LƐSIN 08

Yu Kin Bi Gɔd in Padi

PLE

Jiova want yu fɔ no am mɔ. Wetin mek? I no se di mɔ we yu lan bɔt in kwaliti dɛn, di we aw i de du tin, ɛn wetin i want fɔ yu, na di mɔ yu go want fɔ bi in padi. Yu tink se i pɔsibul fɔ mek yu bi Gɔd in padi? (Rid Jems 2:23.) Wetin yu go du fɔ mek yu bi Gɔd in padi? Di Baybul ansa dɛn kwɛstyɔn dɛn de ɛn i sho wetin mek padi biznɛs wit Jiova na di bɛst tin we go ɛva apin to yu.

1. Wetin Jiova want yu fɔ du?

“Kam nia Gɔd, ɛn insɛf go kam nia [yu].” (Jems 4:8) Wetin dis min? Jiova de invayt yu fɔ bi in padi. Sɔm pipul dɛn kin se i nɔ pɔsibul fɔ bi Gɔd in padi bikɔs wi nɔ de si am. Bɔt Jiova dɔn yuz in Wɔd, di Baybul, fɔ sho wi ɔl wetin wi nid fɔ no bɔt di kayn Gɔd we i bi so dat wi go kam nia am. We wi rid Jiova in mɛsej insay di Baybul, wi padi biznɛs wit am de tayt mɔ ɛn mɔ pan ɔl we wi nɔ wande si am.

2. Wetin mek Jiova na di bɛst Padi we yu go gɛt?

Nɔbɔdi nɔ go lɛk yu pas aw Jiova lɛk yu. I want fɔ mek yu gladi ɛn tɔk to am ɛnitɛm we yu nid ɛp. Yu kin lɛf “ɔl wetin de wɔri [yu] na in an, bikɔs i bisin bɔt [yu].” (1 Pita 5:7) Jiova rɛdi ɔltɛm fɔ sɔpɔt, kɔrej, ɛn lisin to in padi dɛn.—Rid Sam 94:18, 19.

3. Wetin Jiova want wi fɔ du fɔ bi in padi?

Jiova lɛk ɔlkayn pipul dɛn, bɔt “I de mek tayt padi biznɛs wit di wan dɛn we de du wetin rayt.” (Prɔvabs 3:32, NWT) Jiova want in padi dɛn fɔ tray fɔ du tin dɛn we fayn na in yay ɛn avɔyd fɔ du tin dɛn we bad. Sɔm pipul dɛn fil se dɛn nɔ go ebul fɔ du ɔl wetin Jiova want dɛn fɔ du ɛn avɔyd fɔ du ɔl wetin bad. Bɔt Jiova rili gɛt sɔri-at. I de gladi fɔ di wan dɛn we rili lɛk am ɛn de du dɛn bɛst fɔ mek i gladi.—Sam 147:11; Akt 10:34, 35.

LAN MƆ

Lan mɔ bɔt aw yu go bi Jiova in padi, ɛn wetin mek i go bi di bɛst Padi we yu go gɛt.

4. Ebraam na bin Jiova in padi

Di Baybul in akawnt bɔt Ebraam (we dɛn de kɔl bak Ebram) ɛp wi fɔ ɔndastand wetin i min fɔ bi Gɔd in padi. Rid bɔt Ebraam na Jɛnɛsis 12:1-4. Dɔn una tɔk bɔt dɛn kwɛstyɔn dɛn ya:

Wetin Jiova bin tɛl Ebraam fɔ du?
Wetin Jiova bin prɔmis am?
Wetin Ebraam bin du bɔt di tin dɛn we Jiova bin tɛl am?

5. Wetin Jiova want in padi dɛn fɔ du?

Wi kin want wi padi dɛn fɔ du sɔm patikyula tin dɛn.

Wetin na sɔm tin dɛn we yu go lɛk fɔ mek yu padi dɛn du fɔ yu?

Rid 1 Jɔn 5:3, dɔn una tɔk bɔt dis kwɛstyɔn:

Wetin Jiova want in padi dɛn fɔ du?

Fɔ mek wi go obe Jiova, wi nid fɔ chenj di we aw wi de biev. Rid Ayzaya 48:17, 18, dɔn una tɔk bɔt dis kwɛstyɔn:

Wetin mek Jiova want in padi dɛn fɔ lɛf fɔ du tin dɛn we bad?

Gud padi go mɛmba wi bɔt tin dɛn we go protɛkt wi ɛn bɛnifit wi. Jiova de du di sem tin fɔ in padi dɛn

6. Wetin Jiova de du fɔ ɛp in padi dɛn?

Jiova de ɛp in padi dɛn fɔ bia wit dɛn prɔblɛm dɛn. Ple di VIDIO dɔn una tɔk bɔt di kwɛstyɔn we de dɔŋ.

VIDIO: Jiova Dɔn Du Bɔku Tin fɔ Mi (3:20)

Aw Jiova bin ɛp di uman na di vidio fɔ dil wit di bad we aw i bin de tink ɛn fil?

Rid Ayzaya 41:10, 13, dɔn una tɔk bɔt dɛn kwɛstyɔn dɛn ya:

Wetin Jiova prɔmis fɔ du fɔ ɔl in padi dɛn?
Yu tink se Jiova go bi gud Padi? Wetin mek yu tink so?

Yu tayt padi dɛn go ɛp yu di tɛm we yu nid ɛp. Jiova sɛf go ɛp yu

7. Fɔ bi Jiova in padi min se wi fɔ de tɔk to am ɛn lisin to am

We tu padi dɛn de tɔk to dɛnsɛf, dɛn padi biznɛs go tayt mɔ ɛn mɔ. Rid Sam 86:6, 11, dɔn una tɔk bɔt dɛn kwɛstyɔn dɛn ya:

Aw wi go ebul tɔk wit Jiova?
Aw Jiova de tɔk to wi?

Wi de tɔk to Jiova we wi pre to am; i de yuz di Baybul fɔ tɔk to wi

SƆM PIPUL DƐN KIN SE: “I nɔ pɔsibul fɔ bi Gɔd in padi.”

Us skripchɔ yu go yuz fɔ sho se i pɔsibul fɔ bi Jiova in padi?

WETIN YU DƆN LAN?

Jiova want fɔ bi yu Padi, ɛn i go ɛp yu fɔ kam nia am.

Rivyu

Aw Jiova de ɛp in padi dɛn?
Wetin mek Jiova want in padi dɛn fɔ lɛf fɔ du tin dɛn we bad?
Yu tink se i pɔsibul fɔ bi Jiova in padi? Wetin mek yu tink so? ɔ wetin mek yu nɔ tink so?

Di det we a dɔn dis lɛsin:

Gol

Tɛl yu padi sɔntin we yu dɔn lan bɔt Jiova.

Ɔda Gol:

Yu ɔda gol