Jehova okwa hala u mu shiive nawa. Omolwashike mbela? Oku shii kutya ngeenge owa shiiva omaukwatya aye, eendjila nosho yo omalalakano aye, oto ka kala wa halelela okuninga kaume kaye. Ohatu dulu ngoo shili okupanga oukaume naKalunga? (Lesha Epsalme 25:14.) Oshike u na okuninga po, opo u pange oukaume naye? Ombiibeli otai yandje omanyamukulo komapulo oo, noya ulika kutya omolwashike sha fimana okupanga oukaume naJehova.

1. Jehova ote ku shivi u ninge shike?

“Eheneni kuKalunga, opo nee Ye ta ehene kunye.” (Jakob 4:8) Osho osha hala okutya shike? Jehova ote ku shivi u ninge kaume kaye. Vamwe otashi dulika va mone shidjuu okupanga oukaume naKalunga, molwaashi kave mu wete. Ashike okupitila mEendjovo daye, Jehova okwe tu hololela omaukwatya aye, opo tu dule okupanga oukaume naye. Ngeenge hatu lesha Eendjovo daye Ombiibeli, ekwatafano letu naye ohali ende tali pame, nonande inatu mu mona nande onale.

2. Omolwashike Jehova e li kaume a denga mbada?

Jehova oku ku hole neenghono e dulife ovanhu aveshe. Okwa hala u kale wa hafa nou kale ho pula ekwafo kuye okupitila meilikano. Oto dulu oku mu ‘shiivifila oisho yoye aishe, molwaashi oku na ko nasha naave.’ (1 Petrus 5:7) Jehova oha kala alushe e lilongekida okuyambidida, okuhekeleka nokupwilikina kookaume kaye.— Lesha Epsalme 94:18, 19.

3. Jehova okwa teelela ookaume kaye va ninge shike?

Jehova oku hole ovanhu aveshe, ashike oku hole unene ‘ovayuki.’ (Omayeletumbulo 3:32) Jehova okwa teelela ookaume kaye va ninge oinima oyo iwa nokuhenuka oyo ii. Vamwe otashi dulika va kale ve udite kutya kashipu okudulika komifikamhango daJehova di na sha naasho shi li mondjila nosho yo osho sha puka. Ashike nande ongaho, Jehova oku shi udite ko. Oha tambula ko aveshe ovo ve mu hole nohava ningi eenghendabala ve mu hafife.— Epsalme 147:11; Oilonga 10:34, 35.

 KONAKONA MOULE

4. Abraham okwa li kaume kaJehova

Ehokololo lopaMbiibeli li na sha naAbraham (oo a li yo ha ifanwa Abram) otali tu kwafele tu ude ko kutya osha hala okutya naanaa shike okupanga oukaume naKalunga. Lesha ehokololo kombinga yaAbraham muGenesis 12:1-4, ndele tamu kundafana omapulo taa shikula:

• Jehova okwa li a pula Abraham a ninge shike?

• Okwa li e mu udanekela shike?

• Abraham okwa li e linyenga ngahelipi komalombwelo aJehova?

5. Osho Jehova a teelela ookaume kaye va ninge

Luhapu ohatu kala twa teelela ookaume ketu ve tu ningile sha.

• Mbela oinima ilipi ho kala wa hala ookaume koye ve ku ningile?

Lesha 1 Johannes 5:3, ndele tamu kundafana epulo tali shikula:

• Jehova okwa teelela ookaume kaye va ninge shike?

Opo tu dule okupanga oukaume naJehova, otwa pumbwa okulundulula omaukwatya nosho yo elihumbato letu. Lesha Jesaja 48:17, 18, ndele tamu kundafana epulo tali shikula:

• Omolwashike Jehova a hala ookaume kaye va ninge omalunduluko?

 6. Nghee Jehova ha kwafele ookaume kaye

 ENGONGO

Jehova okwa hala u ninge kaume kaye nota dulu oku ku kwafela u ninge ngaho.

Eendululo

• Ongahelipi Jehova a kwafela ookaume kaye?

• Omolwashike Jehova ha pula ookaume kaye va ninge omalunduluko?

• Mbela oto diladila kutya kashi fi shipu okukala kaume kaJehova? Omolwashike, nongeenge hasho, omolwashike?