Jehovaka amincha nekarat tusa wakerawai. Urukamtai? Ninkia penker nekara amikiur ati tusa wakerawai. Warinkisha itiura najanniuit tura warinia najanatta nunasha nekaat tusa wakerawai. Tumaitkiusha nekasash Yuusa amikri ajasminiaitiaj? (Yus Kanta [Salmo] 25:14 aujsata). Amesha Yuusa amikri atasam wari najanatniuitiam? Nuu anintramuka Yuus papiinium nekaamniaitji. Nuyasha Jehová amikri atinkia imia penkeraiti tawai Yuus papii.

1. Amesha Jehová amikri ajasminiashitiam?

“Yusai̱ni̱ weamkata tura Ni atumín wearmáktatrume” (Sántiak 4:8). Nusha warinkiuat ainis ta? Jehovaka winia amikiur ajasta turamui. Wainchiatrisha itiurak Yuusa amikri ajasminiaitiaj nukap aents ainis enentaimiarminiaiti. Yuuska ni chichamen amasuitji. Nui ni urukuit nu penker nekaar ni amikri ajasminiaitji. Yuusa chichame aujeakrikia Yuus wainchiatar ni amikri tuke atin wakerittiaji.

2. Jehovasha urukamtai nekas amikrum aminiait?

Jehová aminkia ti anenmawai. Warasam pujusai tusa wakerawai nuyasha urutainsha aujtusat tusa wakerawai. “Yus ámin ti enentáimturmakui ame itiurchatrum ainia nu Yus ashí íktusta” (1 Pítiur 5:7). Jehovaka ni amikri ainianka yainiaiti, ikiakainiaiti nuyasha anturniuiti (Yus Kanta [Salmo] 94:18, 19 aujsata).

3. Jehovasha ni amikri ainiana nusha uruku arat tusa wakeriniait?

Jehovaka ashi aentsun anenaiti tumaitkiusha esetar wekainia nuna amikrinti (Nekatai̱n Jintinkiartin [Proverbios] 3:32). Jehovaka ni amikri ainiana nuka penkera nuna najanawarat tusa wakeriniaiti nuyasha yajauchia nunaka nakitrarat tusa wakeriniaiti. Jehová tana nunaka timiatrusnak umiktinniaka tujinkiamniaitjiai yaksha ainis enentaimminiaiti tumaitkiusha Yuuska waitnenkartin asa nin anena nunaka tura nin umirkattsa kakainianka shiir enentaimtawai (Yus Kanta [Salmo] 147:11; Túramuri̱ [Hechos] 10:34, 35).

 PENKER NEKAATAI

4. Abrahán Yuusa amikriyayi

Yuusa amikri atin uruksait nuka Abrahán (Abrán) Yuusa amikriyayi tusa Yuus papiinium aujmateana nujai nekaamniaitji. Náṉkammari̱ [Génesis] 12:1-4 nui Abrahankan aujmateana nu aujsarum juna aujmattsatarum:

• Jehová Abrahankan wari turata timia?

• Jehová wari itiurkattajme timia?

• Jehová timiania nuna umiktasa Abrahán warinia najanamia?

5. Jehovasha ni amikri ainiana nusha warinia najanawarat tusa wakera?

Ii amikrinkia penker arat tusar wakerutainti.

• Ame amikrumsha warinia najanat tusam wakeriniaitiam?

1 Juaṉ 5:3, 4 aujsarum juna aujmattsatarum:

• Jehovasha ni amikri ainiana nuna warinia najanawarat tusa wakera?

Jehová umirkattsar ii yaunchu najantainkia iniaisar penker iniakmamin atiniaitji. Isaías 48:17, 18 TNM aujsarum juna aujmattsatarum:

• Jehovasha ni amikri ainiana nuna urukamtai yapajniawar penker arat tusa wakera?

 6. Jehovasha ni amikri ainian itiurniuit?

 WARI NEKAAM

Jehovaka amin amikiur ati tusa wakerawai tura amikiur ajasat tusa yainmaktatui.

Awakeasrik nekaatin

• Jehovasha ni amikri ainiana nunasha itiura yainiait?

• Urukamtai yapajniawar penker arat tusa wakera?

• Jehovasha ii jeashman turatarum tukartiniashit? Urukamtai ainis enentaimiam?