DILONGI 08
Nge Lenda Kuma Nduku ya Yehowa
Yehowa ke zolaka nde nge zaba yandi mbote-mbote. Sambu na nki? Yandi ke zabaka nde kana nge longuka mambu mingi ya me tala bikalulu na yandi, mutindu yandi ke sadilaka bantu mambu mpi mambu yina yandi ke kana kusala sambu na nge, yo ta pusa nge mpenza na kukuma nduku na yandi. Keti nge lenda kuma kibeni nduku ya Nzambi? (Tanga Nkunga 25:14.) Inki nge lenda sala sambu na kukuma nduku ya Nzambi? Biblia ke pesaka bamvutu na bangiufula yai mpi yo ke monisaka sambu na nki Yehowa kele Nduku ya kuluta mbote yina nge lenda baka.
1. Inki mambu Yehowa ke lomba nge na kusala?
“Beno kwenda pene-pene na Nzambi, ebuna yandi ta kwisa pene-pene na beno.” (Yakobo 4:8) Yo ke tendula nki? Yehowa ke lomba nge na kukuma nduku na yandi. Bantu ya nkaka lenda yindula nde yo kele mpasi na kukuma nduku ya Nzambi sambu beto ke monaka yandi ve. Kansi Yehowa ke songaka beto bikalulu na yandi na Ndinga na yandi Biblia sambu beto sala kinduku ti yandi. Ntangu beto ke tangaka nsangu ya Nzambi ya kele na Biblia, kinduku na beto ti yandi ke kumaka ngolo ata beto lenda mona yandi ve.
2. Sambu na nki Yehowa kele Nduku ya kuluta mbote ya nge lenda baka?
Kele ve ti muntu mosi ya ke zolaka nge mingi kuluta Yehowa. Yandi ke zolaka nde nge vanda na kiese mpi nge samba yandi konso ntangu ya nge kele na mfunu ya lusadisu. Nge fwete ‘losa basusi na nge yonso na yandi sambu yandi ke kudiyangisaka sambu na nge.’ (1 Piere 5:7) Yehowa ke vandaka ntangu yonso ya kuyilama sambu na kusadisa banduku na yandi, kupesa bo kikesa mpi kuwidikila bo.—Tanga Nkunga 94:18, 19.
3. Inki nge fwete sala sambu na kukuma nduku ya Yehowa?
Yehowa ke zolaka bantu yonso, “kansi yandi ke taka kinduku ya ngolo ti bantu ya mbote.” (Bingana 3:32) Yehowa ke zolaka nde banduku na yandi kusala mambu yina yandi ke zolaka mpi bo buya mambu ya mbi. Bantu ya nkaka ke monaka nde bo ta kuka ve ata fioti kusala mambu yonso ya Yehowa ke zolaka mpi kubuya mambu ya mbi. Kansi Yehowa ke bakisaka bantu mbote. Yandi ke ndimaka konso muntu yina ke zolaka yandi na masonga yonso mpi ke salaka yonso sambu na kusepedisa yandi.—Nkunga 147:11; Bisalu 10:34, 35.
LONGUKA MAMBU MINGI
Beto tala mambu yina nge fwete sala sambu na kukuma nduku ya Yehowa mpi sambu na nki yandi kele Nduku ya kuluta mbote yina nge lenda vanda ti yandi.
4. Abrahami vandaka nduku ya Yehowa
Disolo ya Biblia ya ke tubila Abrahami (yina bo vandaka kubinga mpi Abrami) ke sadisa beto na kubakisa mambu yina beto lenda sala sambu na kukuma banduku ya Nzambi. Beno tanga disolo ya Abrahami na Kuyantika 12:1-4. Na nima beno pesa mvutu na bangiufula yai:
-
Inki Yehowa lombaka Abrahami na kusala?
-
Inki mambu Yehowa tubaka nde yandi ta sadila Abrahami?
-
Inki Abrahami salaka?
5. Mambu yina Yehowa ke zolaka nde banduku na yandi kusala
Mbala mingi beto ke zolaka nde banduku na beto kusadila beto mwa mambu.
-
Tanga mwa mambu ya nge ke zolaka nde banduku na nge kusadila nge.
Beno tanga 1 Yoane 5:3 mpi na nima beno pesa mvutu na ngiufula yai:
-
Inki mambu Yehowa ke zolaka nde banduku na yandi kusala?
Sambu na kulemfukila Yehowa, beto fwete yambula bikalulu ya mbi yina beto vandaka ti yo ntete. Beno tanga Yezaya 48:17, 18 mpi na nima beno pesa mvutu na ngiufula yai:
-
Sambu na nki Yehowa ke lombaka banduku na yandi na kuyambula bikalulu na bo ya mbi?
Nduku ya mbote ke songaka beto mambu yina lenda tanina beto mpi yina lenda natila beto mambote. Yehowa ke salaka mutindu mosi sambu na banduku na yandi
6. Mambu yina Yehowa ke salaka sambu na banduku na yandi
Yehowa ke sadisaka banduku na yandi na kukanga ntima na bampasi. Beno tala VIDEO mpi na nima beno pesa mvutu na ngiufula ya ke landa.
-
Inki mutindu Yehowa sadisaka nkento yai ya beto me tala na video na kununga bangindu na yandi ya mbi mpi mambu yina vandaka kuyangisa yandi?
Beno tanga Yezaya 41:10, 13 mpi na nima beno pesa mvutu na bangiufula yai:
-
Inki mambu Yehowa me tubaka nde yandi ta sadila banduku na yandi yonso?
-
Keti nge ke yindula nde Yehowa kele Nduku ya mbote? Sambu na nki?
Nduku ya mbote ke sadisaka nge ntangu nge kele na mfunu ya lusadisu. Yehowa ta sadisa nge mpi
7. Sambu na kukuma nduku ya Yehowa nge fwete solulaka ti yandi
Bantu ke kumaka banduku ya ngolo kana bo ke solula ntangu yonso. Beno tanga Nkunga 86:6, 11 mpi na nima beno pesa mvutu na bangiufula yai:
-
Inki mutindu beto lenda solula ti Yehowa?
-
Inki mutindu Yehowa ke solulaka ti beto?
Beto ke solulaka ti Yehowa ntangu beto ke sambaka yandi mpi yandi ke solulaka ti beto na nzila ya Biblia
BANTU YA NKAKA KE TUBAKA NDE: “Beto lenda kuma ve ata fioti banduku ya Nzambi.”
-
Inki verse nge lenda sadila sambu na kumonisa bo nde beto lenda kuma banduku ya Nzambi?
NA BUNKUFI
Yehowa ke zolaka kuta kinduku ti nge mpi yandi ta sadisa nge na kukuma nduku na yandi.
Inki Nge Me Simba?
-
Inki mutindu Yehowa ke sadisaka banduku na yandi?
-
Sambu na nki Yehowa ke lombaka banduku na yandi na kuyambula bikalulu na bo ya mbi?
-
Keti yo kele mpenza mpasi na kukuma nduku ya Yehowa? Kana mpidina to ve, sambu na nki?
TALA MPI
Inki mutindu kusala kinduku ti Nzambi lenda natila nge mambote na luzingu?
“Yehowa—Nzambi Yina Bantu Fwete Zaba” (Disolo ya kele na Nzozulu ya Nkengi)
Tala mutindu nge lenda kuma nduku ya Nzambi.
Tala sambu na nki nkento mosi ke tuba nde luzingu na yandi me bongaka sambu yandi me kumaka nduku ya Nzambi.
“Mono Vandaka Ve Kuzola Kufwa!” (Nzozulu ya Nkengi No. 1 2017)
Landa mambu yina baleke ke tuba sambu na kinduku na bo ti Yehowa.
Nge Lenda Sepela Mpi Ti
BANGIUFULA YINA BANTU KE YULAKA MINGI
Inki Mutindu Bambangi ya Yehowa Ke Longukaka ti Bantu Biblia?
Ntangu nge ke longuka Biblia ti Bambangi ya Yehowa, nge lenda sadila konso Biblia yina. Nge lenda bingisa mpi dibuta na beno to banduku na nge na kulonguka nzila mosi ti nge.
