaren ni Jehova kadagiti gagayyemna?
Mabalin nga adda dagiti masapul a balbaliwantayo kadagiti ugali ken ar-aramidtayo tapno makapagtulnogtayo ken Jehova. Basaen ti Isaias 48:17, 18, sa pagsaritaan daytoy a saludsod:
-
Apay a kayat ni Jehova a mangaramid iti panagbalbaliw dagiti gagayyemna?
Ibaga ti nasayaat a gayyem ti pagsayaatantayo ken ti aramidentayo tapno maprotektarantayo. Kasta met ti aramiden ni Jehova kadagiti gagayyemna
6. Ti ar-aramiden ni Jehova para kadagiti gagayyemna
Tultulongan ni Jehova dagiti gagayyemna kadagiti problemada. I-play ti VIDEO, sa pagsaritaan ti sumaruno a saludsod.
-
Kasano a tinulongan ni Jehova ti babai iti video a manglaban kadagiti negatibo a pampanunoten ken marikriknana?
Basaen ti Isaias 41:10, 13, sa pagsaritaan dagitoy a saludsod:
-
Ania ti ikarkari ni Jehova nga aramidenna para iti amin a gagayyemna?
-
Panagkunam, nasayaat ngata a Gayyem ni Jehova? Apay?
Tulongandaka dagiti nasayaat a gagayyem no kasapulam dayta. Tulongannaka met ni Jehova
7. Importante ti komunikasion iti pannakigayyem ken Jehova
Nadekdekket dagiti aggagayyem no adda komunikasionda. Basaen ti Salmo 86:6, 11, sa pagsaritaan dagitoy a saludsod:
-
Kasanotayo a makisarita ken Jehova?
-
Kasano a makisarita ni Jehova kadatayo?
Makisarsaritatayo ken Jehova no agkararagtayo; makisarsarita met kadatayo no basaentayo ti Biblia
KUNA TI DADDUMA: “Imposible ti agbalin a nadekket iti Dios.”
-
Ania a teksto ti usarem a mangipakita a posible nga agbalintayo a gayyem ni Jehova?
SUMARIO
Kayat ni Jehova nga agbalinka a Gayyemna, ken tulongannaka nga agbalin a nadekket kenkuana.
Rebiu
-
Kasano a tultulongan ni Jehova dagiti gagayyemna?
-
Apay a kayat ni Jehova a mangaramid iti panagbalbaliw dagiti gagayyemna?
-
Panagkunam, narigat kadi ti agbalin a gayyem ni Jehova? Apay, wenno apay a saan?
AGDISKOBREKA PAY
Kasano a mabalbaliwan ti pannakigayyemmo iti Dios ti biagmo?
“Ni Jehova—Ti Dios a Maikari nga Am-ammuen” (Ti Pagwanawanan, Pebrero 15, 2003)
Ammuem no kasano ti makigayyem iti Dios.
Kitaem no apay nga imbaga ti maysa a babai a simmayaat ti biagna gapu iti pannakigayyemna ken Jehova.
Denggem ti ibaga dagiti tin-edyer maipapan ken Jehova.