Yahwa yebɣa aţ-ţnadiḍ a t-tissineḍ. Acuɣer? Axaṭer yeẓra belli ma teţnadiḍ a t-tissineḍ yerna teţqellibeḍ aţ-ţissineḍ lecɣal-is d wayen ara yexdem ɣer zdat, aţ-ţebɣuḍ akteṛ aţ-ţiliḍ d aḥbib-is. Meɛna, tzemreḍ s ṣṣeḥ aţ-ţiliḍ d aḥbib n Ṛebbi? (ɣer-ed Ahellil 25:14). Amek ara tuɣaleḍ d aḥbib-is? Adlis Iqedsen yeţţak-ed leǧwab ɣef yesteqsiyen-agi, yessefham-ed daɣen belli ulac d acu i gifen tadukli akk-d Yahwa.

1. D acu i k-d-yeṭṭalab Yahwa a t-txedmeḍ?

“Qerrbet ɣer Yillu, a d-iqerreb ɣur-wen” (Yeɛqub 4:8). D acu ara d-nefhem seg wafir-agi? Yahwa yebɣa aţ-ţiliḍ d aḥbib-is. Kra yewɛeṛ-asen ad amnen belli zemren ad qqlen d iḥbiben n Ṛebbi imi ur t-ţwalin ara. Kra nniḍen ɣilen a s-nekkes leqder i Ṛebbi ma nenna-d belli nezmer a nuɣal d iḥbiben-is. Meɛna Yahwa yenna-yaɣ-d deg Wawal-is, yeɛni deg Wedlis Iqedsen, ayen akk i neḥwaǧ a t-nissin fell-as bac ‘a nqerreb ɣur-es’. M’ara neqqar Adlis Iqedsen, yeɛni tabṛaţ i ɣ-d-iceggeɛ Yahwa, aţ-ţiǧhid tdukli-nneɣ yid-es, ɣas akken ur t-neţwali ara.

2. Ayɣer i ulac Aḥbib am Yahwa?

Ulac win i k-iḥemmlen am Yahwa. Yebɣa aţ-ţɛiceḍ di lfeṛḥ yerna mkul m’ara t-teḥwiǧeḍ, tzemreḍ a s-tḍelbeḍ lemɛawna. Tzemreḍ ‘aţ-ţerreḍ iɣeblan-ik meṛṛa ger ifassen-is, axaṭer iţḥebbiṛ fell-ak’ (1 Buṭrus 5:7). Yahwa yezga ɣer tama n wid akk yellan d iḥbiben-is akken a ten-iɛiwen, a ten-iṣebber w’a sen-iḥess (ɣer-ed Ahellil 94:18, 19).

3. D acu i glaqen iwakken a nuɣal d iḥbiben n Yahwa?

Yahwa iḥemmel akk medden, “lameɛna, d arfiq n wid iţeddun s lewqam” (Lemtul 3:32). Akken a nili d iḥbiben n Ṛebbi, ilaq a nexdem lmeǧhud bac a nxeddem leḥwayeǧ i geţwali lhant w’a nexḍu i leḥwayeǧ i geţwali diri-tent. Kra yeţban-asen-d d lmuḥal ad ssiwḍen ad qadren ayen akk i sen-d-yeṭṭalab Yahwa. Meɛna Yahwa ifehhem-aɣ. Yeţţuɣal d aḥbib n wid i t-iḥemmlen seg wul, i gxeddmen ayen akk umi i zemren iwakken a s-ɛeǧben (Ahellil 147:11; Lecɣal 10:34, 35).

 A NNADI A NEFHEM AKTEṚ

4. Abṛaham yella d aḥbib n Yahwa

Taqsiṭ n Abṛaham (yeţţusemman daɣen Abṛam), yellan deg Wedlis Iqedsen, tessefham-ed amek i nezmer a nili d iḥbiben n Ṛebbi. Ɣret-ed Laṣel n ddunit 12:1-4, mbeɛd hedṛet ɣef yesteqsiyen-agi:

• D acu i geḍleb Yahwa i Abṛaham a t-yexdem?

• D acu i s-yewɛed Yahwa?

• Yeqbel Abṛaham ad yexdem ayen akk i s-d-yeḍleb Yahwa?

5. D acu i geţṛaǧu Yahwa seg yeḥbiben-is?

Nesɛa lḥeqq ma neţṛaǧu kra seg yeḥbiben-nneɣ.

• I kečč, d acu i teţṛaǧuḍ seg yeḥbiben-ik?

Ɣret-ed 1 Yuḥenna 5:3, mbeɛd hedṛet ɣef westeqsi-yagi:

• D acu i geţṛaǧu Yahwa sɣur yeḥbiben-is?

Akken a naɣ awal i Yahwa, ilaq ahat a nbeddel tikli-nneɣ akk-d kra si ṭṭbiɛa-nneɣ. Ɣret-ed Icɛaya 48:17, 18, mbeɛd hedṛet ɣef westeqsi-yagi:

• Acuɣer i geṭṭalab Yahwa i yeḥbiben-is ad beddlen kra n leḥwayeǧ di temɛict-nsen?

 6. Amek i geţɛawan Yahwa iḥbiben-is?

 AYEN I D-NELMED

Yahwa yebɣa aţ-ţiliḍ d aḥbib-is yerna a k-iɛiwen aţ-ţqerrbeḍ ɣur-es.

A d-nesmekti

• Amek i geţɛawan Yahwa iḥbiben-is?

• Acuɣer i geţṛaǧu Yahwa seg yeḥbiben-is ad beddlen ṭṭbiɛa-nsen?

• Ar ɣur-ek, yewɛeṛ aṭas fell-aneɣ a nuɣal d iḥbiben n Yahwa? Ayɣer?