တၢ်မၤလိ ၈
နကဲထီၣ် ယဟိဝၤယွၤ အသကိးသ့
ယဟိဝၤယွၤ အဲၣ်ဒိးလၢ နကသ့ၣ်ညါအီၤဂ့ၤထီၣ်. ဘၣ်မနုၤအဃိ အဝဲအဲၣ်ဒိးဝဲဒ်န့ၣ်လဲၣ်. ကစၢ်ယွၤ အဲၣ်ဒိးဝဲလၢ နကမၤလိအါထီၣ် ဘၣ်ဃးဒီး အတၢ်ဂ့ၤတၢ်ဝါ, အဝဲရ့ဒီး ပှၤဟီၣ်ခိၣ်ဖိဒ်လဲၣ် ဒီးအတၢ်တိာ်ပာ် အိၣ်လၢနဂီၢ်ဒ်လဲၣ်. နသ့ၣ်ညါ အဂ့ၢ်မ့ၢ်အါထီၣ်န့ၣ် နကအဲၣ်ဒိး ကဲထီၣ်အသကိးလီၤ. နကဲထီၣ် ကစၢ်ယွၤ အသကိး သ့အနီၢ်ကီၢ်ဧါ. (ဖး စံးထီၣ်ပတြၢၤ ၂၅:၁၄.) ဒ်သိးနကကဲထီၣ် ကစၢ်ယွၤအသကိးအဂီၢ် နကဘၣ်မၤမနုၤလဲၣ်. လံာ်စီဆှံ ပာ်ဖျါထီၣ်န့ၢ်ပှၤ တၢ်သံကွၢ်တဖၣ်အံၤ အတၢ်စံးဆၢလီၤ. တကးဒံးဘၣ် လံာ်စီဆှံ ပာ်ဖျါထီၣ် စ့ၢ်ကီးဝဲလၢ ယဟိဝၤယွၤန့ၣ် မ့ၢ်ဝဲ သကိးလၢအဂ့ၤ.
၁. ယဟိဝၤယွၤ အဲၣ်ဒိးလၢ နကမၤမနုၤလဲၣ်.
လံာ်စီဆှံ တဲဘၣ်ပှၤလၢ “သုးဘူးသုသးဆူ ကစၢ်ယွၤအအိၣ်တက့ၢ်. ဒီးအဝဲကသုးဘူးအသး ဆူသုအိၣ်လီၤ.” (ယၤကိာ် ၄:၈) လံာ်စီဆှံတဆၢအံၤ အဲၣ်ဒိးတဲဝဲ အခီပညီဒ်လဲၣ်. ယဟိဝၤယွၤ အဲၣ်ဒိးလၢ နကကဲထီၣ် အသကိးလီၤ. ပှၤတနီၤနီၤန့ၣ် ဆိကမိၣ်ဝဲလၢ အဝဲသ့ၣ် ထံၣ်ကစၢ်ယွၤ တသ့ဘၣ်အဃိ အကဲထီၣ် ကစၢ်ယွၤ အသကိးတသ့ဘၣ်. ဘၣ်ဆၣ် ဒ်သိး ပကကဲထီၣ် ယဟိဝၤယွၤ အသကိး ဒီးသ့ၣ်ညါအါထီၣ်အီၤအဂီၢ် လံာ်စီဆှံပာ်ဖျါထီၣ်န့ၢ်ပှၤ ယဟိဝၤယွၤ အတၢ်ဂ့ၤတၢ်ဝါအါမး. အဃိ ပမ့ၢ်တထံၣ်ဘၣ် ယဟိဝၤယွၤ နီတဘျီဘၣ် သနာ်က့ ပမ့ၢ်ဖးအကလုၢ်ကထါ လံာ်စီဆှံန့ၣ် ပတၢ်ရ့လိာ်သးဒီးအီၤ ကဂ့ၤဒိၣ်ထီၣ်ဝဲ.
၂. ဘၣ်မနုၤအဃိ ယဟိဝၤယွၤန့ၣ် အကဲဝဲ သကိးလၢအဂ့ၤကတၢၢ်လဲၣ်.
ပှၤလၢအအဲၣ်နၤ ဒိၣ်န့ၢ်ဒံး ယဟိဝၤယွၤန့ၣ် တအိၣ်နီတဂၤဘၣ်. ကစၢ်ယွၤ အဲၣ်ဒိးလၢ နကအိၣ်ဒီးတၢ်သးခု ဒီးနမ့ၢ်လိၣ်ဘၣ် တၢ်မၤစၢၤ တဘျီဂ့ၤတဘျီဂ့ၤန့ၣ် အဝဲအဲၣ်ဒိးလၢ နကဃ့အီၤတၢ်မၤစၢၤ. ‘မ့ၢ်လၢ ကစၢ်ယွၤ သးအိၣ်နၤအဃိ နပာ်ထီၣ် နတၢ်ဘၣ်ယိၣ်ဘၣ်ဘှီခဲလၢာ်လၢ အအိၣ်’ သ့လီၤ. (၁ ပ့းတရူး ၅:၇) ယဟိဝၤယွၤန့ၣ် အိၣ်ကတဲာ်ကတီၤအသး ထီဘိ လၢအကဆီၣ်ထွဲမၤစၢၤ အသကိးတဖၣ်, မၤမုာ်ထီၣ်အဝဲသ့ၣ်အသး ဒီးဒိကနၣ်န့ၢ် အဝဲသ့ၣ်လီၤ.—ဖး စံးထီၣ်ပတြၢၤ ၉၄:၁၈, ၁၉.
၃. ဒ်သိး ပကကဲဘၣ် ကစၢ်ယွၤအသကိးအဂီၢ် ပကဘၣ်မၤမနုၤလဲၣ်.
ယဟိဝၤယွၤ အဲၣ်ပှၤဟီၣ်ခိၣ်ဖိခဲလၢာ် “ဘၣ်ဆၣ် ပှၤလၢအသူၣ်ဘျၢသးဘျၢန့ၣ် ကစၢ်ယွၤ ရ့ဒီးအီၤဘူးဘူးလီၤ.” (ကတိၤဒိ ၃:၃၂) ယဟိဝၤယွၤ အဲၣ်ဒိးဝဲလၢ အသကိးတဖၣ် ကဂုာ်ကျဲးစၢး မၤတၢ်လၢ အထံၣ်ဝဲလၢအဂ့ၤ ဒီးဟးဆှဲး တၢ်လၢအထံၣ်ဝဲလၢ အတဂ့ၤဘၣ်တဖၣ်. တၢ်လၢယဟိဝၤယွၤ ပာ်ပနီၣ်ဝဲလၢအဂ့ၤ ဒီးအတဂ့ၤဘၣ်န့ၣ် ပှၤတနီၤနီၤ ဆိကမိၣ်ဝဲလၢ အဝဲသ့ၣ် မၤပိာ်ထွဲဝဲတန့ၢ်ဘၣ်. ဘၣ်ဆၣ် ယဟိဝၤယွၤန့ၣ် မ့ၢ်ပှၤလၢ အနၢ်ပၢၢ်စၢၤပှၤလီၤ. အဃိ ပှၤလၢအအဲၣ် ကစၢ်ယွၤ နီၢ်ကီၢ် ဒီးဂုာ်ကျဲးစၢးအဂ့ၤကတၢၢ် ဒ်သိးကမၤအတၢ်ဘၣ်သးန့ၣ် ကစၢ်ယွၤ တူၢ်လိာ်ဝဲ ကိးဂၤဒဲးလီၤ.—စံးထီၣ်ပတြၢၤ ၁၄၇:၁၁; မၤတၢ် ၁၀:၃၄, ၃၅.
ဃုသ့ၣ်ညါအါထီၣ်
ခဲအံၤ ပကမၤလိသကိးလၢ ပကဲထီၣ် ယဟိဝၤယွၤ အသကိးကသ့ဒ်လဲၣ်. ဒီးပကမၤလိဘၣ်လၢ ဘၣ်မနုၤအဃိ ယဟိဝၤယွၤန့ၣ် အကဲဝဲသကိးလၢ အဂ့ၤကတၢၢ်တဂၤလဲၣ်.
၄. စီၤအၤဘြၤဟၣ်န့ၣ် အကဲဝဲ ယဟိဝၤယွၤ အသကိး
စီၤအၤဘြၤဟၣ် (ပှၤကိးစ့ၢ်ကီးအီၤလၢ စီၤအၤဘြၣ်) အဂ့ၢ် လၢအအိၣ်လၢ လံာ်စီဆှံပူၤန့ၣ် မၤစၢၤပှၤဒ်သိး ပကနၢ်ပၢၢ်လၢ ပကဲထီၣ် ကစၢ်ယွၤ အသကိးသ့လီၤ. ဖးဘၣ်ဃးဒီး စီၤအၤဘြၤဟၣ်အဂ့ၢ်ဖဲ ၁ မိၤၡ့ ၁၂:၁-၄. ဝံၤဒီး တဲသကိး တၢ်သံကွၢ် လၢလာ်တဖၣ်အံၤ–
-
ယဟိဝၤယွၤ မၢစီၤအၤဘြၤဟၣ် မၤမနုၤလဲၣ်.
-
ယဟိဝၤယွၤ အၢၣ်လီၤအီၤမနုၤလဲၣ်.
-
စီၤအၤဘြၤဟၣ် မၤဝဲဒ်လဲၣ်.
၅. တၢ်လၢယဟိဝၤယွၤ မုၢ်လၢ်ဝဲလၢ အသကိးတဖၣ်အအိၣ်
ညီနုၢ်န့ၣ် ပမုၢ်လၢ်တၢ်တမံၤမံၤ လၢပသကိးတဖၣ်အအိၣ်.
-
နမုၢ်လၢ်လၢ နသကိးတဖၣ် ကမၤန့ၢ်နၤ မနုၤလဲၣ်.
ဖး ၁ ယိၤဟၣ် ၅:၃ ဝံၤဒီး တဲသကိး တၢ်သံကွၢ် လၢလာ်တဖျၢၣ်အံၤ–
-
ယဟိဝၤယွၤ မုၢ်လၢ်ဝဲလၢ အသကိးတဖၣ် ကမၤမနုၤလဲၣ်.
ဒ်သိးပကဒိကနၣ် ယဟိဝၤယွၤ အကလုၢ်အဂီၢ် ပကဘၣ်ဆီတလဲ ပသကဲာ်ပဝး ဒီးပတၢ်ပာ်သူၣ်ပာ်သး. ဖး ယၡါယၤ ၄၈:၁၇, ၁၈ ဝံၤဒီး တဲသကိး တၢ်သံကွၢ် လၢလာ်တဖျၢၣ်အံၤ–
-
ဘၣ်မနုၤအဃိ ယဟိဝၤယွၤ မုၢ်လၢ်ဝဲလၢ အသကိးတဖၣ် ကဒိကနၣ် အတၢ်မၤလိာ်လဲၣ်.
နသကိး လၢအဂ့ၤတဂၤန့ၣ် အဝဲကဒီသဒၢနၤ ဒီးအဝဲကမၢနမၤတၢ်လၢ အကဲဘျုးလၢနဂီၢ်. ယဟိဝၤယွၤစ့ၢ်ကီး အဝဲရ့ဒီး အသကိးတဖၣ်ဒ်န့ၣ်လီၤ
၆. ယဟိဝၤယွၤ မၤစၢၤအသကိးတဖၣ်
ယဟိဝၤယွၤ မၤစၢၤအသကိးတဖၣ် ဒ်သိးအဝဲသ့ၣ် လဲၤခီဖျိ တၢ်ကီတၢ်ခဲကန့ၢ်. ကွၢ်တၢ်ဂီၤမူ ဝံၤဒီး တဲသကိး တၢ်သံကွၢ် လၢလာ်တဖျၢၣ်အံၤ.
-
လၢတၢ်ဂီၤမူအပူၤ ပိာ်မုၣ်တဂၤလၢ အအိၣ်ဒီးတၢ်တူၢ်ဘၣ် ဒီးတၢ်ထံၣ်လၢအတဂ့ၤဘၣ်န့ၣ် ယဟိဝၤယွၤ မၤစၢၤတ့ၢ်အီၤဒ်လဲၣ်.
ဖး ယၡါယၤ ၄၁:၁၀, ၁၃ ဝံၤဒီး တဲသကိး တၢ်သံကွၢ် လၢလာ်တဖၣ်အံၤ–
-
ယဟိဝၤယွၤ အၢၣ်လီၤဝဲလၢ အကမၤန့ၢ် အသကိးတဖၣ် တၢ်မနုၤလဲၣ်.
-
နဆိကမိၣ် ယဟိဝၤယွၤန့ၣ် အကဲသကိး လၢအဂ့ၤတဂၤဧါ. ဘၣ်မနုၤအဃိ နဆိကမိၣ်ဒ်န့ၣ်လဲၣ်.
နသကိးလၢ အမုာ်ဒီးနၤန့ၣ် ဖဲနလိၣ်ဘၣ်တၢ်မၤစၢၤအခါ အဝဲကမၤစၢၤနၤ. ယဟိဝၤယွၤစ့ၢ်ကီး အမၤဝဲဒ်န့ၣ်လီၤ
၇. ပကကဲထီၣ် ယဟိဝၤယွၤ အသကိးအဂီၢ် ပကဘၣ်တဲတၢ် ဒီးအီၤ ဒီးဒိကနၣ်အကလုၢ်
ပှၤဒီသကိးတဖၣ် မ့ၢ်တဲသကိးတၢ်ထီဘိန့ၣ် အဝဲသ့ၣ် အတၢ်ရ့လိာ်သး ကဂၢၢ်ကျၢၤထီၣ်ဝဲ. ဖး စံးထီၣ်ပတြၢၤ ၈၆:၆, ၁၁ ဝံၤဒီး တဲသကိး တၢ်သံကွၢ် လၢလာ်တဖၣ်အံၤ–
-
ပတဲတၢ်ဒီး ယဟိဝၤယွၤ ကသ့ဒ်လဲၣ်.
-
ယဟိဝၤယွၤ တဲတၢ်ဒီးပှၤ ဒ်လဲၣ်.
ပတဲတၢ်ဒီးယဟိဝၤယွၤ ခီဖျိပဃ့ထုကဖၣ် ဒီးယဟိဝၤယွၤ တဲတၢ်ဒီးပှၤ ခီဖျိပဖးလံာ်စီဆှံ
ပှၤတနီၤတဲဝဲလၢ– “ပကဲထီၣ် ကစၢ်ယွၤ အသကိးတသ့ဘၣ်.”
-
ဒ်သိး နကတဲဘၣ်ပှၤဂၤလၢ ပကဲထီၣ် ယဟိဝၤယွၤ အသကိးသ့န့ၣ် နကဒုးနဲၣ်အဝဲသ့ၣ် လံာ်စီဆှံ ဖဲလဲၣ်တဆၢလဲၣ်.
တၢ်ဂ့ၢ်လၢအရ့ဒိၣ်
ယဟိဝၤယွၤ အဲၣ်ဒိးကဲနသကိး ဒီးအဝဲကမၤစၢၤနၤ လၢနကကဲထီၣ် အသကိး.
တၢ်ကွၢ်ကဒါက့ၤ
-
ယဟိဝၤယွၤ မၤစၢၤအသကိးတဖၣ် ဒ်လဲၣ်.
-
ဘၣ်မနုၤအဃိ ယဟိဝၤယွၤ မုၢ်လၢ်ဝဲလၢ အသကိးတဖၣ် ကဒိကနၣ် အတၢ်မၤလိာ်လဲၣ်.
-
ဒ်သိးပကကဲထီၣ် ယဟိဝၤယွၤ အသကိးအဂီၢ် နဆိကမိၣ် အကဲတၢ်ကီတၢ်ခဲ လၢပဂီၢ်ဧါ. ဘၣ်မနုၤအဃိ နဆိကမိၣ်ဒ်န့ၣ်လဲၣ်.
ဃုသ့ၣ်ညါ
တၢ်ရ့လိာ်သးဒီး ကစၢ်ယွၤန့ၣ် ကကဲဘျုးလၢနဂီၢ်ဒ်လဲၣ်.
“ယဟိဝၤယွၤ မ့ၢ်ဝဲ ကစၢ်ယွၤ လၢပကြၢးသ့ၣ်ညါအီၤ” (တၢးထီခိးတၢ်, လါဖ့ၤဘြူၤအါရံၤ ၁၅, ၂၀၀၃)
မၤလိကွၢ် ဘၣ်ဃးဒီး ပကဲထီၣ် ကစၢ်ယွၤ အသကိး ကသ့ဒ်လဲၣ်.
“ယကဲထီၣ် ကစၢ်ယွၤ အသကိးကသ့ဒ်လဲၣ်” (သးစၢ် အတၢ်သံကွၢ်တဖၣ်—တၢ်စံးဆၢလၢ အကဲဘျုး, အကူာ် ၂, တၢ်မၤလိ ၃၅)
ဖးကွၢ် ဘၣ်ဃးဒီး ပိာ်မုၣ်တဂၤ ကဲထီၣ်ဘၣ် ယဟိဝၤယွၤ အသကိးအဃိ အတၢ်အိၣ်မူ ဂ့ၤထီၣ်ဒ်လဲၣ်.
ကနၣ်ကွၢ်တၢ်ကလုၢ် ဘၣ်ဃးဒီး ပှၤသးစၢ်တဖၣ် တဲဖျါထီၣ် အတၢ်ရ့လိာ်သးဒီး ယဟိဝၤယွၤအဂ့ၢ်.