Yehowa gaw, nang hpe shi a lam grau nna chye shangun mayu ai. Shi a atsam ningja ni, galaw ai lam ni hte yaw shada lam ni hpe grau hkaja shangun mayu ai. Rai yang, shi hte jinghku byin mayu ai myit nang hta grau nga wa na re. Karai a jinghku gaja wa byin mai na kun? (Yaku 2:23 hpe hti u.) Shi a jinghku byin na matu hpa galaw ra na kun? Chyum Laika hta dai ga san ni hpe mahtai jaw da ai. Yehowa hte jinghku hku ai gaw, nang galaw lu ai lam yawng hta na kaja htum re ai hpe mung tsun da ai.

1. Yehowa gaw nang hpe hpa galaw na matu saw shaga ai kun?

“Karai Kasang hpang de sit sa wa mu; shaloi shi nanhte hpang de sit wa na ra ai.” (Yaku 4:8) Dai gaw hpa lachyum rai kun? Yehowa gaw shi a jinghku byin na matu nang hpe saw shaga nga ai re. Karai Kasang hpe n mu lu ai majaw, shi hte jinghku byin mai ai ngu ai hpe kam na matu masha nkau yak nga ai. Raitim, Yehowa gaw, shi hte jinghku byin lu na matu, shi a atsam ningja ni hte seng nna anhte chye da ra ai lam ni hpe Chyum Laika hku nna tsun dan ai. Chyum Laika hta lawm ai Karai a shiga ni hpe hti yang, Yehowa hpe n mu lu tim, shi hte grau nna hku hkau wa na re.

2. Yehowa hte jinghku hku ai gaw hpa majaw kaja htum rai kun?

Yehowa hta lai nna nang hpe grau tsawra lu ai kadai n nga ai. Shi gaw nang hpe pyaw shangun mayu nna, karum shingtau ra nga ai aten shagu shi kaw hpyi shangun mayu ai. “Shi nanhte hpe myit dum ya nga ai majaw, nanhte a myit ru myit tsang ai nlang hte nan, shi a ntsa e kabai mara da mu.” (1 Petru 5:7) Yehowa gaw shi a jinghku ni tsun ai ga hpe madat ya na matu, shalan shabran ya na matu, madi shadaw ya na matu galoi mung jin jin rai nga ai.​—Shakawn 94:​18, 19 hpe hti u.

3. Yehowa gaw shi a jinghku ni kaw na hpa myit mada ai kun?

Yehowa gaw, shinggyim masha yawng hpe tsawra ai. Raitim, “teng man ai ni chyawm gaw shi hte jinghku hku lu na ma ra ai.” (Ga Shagawp 3:32) Yehowa gaw shi a jinghku ni kaw na kaja ai ngu shi mu mada ai lam ni hpe shakut nna galaw na matu, n kaja ai ngu shi mu mada da ai lam ni hpe koi na matu myit mada ai. Kaja ai, n kaja ai hte seng ai Yehowa a tsang madang ni hpe galoi mung hkan sa lu na n re ngu nkau mi hkamsha chye ai. Raitim, Yehowa gaw tsawra myit kaba ai. Yehowa hpe myit majing hte tsawra nna, shi a myit shapyaw ya ai ni yawng hpe shi hkap la ai.​—Shakawn 147:11; Kasa 10:​34, 35.

 Kahtap Hkaja

4. Abraham gaw Yehowa a jinghku re

Karai a jinghku ngu ai a lachyum hpe Chyum Laika hta lawm ai Abraham (Abram ngu na mung shaga) a labau kaw na chye lu ai. Abraham a lam hpe Ningpawt 12:​1-4 hta hti yu u. Dai hpang ndai ga san ni hpe bawngban u:

• Yehowa gaw Abraham hpe hpa galaw na matu tsun wa ai kun?

• Yehowa shi hpe hpa ga sadi jaw ai kun?

• Yehowa a lam matsun hpe Abraham gara hku bai htang ai kun?

5. Shi a jinghku ni kaw na Yehowa hpyi shawn ai lam

Anhte gaw tinang a jinghku ni kaw na myit mada ai lam ni nga ai.

• Na a jinghku ni kaw na nang galaw shangun mayu ai lam nkau gaw hpa rai kun?

1 Yawhan 5:3 hpe hti nna, ndai ga san hpe bawngban u:

• Yehowa gaw shi a jinghku ni kaw na hpa hpyi shawn ai kun?

Yehowa hpe madat mara na matu, anhte a akyang lailen (sh) galaw hkawm sa ai lam ni hpe galai shai ra chye ai. Esaia 48:​17, 18 hpe hti nna, ndai ga san hpe bawngban u:

• Yehowa gaw shi a jinghku ni hpe galai shai na matu hpa majaw hpyi shawn ai kun?

 6. Shi a jinghku ni hpe Yehowa karum ya

 Kadun Dawk

Yehowa gaw nang hte jinghku byin mayu ai. Shi hte jinghku byin lu na matu mung karum ya ai.

Bai Maram

• Yehowa gaw shi a jinghku ni hpe gara hku karum ya ai kun?

• Yehowa gaw shi a jinghku ni hpe galai shai na matu hpa majaw tsun ai kun?

• Yehowa gaw shi a jinghku ni kaw na ladu lai hpyi shawn ai ngu nang shadu ai kun? Rai yang, nang hpa majaw dai hku htai ai?