TƆM KƖKPƐLƖKƖTƲ 08
Ŋpɩzɩɣ nɛ ŋkɛ Yehowa taabalʋ
Yehowa sɔɔlaa se ŋtɩlɩ-ɩ camɩyɛ. Ɛbɛ yɔɔ? Ɛnawa se ye ŋkpɛlɩkaa nɛ ŋtɩlɩ ɛ-wɛtʋ, ɛ-nʋmɔŋ nɛ ɛ-kaɖʋwa camɩyɛ yɔ, pɩkaɣ-ŋ seɣtuu se ŋkɛ ɛ-taabalʋ. Ŋpɩzɩɣ nɛ ŋkɛ Yehowa taabalʋ toovenim na? (Kalɩ Keɣa 25:14) Ɛbɛ ŋpɩzɩɣ ŋla nɛ ŋkɛ Yehowa taabalʋ? Bibl cosuu tɔm ndʋ tɩ-yɔɔ nɛ kɩwɩlɩɣ mbʋ pʋyɔɔ ña nɛ Yehowa mɩ-taabalɩyɛ kɛ taabalɩyɛ nɖɩ ɖɩ-tɔm cɛyɩ siŋŋ yɔ.
1. Ɛbɛ Yehowa seɣtiɣ-ŋ se ŋla?
«Ɩñɔtɩ mɩ-tɩ nɛ Ɛsɔ, nɛ ɛkaɣ-mɩ ñɔtɩnʋʋ.» (Yakubu 4:8) Tɔm tʋnɛ tɩ-tɔbʋʋ lɛ suwe? Yehowa seɣtiɣ-ŋ se ŋkɛ ɛ-taabalʋ. Nabɛyɛ pɩzɩɣ nɛ pamaɣzɩ se paapɩzɩɣ nɛ pɛkɛ weyi paanaɣ-ɩ yɔ ɛ-taabalʋ, nɛ kɔzɩ kɔzɩ lɛ pamaɣzɩɣ se paapɩzɩɣ nɛ pɛkɛ Ɛsɔ taabalʋ. Ɛlɛ Yehowa tɩŋɩɣnɩ Bibl yɔɔ nɛ ɛwɩlɩɣ-ɖʋ tɔm ndʋ payɩ pɩpɔzʋʋ se ɖɩtɩlɩ ɛ-yɔɔ nɛ pɩsa nɛ ɖɩñɔtɩnɩ-ɩ yɔ. Bibl kɛnɩ takayaɣ ŋga Ɛsɔ ma-ɖʋ yɔ; ye ɖɩkalɩɣ-kʋ ɖoŋ ɖoŋ yɔ, ɖa nɛ ɩ ɖa-taabalɩyɛ cɛyɩsɩɣ camɩyɛ, paa ɖɩɩpɩzɩɣ se ɖɩna-ɩ yɔ.
2. Yehowa kɛnɩ taabalʋ kɩbanʋ siŋŋ weyi ŋpɩzɩɣ nɛ ŋwɛɛna yɔ. Ɛbɛ yɔɔ?
Nɔɔyʋ tɩsɔɔlɩ-ŋ nɛ pɩtalɩ Yehowa. Ɛsɔɔlaa se ŋwɛɛ taa leleŋ taa nɛ ɛsɔɔlaa ɖɔɖɔ se ŋpɩsɩnɩ ɛ-yɔɔ alɩwaatʋ ndʋ payɩ pɩpɔzʋʋ se pasɩnɩ-ŋ yɔ. Ŋpɩzɩɣ ‘nɛ ŋɖʋzɩ ña-nɩɣzɛ kpeekpe e-nesi tɛɛ, mbʋ pʋyɔɔ yɔ ɛcɔŋnɩ ñɔ-yɔɔ.’ (1 Pɩyɛɛrɩ 5:7) Paa ɛzɩmtaa lɛ, Yehowa sɔɔlaa se ɛsɩnɩ ɛ-taabalaa, ɛhɛzɩ pa-laŋa nɛ ewelisini-wɛ.—Kalɩ Keɣa 94:18, 19.
3. Ɛbɛ pɩwɛɛ se ŋla nɛ ŋpɩsɩ Yehowa taabalʋ?
Yehowa sɔɔlɩ ɛyaa kpeekpe, ɛlɛ «ɛɖʋʋ taabalɩyɛ kɩbanɖɛ nɛ ɛyʋ siɣsiɣ tʋ.» (Aduwa 3:32) Pɩsa nɛ ŋkɛ Yehowa taabalʋ lɛ, pɩwɛɛ se ŋñaɣ pana nɛ ŋla mbʋ pɩwɛ ɖeu ɛ-ɛsɩndaa yɔ nɛ ŋse mbʋ pɩkɛ kɩdɛkɛdɩm yɔ. Nabɛyɛ pɩzɩɣ nɛ pamaɣzɩ se paakaɣ pɩzʋʋ kpa nɛ paña paɣtʋ ndʋ Yehowa ɖʋ kɩbam nɛ kɩdɛkɛdɩm pɔ-hɔɔlʋʋ taa yɔ. Ɛlɛ Yehowa kɛ pʋtɔdɩyɛ nayʋ. Ɛmʋʋ ɛyaa mba payɩ pɔsɔɔlɩ-ɩ nɛ pañakɩ pana se pala mbʋ pɩkɛdɩɣnɩ-ɩ yɔ.—Keɣa 147:11; Tʋma Labʋ 10:34, 35.
TAZƖ NƐ PILIMI
Tazɩ nɛ ŋna mbʋ ŋpɩzɩɣ ŋla nɛ ŋkɛ Yehowa taabalʋ yɔ; tazɩ ɖɔɖɔ nɛ ŋna mbʋ pʋyɔɔ ɛ-taabalɩyɛ kpaɖɩnɩ ɖeu yɔ.
4. Abraham kaakɛ Yehowa taabalʋ
Tɔm ndʋ Bibl yɔɔdʋʋ Abraham (yaa Abram) yɔɔ yɔ, tɩsɩɣnɩ-ɖʋ se ɖɩtɩlɩ mbʋ pɩpɔzʋʋ se ɛyʋ ɛla nɛ ɛkɛ Yehowa taabalʋ yɔ. Ɩkalɩ Kiɖe Tɛɛ Tɔm 12:1-4, nɛ pʋwayɩ lɛ ɩtazɩ tɔm tʋnɛ tɩ-taa:
-
Ɛbɛ Yehowa kaapɔzɩ Abraham se ɛla?
-
Tamaɣ ŋga Yehowa kaalabɩ-ɩ?
-
Ɛzɩma Abraham ɖɔm tɔm ndʋ Yehowa heyi-i yɔ tɩ-yɔɔ?
5. Ɛbɛ Yehowa sɔɔlaa se ɛ-taabalaa ɩla?
Ðoŋ ɖoŋ lɛ, ɖɩsɔɔlaa se ɖa-taabalaa ɩlabɩ-ɖʋ mbʋ pɩkɛdɩɣnɩ-ɖʋ yɔ.
-
Ɛbɛ ŋsɔɔlaa se ña-taabalaa ɩlabɩ-ŋ?
Ɩkalɩ 1 Yohanɛɛsɩ 5:3, nɛ pʋwayɩ lɛ icosi tɔm tʋnɛ tɩ-yɔɔ:
-
Ɛbɛ Yehowa sɔɔlaa se ɛ-taabalaa ɩla?
Pɩsa nɛ ɖɔ-tɔm kɛdɩnɩ Yehowa lɛ, pɩtɩla pɩpɔzʋʋ se ɖɩlɛɣzɩ ɖa-lakasɩ yaa ɖɛ-wɛtʋ natʋyʋ. Ɩkalɩ Izaayii 48:17, 18; nɛ pʋwayɩ lɛ ɩtazɩ tɔm tʋnɛ tɩ-taa:
-
Ɛbɛ yɔɔ Yehowa pɔzʋʋ ɛ-taabalaa se pɛlɛɣzɩ pa-lakasɩ?
Taabalʋ kɩbanʋ tɔzʋʋ-ɖʋ mbʋ pɩpɩzɩɣ nɛ pɩkandɩyɩ ɖɔ-yɔɔ nɛ pɩwazɩ-ɖʋ yɔ pɩ-yɔɔ. Mbʋ ɖɔɖɔ Yehowa lakɩ ɛ-taabalaa.
6. Ɛbɛ Yehowa lakɩ ɛ-taabalaa?
Yehowa sɩɣnɩ ɛ-taabalaa se pɔɖɔkɩ kpam tɩlasɩ taa. Ɩcɔnɩ VIDEO, nɛ pʋwayɩ lɛ ɩtazɩ tɔm tʋnɛ tɩ-taa.
-
Halʋ weyi pɔyɔɔdɩ ɛ-tɔm video taa yɔ, ɛzɩma Yehowa sɩnɩ-ɩ nɛ ɛlʋbɩnɩ lɩmaɣza kɩdɛkɛda wena ɛɛwɛna yɔ?
Ɩkalɩ Izaayii 41:10, 13; nɛ pʋwayɩ lɛ ɩtazɩ tɔm tʋnɛ tɩ-taa:
-
Tamaɣ ŋga Yehowa labɩ ɛ-taabalaa tɩŋa?
-
Ŋmaɣzɩɣ se Yehowa pɩzɩɣ nɛ ɛkɛ taabalʋ kɩbanʋ na? Ɛbɛ yɔɔ?
Ña-taabalaa kɩbama sɩɣnɩ-ŋ alɩwaatʋ ndʋ pɩpɔzʋʋ se pasɩnɩ-ŋ yɔ. Yehowa kaɣ-ŋ sɩnʋʋ ɖɔɖɔ.
7. Pɩsa nɛ ŋkɛ Yehowa taabalʋ lɛ, pɩpɔzʋʋ se ŋyɔɔdʋʋnɩ-ɩ nɛ ŋwelisiɣni-i
Ye taabalaa ɩyɔɔdʋʋnɩ ɖama yɔ, pa-taabalɩyɛ cɛyɩsɩɣ camɩyɛ. Ɩkalɩ Keɣa 86:6, 11; nɛ pʋwayɩ lɛ ɩtazɩ tɔm tʋnɛ tɩ-taa:
-
Ɛzɩma ɖɩpɩzɩɣ nɛ ɖɩyɔɔdɩnɩ Yehowa?
-
Ɛzɩma Yehowa yɔɔdʋʋnɩ-ɖʋ?
Ðɩyɔɔdʋʋnɩ Yehowa alɩwaatʋ ndʋ ɖɩtɩmɩɣnɩ-ɩ yɔ, nɛ ɛyɔɔdʋʋnɩ-ɖʋ alɩwaatʋ ndʋ ɖɩkalɩɣ Bibl yɔ.
NABƐYƐ YƆƆDƲƲ SE: «Ɛyʋ ɛɛpɩzɩɣ nɛ ɛkɛ Ɛsɔ taabalʋ.»
-
Mayaɣ ŋga ŋpɩzɩɣ nɛ ŋlabɩnɩ tʋmɩyɛ nɛ ŋwɩlɩ se ɛyʋ pɩzɩɣ nɛ ɛkɛ Yehowa taabalʋ?
TOBI LƐ
Yehowa sɔɔlaa se ɛkɛ ña-taabalʋ nɛ ɛpɩzɩɣ nɛ ɛsɩnɩ-ŋ nɛ ŋñɔtɩnɩ-ɩ.
Tɔm taa tazʋʋ
-
Ɛzɩma Yehowa sɩɣnɩ ɛ-taabalaa?
-
Ɛbɛ yɔɔ Yehowa pɔzʋʋ ɛ-taabalaa se pɛlɛɣzɩ pa-lakasɩ?
-
Ŋmaɣzɩɣ se mbʋ Yehowa pɔzʋʋ ɛ-taabalaa se pala yɔ, pɩkɩlɩ kaɖɛ na? Ɛbɛ yɔɔ?
WONDU LƐƐTƲ
Ye ɖɩɖʋ taabalɩyɛ nɛ Ɛsɔ yɔ, ɛzɩma pɩkaɣ-ɖʋ wazʋʋ?
«Jéhovah: un Dieu qui mérite d’être connu» (La Tour de Garde, 15 février 2003)
Na mbʋ ŋpɩzɩɣ ŋla nɛ ŋkɛ Ɛsɔ taabalʋ yɔ.
Kalɩ nɛ ŋna mbʋ pʋyɔɔ halʋ nɔɔyʋ maɣzɩɣ se ɛ nɛ Yehowa pa-taabalɩyɛ yabɩ ɛ-ñʋʋ yɔ.
Welisini piya evelisi nasɩyɩ nɛ ŋna lɩmaɣza wena sɩwɛnɩ Yehowa yɔɔ yɔ.