Yehow i mukat bwa umumanyik bilengel menmen. Bwabiny? Bwaal i mutakamin neey, umanyik biikadil bindiy, mushind udyey ulong myand, ni myand yidyey mulongolol, ni hawumumamanyik bikasakan wiiyiiy kudy nend bulund. Wiitaatabok neey, kudy mushind wiibuh kudy bulund ni Mawej biin-biin eeny? (Balaay Musambw 25:14.) I biny biwudy mwa kulong bwiibuh kudy bulund ni Mawej? Bibl waalaalabul majooj aam ni uleeleej bwabiny kudy bulund ni Yehow i bwaal bwa buseeb buwudy mwa kulong.

1. I biny bidy Yehow ulomb balund bindiy?

“Fweejaay habwiih ni Mawej naak, yiy wiiyiiy kufweej habwiih neen.” (Jak 4:8) Kufweej habwiih ni Mawej kumvumvwiij biny? Yehow ukuloolomb bwa udy nend bulund. Baat bakwaabw balaalang neey, i bikasakan bwa kudy bulund ni Mawej bwaal katwiin banj kumutaloh. Naak, mu Bibl, Diiy dindiy, Yehow wiituleeleejomw myand yitukaakaam kumanyik bwa biikadil bindiy, yidy mwa kwiitwambulwiish bwa kufweej nend habwiih. Hatubaabal musah a Mawej udy mu Bibl, bulund bwiitut ni Yehow bukaakasakan ning mutudy katuy banj kumutaloh.

2. Bwabiny Yehow i mulund mulengel uwudy mwa kwiikal nend?

Yehow i mukukat bikasakan kuhitok mudy baat bakwaabw bakukat. I mukat bwa wiikal ni musangal ni udy neeb habwiih diib dyoos diwukaakaam dyambulwiish. Udy mwa ‘kumwiihwiil malang-lang miibuh moosolol, bwaal i yiy ukulaalam.’ (1 Pyeel 5:7) Yehow udy teng habwiih bwa kwambulwiish, kukashish, ni kukun balund bindiy mat.​—Balaay Musambw 94:18, 19.

3. I biny bidy Yehow wiitulomb bwa kulong bwiitut kudy nend bulund?

Yehow i mukat baat boos, nang-nang “i mukat teng baloolong myand yijaalal.” (Tusumw 3:32) Yehow i mukat bwa balund bindiy balong myand yilengel ni balek kulong myand yitaataley neey, i yibiih. Baat bakwaabw balaalang neey, i bikasakan bwa kulond mikenj ya Yehow ya cidy cilengel ni cidy cibiih. Yehow udy ni lus luvul. Muut woos uciiciin Mawej ni ulong myand yiwaakan, umusaasangeej.​—Musambw 147:11; Myand Yilongel Bapostol 10:34, 35.

 TWEEL MU BONDOK

4. Abraham waakady mulund a Yehow

Mu Bibl mudy myand ya Abraham (waakadyobw babiikan cikwaabw Neey, Abram) yituloolongweesh ciitudy mwa kulong bwa kudy bulund ni Mawej. Balaay myand Yitaatal Abraham yidy mu Kutang kwa Bwanjil 12:1-4. Ni nwiisambil ha majooj aam:

• I biny byaakady Yehow mwambil Abraham bwa kulong?

• Yehow ulayil Abraham biny?

• Abraham ulongel biny haakady Yehow mumuleej cya kulong?

5. Myand yidy Yehow ulomb balund bindiy

Tudyaakal teng batakamin bwa balund biitut bitulongel bwaal kaahand.

• I myand kaay yiwudy mukat bwa balund biibuh bakulongel?

Balaay 1 Jah 5:3, ni isambilaay ha diijooj eedy:

• Yehow uloolomb balund bindiy bwa balong biny?

Bwa kukooyel Yehow, bikaam tushiitulul bilong biitut ni biikadil biitut. Balaay Yeshaay 48:17, 18, ni isambilaay ha diijooj eedy:

• Bwabiny Yehow uloolomb balund bindiy bwa bashiituluk?

 6. Myand yidy Yehow ulongel balund bindiy

 CYA KUKWAAT

Yehow i mukat bwa kudy nend bulund, ni wiiyiiy kukwambulwiish bwa ufweej nend habwiih.

Bwa kuvuluk

• I mushind kaay udy Yehow wambulwiish balund bindiy?

• Bwabiny Yehow uloolomb balund bindiy bwa bashiituluk?

• Ulaalangok neey, i bikasakan menmen bwa kudy bulund ni Yehow eeny? Bwabiny?