Jeuova waahn yu fi nuo muor bout im. Wa mek? Jeuova waahn yu fi nuo muor bout im wiez dem, ou im chriit piipl, an wa im waahn fi wi, kaaz im nuo se wans yu nuo dem sitn de, yu a-go waahn fi ton im fren. Yu tingk yu an Gad kyan ton fren? (Riid Saam 25:14.) So wa yu fi du ef yu waahn yu an Jeuova fi ton gud fren? Di Baibl mek wi nuo wa wi fi du, an Jeuova a di bes Fren yu kuda eva av.

1. Wa Jeuova waahn yu fi du?

“Jraa nier Gad, an Gad wi jraa nier unu.” (Jiemz 4:8) Da skripcha ya shuo se Jeuova waahn yu an im fi ton fren. Chuu piipl kyaahn si Gad, som piipl fiil se dem an im kyaahn ton fren. Bot iina di Baibl, Jeuova mek wi nuo evriting we wi fi nuo bout im so dat wi kyan ton im fren. Iivn duo wi kyaahn si Gad, wen wi riid di Baibl it kyan mek wi an Jeuova ton gud gud fren.

2. Wa mek Jeuova a di bes Fren yu kuda eva av?

Nobadi no lov yu muo dan Jeuova. Im waahn yu fi bi api, so wen yu niid elp im waahn yu fi kom tu im. 1 Piita 5:7 se: “Evriting we unu a wori an fret bout, gi it tu im, kaaz im kier bout unu.” Jeuova naa go eva lef im fren dem. Im aalwiez de de fi elp dem, fi lisn tu dem, an fi osh dem.​—Riid Saam 94:18, 19.

3. Wa Jeuova waahn im fren dem fi du?

Wen yu tingk bout it, Jeuova lov evribadi, “bot Im a gud gud fren wid di sumadi we a du wa rait.” (Pravorbz 3:32) Jeuova waahn im fren dem fi du wa im se rait, an im waahn dem fi kip we fram wa im se bad. Som piipl mait-a fiil se dat aad fi du, bot Jeuova naa go aks wi fi du notn we im nuo wi kyaahn du. So langks wi a shuo im se wi lov im, an wi a chrai wi bes fi du wa im waahn wi fi du, im wi tek wi az im fren.​—Saam 147:11; Aks 10:34, 35.

 LORN SOM MUO

4. Iebriyam a did Jeuova fren

Wen wi riid di Baibl tuori bout Iebriyam (we dem kaal Iebram tu), wi get fi si ou sumadi an Gad kyan ton fren. Riid di tuori bout Iebriyam iina Jenisiz 12:1-4. Den wi a-go taak bout dem kwestiyan ya:

• Wa Jeuova did tel Iebriyam fi du?

• Wa Jeuova pramis im se?

• Wa Iebriyam did du?

5. Wa Jeuova waahn im fren dem fi du?

Aal a wi lov wen wi fren dem du tingz fi wi.

• Wa’a som a di sitn dem we yu waahn yu fren dem fi du fi yu?

Riid 1 Jan 5:3, an den wi a-go taak bout da kwestiyan ya:

• Wa Jeuova waahn im fren dem fi du?

Ef wi a-go du wa Jeuova waahn wi fi du, wi mait-a afi tap du som a di sitn dem we wi a du ar chienj som a di wiez dem we wi av. Riid Aizaiya 48:17, 18, an den wi a-go taak bout da kwestiyan ya:

• Wa mek Jeuova aks im fren dem fi chienj dem wiez ar fi tap du tingz we dem a du?

 6. Wa’a som a di sitn dem we Jeuova du fi elp im fren dem?

 DIS A WA YU FI MEMBA

Jeuova waahn yu an im fi ton fren, an im a-go elp yu fi jraa nier tu im.

Wa yu did lorn iina da lesn ya?

• Wa’a som a di sitn dem we Jeuova yuuz fi elp im fren dem?

• Wa mek Jeuova tel im fren dem fi tap du som a di sitn dem we dem a du?

• Yu tingk di sitn dem we Jeuova a tel im fren dem fi du tu moch fi dem du? Wa mek yu se so?