à tỹ ũn ki kanhró há nĩn kỹ, ã tỹ ti mré há nĩnh mũ. Tag hã ri ke, Jeová tỹ ã mré há nĩnh sór mũ. Hã kỹ Jeová vỹ ã tỹ ti nén ũ há ag ki kanhró sór tĩ. Topẽ vỹ ã tỹ ti hã ren kỹ rãnhrãj mũ ki kanhró sór tĩ, kar ti tỹ ã mỹ nén ũ há ag vin sór mũ ag ti. Jeová vỹ ã tỹ ti to kanhrãn há han mũ ve sór tĩ. Gen kỹ ã tỹ ti mré há nĩnh sór ke mũ. Hã ra ẽg mỹ Topẽ mré há nỹtĩnh ke mũ hãn? (Salmo 25:14 le kem nĩ.) à ne han ke nĩ, ti mré há nĩ jé? Topẽ Vĩ Rá vỹ tag ag to kãmén tĩ, kar tóg ẽg mỹ kãmén tĩ, Jeová mré há nĩ vỹ ẽg mré ke há kar kãfór nĩ.

1. Jeová vỹ ã jé prẽr tĩ, ã tỹ ne han jé?

Topẽ Vĩ Rá vỹ ẽg mỹ ke tĩ: “Topẽ mré vĩ kỹ nỹtĩm nĩ, kỹ tóg ãjag to há nĩ sir.” (Tiago 4:8) Kỹ Jeová vỹ ã jé prẽr tĩ, ã tỹ ti mré há nĩ jé. Hãn ri ke mũn, ũn ag ãkrén tĩ: ‘Inh pi Topẽ vég tĩ, kỹ inh hã ren kỹ ti mré há nĩnh ke mũ?’. Hã ra Topẽ Vĩ Rá kãki, Jeová vỹ vẽso nén ũ e to kãmén tĩ, ẽg tỹ ti to kanhrãnrãn nỹtĩ jé. Gen kỹ ẽg vỹ ti mré há nỹtĩnh ke mũ sir. Ẽg tỹ Topẽ Vĩ Rá le ken kỹ, tag vỹ ẽg tỹ Jeová mré há kãfór nĩ han tĩ, ẽg tỹ ti vég ja tũ ra.

2. Jeová ne tugnĩn tỹ ã mré ke pẽ nĩ?

Jeová vỹ ã to há tãvĩ nĩ. Ti tỹ ã tỹ mỹ sér nĩ ve sór tĩ, kar ti tỹ ã ajũna ke sór tĩ gé. ‘Ã krĩ kufy nĩn kỹ ti hã mỹ tóm nĩ. Kỹ tóg ã mỹ ã krĩ kuprãg ke mũ. Ti hã vỹ ã ki rĩr nĩgtĩ’. (1 Pedro 5:7) Jeová vỹ ti mré ke ag ajũna ke, ag jagãgtãn, kar ti mré ke ag vĩ jẽmẽg nĩgtĩ. — Salmo 94:18, 19 le kem nĩ.

3. Jeová ne ve sór tĩ, ti mré ke ag ki?

Jeová vỹ vẽnh kar to há nĩ, hã ra ti tỹ “ũn tỹ vẽjykre há han mũ ag to há nĩ”. (Provérbios 3:32) Jeová tỹ ti mré ag tỹ vãsãnsãn mũ ve sór tĩ, ag tỹ ti jykre hã han jé, kar nén ũ kórég han tũ nỹtĩ jé gé. Ũn pipir ag vỹ ãkrén tĩ: ‘Inh pi hã re kã Topẽ vĩ han kãn ke mũ.’ Hã ra Jeová tỹ ẽg ki kanhró nĩ. Ũn tỹ ti to há tãvĩ tĩ ag, ũn tỹ ti vĩ króm vãsãn tĩ ag, ag kar tỹ tỹ ti mré ke nĩnh ke mũ. — Salmo 147:11; Han kãme 10:34, 35.

 VẼNH KANHRÃN KÃFÓR NĨ

4. Abraão tỹ tỹ Jeová mré ke nĩ vã

Topẽ Vĩ Rá vỹ Abraão (ti jyjy ũ vỹ tỹ Abrão nĩ) to kãmén kỹ, tag vỹ ẽg kanhrãnrãn tĩ, ne nỹ ũn tỹ Topẽ mré há nĩ ti to. Abraão to le kem nĩ, Gênesis 12:1-4 ki. Kar jagnẽ mré vẽmén nĩ, nén ũ tag ag to:

• Jeová ne Abraão mỹ to vĩ ke, ti tỹ han jé?

• Jeová ne Abraão mỹ tó ja, ti tỹ Abraão mỹ nén há han ke mũ vã to?

• Abraão ne han ke?

5. Jeová ne ti mré ke ag mỹ to vĩ tĩ?

Kejẽn ẽg tỹ ẽg mré ke ag jãvãnh tĩ, ag tỹ nén ũ hyn han jé.

• Ã mré ke ũ tỹ ã mỹ nén ũ han kỹ, nén ũ tỹ ne ã mỹ há nĩ?

1 João 5:3 le kem nĩ. Kar jagnẽ mré vẽmén nĩ, tag to:

• Jeová ne ve sór tĩ, ti mré ag ki?

Ẽg tỹ ẽg jykre vẽnh mỹ ag tovãnh ke nỹtĩ, ẽg tỹ Jeová vĩ ki króm jé. Isaías 48:17, 18 le kem nĩ. Kar jagnẽ mré vẽmén nĩ, tag to:

• Jeová ne tugnĩn ti mré ke ag mỹ to vĩ tĩ, ag tỹ ag vẽjykre vẽnh mỹ tovãnh jé?

 6. Jeová ne ti mré ke há ag mỹ han tĩ?

 Ã NE KANHRÃN JA TI

Jeová tỹ ã mré há nĩ sór mũ, ti tỹ ã ajũna ke kenh mũ, ã tỹ ti mré há kãfór nĩ jé.

Jykrinkrén mũ

• Jeová hã ren kỹ ti mré ke ag ajũna ke tĩ?

• Jeová ne tugnĩn ti mré ag mỹ to vĩ tĩ, ag tỹ ag vẽjykre vẽnh mỹ tugvãnh jé?

• Ã hã mỹ, mỹ jagy nĩ, ã tỹ Jeová mré há nĩ jé? Ã ne tugnĩn ge ãkrén tĩ?