U Jehobah u kwah ïa phi ban tip kham bha shaphang jong u. Balei? U don ka jingkyrmen ba katba phi nang pule shaphang ki jinglong jong u, ki rukom leh bad ki jingthmu jong u, katta phin nang kwah ban kham jan sha u bad ban long ki paralok jong u. Hato phi lah shisha ban long ki paralok jong U Blei? (Pule Jakob 2:23.) Kaei kaba phi lah ban leh ban long u ne ka paralok jong U Blei? Balei ngi lah ban ong ba ngin ym ïoh shuh ki paralok kiba kham bha ban ïa U Jehobah? Ka Baibl ka jubab ïa kito ki jingkylli.

1. U Jehobah u khot ieid ïa phi ban leh aïu?

“To wan hajan ïa U Blei, te un wan hajan ïa phi.“ (Jakob 4:8) Kane ka mut aïu? U Jehobah u khot ieid ïa phi ban long ki paralok jong u. Don kiba pyrkhat ba kan long kaba eh ban long ki paralok jong U Blei namar ngim lah ban ïohi ïa u. Hynrei ha ka Baibl, U Jehobah u la ïathuh lut ïa ngi shaphang jong u khnang ba ngin lah ban jan sha u. Haba ngi pule ïa ka Baibl, ka jingïadei paralok jong ngi bad u kan nang kham jan wat la ngim lah ban ïohi ïa u.

2. Balei U Jehobah u dei u paralok uba biang tam ba phi lah ban ïoh?

Ym don mano mano ruh ba kham ieid ïa phi kumba ieid U Jehobah. U kwah ïa phi ban long kiba kmen bad ban duwai sha u haba phi donkam. Phi lah ban “bred halor jong u ïa ka jingkhuslai jong phi baroh, naba u sumar sukher ma u shaphang jong phi.” (1 Petros 5:7) Barobor, U Jehobah u long uba kloi ban kyrshan, ban pyntngen bad ban sngap ïa ki paralok jong u.—Pule Salm 94:18, 19.

3. U Jehobah u khmih lynti aïu na ki paralok jong u?

U Jehobah u ieid ïa ki briew baroh, “hynrei u ïa jan bad kito kiba leh ïa ka hok.” (Proberb 3:32, NWT) U Jehobah u ïathuh ïa ki paralok jong u ïa kaei kaba bha bad ïa kaei kaba sniew, te u kwah ïa ki ban leh ïa kiei kiei kiba bha bad ban kiar ïa kiei kiei kiba sniew. Don kiba sngew ba kin ym lah ban im katkum ki aiñ bad ki kyndon jong U Jehobah. Hynrei U Jehobah u long uba sngewthuh. U pdiang ïa baroh kito kiba ieid shisha ïa u bad ïa kito kiba pyrshang ban im katkum ka mon ka jong u.—Salm 147:11; Kam 10:34, 35.

 WAD SHUH SHUH

4. U Abraham u dei u paralok jong U Jehobah

Ka Baibl ka ïathuh shaphang uwei u briew uba kyrteng u Abraham (ba ju khot ruh u Abram). Na ka jingïathuhkhana jong u ngi ïoh ban tip ïa kaei kaba ngi dei ban leh ban ïoh long ki paralok jong U Blei bad kiei ki jingkyrkhu kiba ngin ïoh. Pule shaphang u Abraham ha Jenesis 12:1-4. Nangta sa ïa peit lang ïa kine ki jingkylli harum:

• U Jehobah u ong ïa u Abraham ban leh aïu?

• U Jehobah u kular aïu ïa u?

• Kumno u Abraham u la leh?

5. U Jehobah u kwah aïu na ki paralok jong u

Ngi ju khmih lynti ïa kiei kiei kiba bha na la ki paralok.

• Kumno phi kwah ba ki paralok jong phi kin leh ïa phi?

Pule 1 Ïoannis 5:3, bad nangta sa ïa peit lang ïa kane ka jingkylli harum:

• U Jehobah u khmih lynti aïu na ki paralok jong u?

Khnang ban kohnguh ïa U Jehobah ngi donkam ban kylla ïa la ki jinglong bad ki rukom leh jong ngi. Pule Isaïah 48:17, 18, bad nangta sa ïa peit lang ïa kane ka jingkylli harum:

• Balei U Jehobah u ong ïa la ki paralok ban kylla?

 6. U Jehobah u leh aïu ïa la ki paralok

 KI MAT BAKONGSAN

U Jehobah u kwah ban long u paralok jong phi, bad un ïarap ïa phi ban jan sha u.

Peit Biang

• Kumno U Jehobah u ïarap ïa ki paralok jong u?

• Balei U Jehobah u ong ïa ki paralok jong u ban kylla?

• Hato phi tharai ka long kaba eh bha ban long paralok bad U Jehobah? Balei?