DILONGI 08
Nge lenda vuanda nkundi ya Yehova
Yehova zola nge zaba yandi mbote mbote. Samu na yinki? Yandi kele na kivuvu ti kana nge melonguka kuzaba kimuntu na yandi, banzila na yandi, mpe lukanu na yandi, nge kekuma na nsatu ya kuvuanda nkundi na yandi. Nge lenda kuma mpenza nkundi ya Nzambi? (Tanga Nkunga 25:14.) Yinki nge lenda sala samu nge kuma nkundi ya Nzambi? Biblia mepesa mvutu na biuvu yango mpe yamemonisa samu na yinki kinkundi na Yehova kele kinkundi yina meluta mfunu yina nge lenda vuanda na yau.
1. Yinki diambu Yehova kena kulomba nge nge sala?
‘Pusana penepene ya Nzambi, mpe yandi kepusana penepene na nge.’ (Yakobo 4:8) Yinki yazola monisa? Yehova melomba nge nge kuma nkundi na yandi. Bantu yankaka lenda mona mpasi na kundima ti balenda kuma nkundi ya muntu yina balenda mona ve. Kasi, na Mpova na yandi, Biblia, Yehova memonisa konso diambu yina beto kele na yau nsatu samu na kuzaba kimuntu na yandi samu beto pusana penepene na yandi. Ntangu beto kena kutanga nsangu yina Nzambi mepesa beto na Biblia, kinkundi na beto na yandi kekula atako beto lenda mona yandi ve.
2. Samu na yinki Yehova kele nkundi ya mbote yina nge lenda vuanda na yandi?
Muntu mosi ve kezolaka nge kuluta Yehova. Yandi zola nge vuanda na kiese mpe nge sosa lusadusu na yandi ntangu nge kele na nsatu na yau. Nge lenda ‘loza basusi na nge nionso na yandi, samu yandi kekukibanzaka samu na nge.’ (1 Piere 5:7) Yehova kevuandaka ntangu nionso pene ya kusadisa, ya kukindisa mpe ya kuwa bankundi na yandi.—Tanga Nkunga 94:18, 19.
3. Samu na kukuma nkundi ya Yehova, yinki yandi zola beto sala?
Yehova kezolaka bantu nionso, ‘kasi yandi kele na kinkundi ya ngolo na bantu ya mbote.’ (Bingana 3:32) Yehova kena kulomba na bankundi na yandi basala ngolo samu na kusala mambu yina yandi kemonaka mbote mpe kumanga mambu yina yandi keyinaka. Bantu yankaka lenda mona ti balenda ata fioti ve kusala mambu yina kele na nguizani na bansikudukusu ya Yehova na diambu metadila yimbi mpe mbote. Kasi, Yehova kele na ntima ya nene. Yandi kendimaka muntu yina kezolaka yandi mpenza mpe yina kesalaka ngolo samu na kusepedisa yandi.—Nkunga 147:11; Bisalu 10:34, 35.
KOTA NA MPINDA
Longuka mambu mingi na yina metadila mutindu ya kukuma nkundi ya Yehova mpe mona samu na yinki yandi kele nkundi ya mbote kuluta yina nge lenda baka.
4. Abrahami vuandaka nkundi ya Nzambi
Masolo ya Biblia samu na Abrahami (bamebokidila yandi diaka Abrama) kena kusadisa beto na kubakusa yinki zola monisa kuvuanda nkundi ya Nzambi. Tanga mambu yina metadila Abrahami na Kuyantika 12:1-4. Mpe na manima tadila biuvu yayi:
-
Yinki Yehova lombaka na Abrahami yandi sala?
-
Yinki nsilulu Yehova pesaka yandi?
-
Yinki mutindu Abrahami zitisaka malako yina Yehova pesaka yandi?
5. Yinki Yehova kena kulomba na bankundi na yandi
Mbala mingi beto kevingilaka bankundi na beto sala kima mosi samu na beto.
-
Yinki mambu nge kezolaka bankundi na nge sala samu na nge?
Tanga 1 Yoane 5:3, mpe na manima tadila kiuvu yayi:
-
Yinki Yehova kena kulomba na bankundi na yandi?
Samu na kuzitisa Yehova, beto fueti soba bikadulu to kimuntu na beto. Tanga Yezaya 48:17, 18, mpe na manima tadila kiuvu yayi:
-
Samu na yinki Yehova kena kulomba na bankundi na yandi basala bansobolo?
Nkundi ya mbote kezabisaka beto mambu yina lenda tanina beto mpe kupesa beto mambote
6. Yina Yehova kesalaka samu na bankundi na yandi
Yehova kesadisaka bankundi na yandi banunga mambu ya mpasi. Tula VIDEO, mpe na manima tadila kiuvu yayi melanda.
-
Yinki mutindu Yehova sadisaka nketo yina bametubila na video samu yandi nunga makanisi mpe banguilu na yandi ya yimbi?
Tanga Yezaya 41:10, 13, mpe na manima tadila biuvu yayi melanda:
-
Yinki mambu Yehova tubaka ti yandi kesala samu na bankundi na yandi nionso?
-
Nge mekanisa ti Yehova lenda vuanda nkundi ya mbote? Samu na yinki nge mekanisa mutindu yina?
Bankundi ya nzola kepesaka beto lusadusu yina beto kele na yau nsatu. Yehova diaka kesadisa nge
7. Samu na kuvuanda nkundi ya Yehova, beto fueti sololaka mpe kuwa yandi
Kusolola kekumisaka kinkundi ngolo. Tanga Nkunga 86:6, 11, mpe na manima tadila biuvu yayi:
-
Yinki mutindu beto lenda solola na Yehova?
-
Yinki mutindu Yehova kesololaka na beto?
Beto kesololaka na Yehova na nzila ya kisambu; yandi kesololaka na beto na nzila ya Biblia
BANTU YANKAKA METUBA: “Yakele mpasi kuvuanda penepene ya Nzambi.”
-
Yinki verse ya Biblia nge lenda sadila samu na kumonisa ti beto lenda vuanda bankundi ya Yehova?
BUNKUFI
Yehova zola kukuma Nkundi na nge, mpe yandi kesadisa nge nge pusana penepene na yandi.
Mvutukulu
-
Yinki mutindu Yehova kesadisaka bankundi na yandi?
-
Samu na yinki Yehova kelombaka na bankundi na yandi basala bansobolo?
-
Nge mekanisa ti Yehova kelombaka mambu mingi na bankundi na yandi? Samu na yinki nge mekanisa mutindu yina? Sasila mvutu na nge.
SOSA
Yinki mambote nge lenda baka na kinkundi na nge na Yehova?
“Yehova, Nzambe oyo bato basengeli koyeba” (Linɔ́ngi ya Mosɛnzɛli ya 15 Février 2003)
Longuka mutindu ya kusala kinkundi na Nzambi.
Tala samu na yinki nketo mosi kena kukanisa ti kinkundi na yandi na Yehova vukisaka yandi.
Kuwa mutindu bantuenia kena kutubila banguilu na bau samu na Yehova.
Yinki nge fueti sala samu nge vuanda nkundi ya Nzambi? (1:46)
