LONGI DIA 08
Olenda Kala Nkundi a Yave
Yave ozolele vo watoma kunzaya. Ekuma? Ekolo ozaya mayingi mu kuma kia fu yandi, nzila zandi ye kani diandi, ediadi dikusadisa mu kala ye luzolo lwa kala nkundi andi. Nga okwikilanga vo olenda kikilu kala nkundi a Nzambi? (Tanga Nkunga 25:14.) Adieyi ofwete vanga mu kala nkundi andi? Bibila kivananga e mvutu za yuvu yayi, kisonganga mpe vo kikundi yo Yave i kikundi kisundidi o mfunu olenda kala kiau muna zingu kiaku.
1. Nkia mboka Yave kekuvananga?
Bibila kivovanga vo: ‘Finama Nzambi, oyandi mpe okufinama.’ (Yakobo 4:8) E mvovo miami, adieyi misongele? Misongele vo Yave okubokelanga kimana wakala nkundi andi. Wantu ankaka beyindulanga vo diampasi mu kala akundi a Nzambi wau vo ke balendi kumona ko. Kansi, muna Bibila Yave osengomonanga mawonso tufwete zaya mu kuma kia fu yandi kimana twamfinama. Vava tutanganga nsangu za Nzambi muna Bibila, kikundi kieto yo Yave kikumamanga kanele vo ke tulendi kumona ko.
2. Ekuma Yave kenena vo i nkundi osundidi olenda kala yandi?
Ke vena muntu ko otoma kuzolanga lutila Yave. Ozolele vo wakala ye kiese yo lomba lusadisu lwandi mu konso diambu. Olenda ‘yekeka kwa yandi mawonso mekutokanesanga, kadi mfunu kekuvuanga.’ (1 Petelo 5:7) Yave okalanga wakubama muna sadisa, fiaulwisa yo wá akundi andi.—Tanga Nkunga 94:18, 19.
3. Adieyi tufwete vanga muna kala nkundi a Yave?
Yave ozolanga wantu awonso, “kansi okalanga se nkundi akola kw’ansongi.” (Ngana 3:32) Muna kala nkundi a Yave tufwete vanga ngolo za vanga mambu mambote yo venga mambu mambi. Akaka beyindulanga vo ke belenda vanga mawonso ko Yave kekubalombanga yo venga mambu mambi. Kansi, Yave obakulanga diambu diadi. Awonso bekunzolanga yo vanga mawonso muna kunyangidika, Yave okubatambulwilanga se akundi andi.—Nkunga 147:11; Mavangu 10:34, 35.
ZAYA DIAKA MANKAKA
Tala una olenda kadila nkundi a Yave ye kuma Nzambi kenena se Nkundi osundidi ona olenda kala yandi.
4. Abarayama nkundi a Yave kakala
Dina Bibila kivovanga mu kuma kia Abarayama (wayikilwanga mpe vo Abarama), dilenda kutusadisa mu zaya dina tufwete vanga mu kala akundi a Nzambi. Muna zaya diaka mankaka mu kuma kia Abarayama, tanga Tuku 12:1-4. i bosi, vana e mvutu za yuvu eyi:
-
Adieyi Yave kalomba kwa Abarayama kavanga?
-
Nkia nsilu Yave kansila?
-
Adieyi Abarayama kavanga?
5. Adieyi Yave kelombanga kwa akundi andi?
Nkumbu miayingi tuvavanga vo akundi eto batuvangila mambu.
-
Nkia maka mambu ozolanga vo akundi aku bavangila?
Tanga 1 Yoane 5:3, i bosi, vana e mvutu za kiuvu eki:
-
Adieyi Yave kelombanga kwa akundi andi?
Muna lemvokela Yave, tufwete soba mavangu ye fu yeto. Tanga Yesaya 48:17, 18, i bosi, vana e mvutu za kiuvu eki:
-
Ekuma Yave kelombelanga vo akundi andi bavanga e nsobani?
Nkundi ambote okutusadisanga ye okutuvananga malongi mambote. Diau dimosi mpe Yave kevanganga kwa akundi andi
6. Nkia mambu Yave kevanganga muna sadisa akundi andi?
Yave osadisanga akundi andi bazizidila e mambu mampasi. Tala e VIDEO, i bosi, vana e mvutu za kiuvu kilende.
-
Aweyi Yave kasadisila o nkento muna video mu sunda e ngindu zabendomoka?
Tanga Yesaya 41:10, 13, i bosi, vana e mvutu za yuvu eyi:
-
Nkia nsilu Yave kasila akundi andi awonso?
-
Nga obenze vo Yave olenda kala nkundi ambote? Ekuma?
Akundi akieleka bekusadisa muna konso ntangwa. Yave mpe okusadisa
7. Muna kala nkundi a Yave tufwete mokenanga yandi
Vava akundi bemokenanga, e kikundi kiau kikumamanga. Tanga Nkunga 86:6, 11, i bosi, vana e mvutu za yuvu eyi:
-
Aweyi tulenda mokenena yo Yave?
-
Aweyi Yave kemokenenanga yeto?
Tumokenanga yo Yave vava tusambanga; yandi omokenanga yeto vava tutanganga e Bibila
AVO MUNTU UVOVESE VO: “Ke dilendakana ko mu kala nkundi a Nzambi.”
-
Nkia sono kia Bibila osadila muna songa vo tulenda kala akundi a Yave?
MAMBU MASINA MA LONGI DIADI
Yave ozolele kala Nkundi aku ye okusadisa muna kumfinama.
Nkia Mambu Olongokele?
-
Aweyi Yave kesadisilanga akundi andi?
-
Ekuma Yave kevoveselanga akundi andi vo bavanga nsobani?
-
Nga obenze vo diampasi kikilu mu kala nkundi a Yave? Ekuma?
TALA MPE OMA MALENDE
Aweyi e kikundi yo Nzambi kilenda sobela e zingu kiaku?
“Jeová, o Deus que vale a pena conhecer” (Eyingidilu, dia 15 dia Fevelelo, 2003)
Zaya dina ofwete vanga mu kala nkundi a Nzambi.
Zaya una kikundi kia nkento mosi yo Yave kiavuluzila moyo andi.
Zaya dina aleke beyindulanga mu kuma kia Yave.
Nanga Oyangalela Mpe Malongi Mama
YUVU ITOMA YUVULWANGA
Ameyi Mevangamanga Muna Longi dia Bibila ye Mbangi za Yave?
Muna programa yayi ya ngovo ya longokela isadilwanga kwa Mbangi za Yave, olenda sadila kwaku konso nsekola ya Bibila. Olenda kwaku bokelesa esi nzo aku yawonso yovo akundi aku ana ozolele.
