SOMO 08
Ni ka ni e Yova dzá kau
Yova jiri ni chu ndi bblo pli. Ká addudho? Ke churi nari kʉ, njati ni di lochu bbo ndidhó sifa ma, ndidzá chu ma, ndi pɨ ná lo ma na djo ró, ni ka ni jiri bbo ni ngʉ ndidzá kau. Ni ká ka ni é Mungu dzá kau bbʉbbʉ? (Azø Zaburi 25:14.) Ni ká ka ni njiri ngbǎ nja ni ngʉ kedzá kau d’e? Biblia ngʉ fø logoti ndirigoti ri d’ra addudho ma Yova ma na le kau nji nari kʉ bblo pli nari.
1. Yova ká rinzi ni njiri ngbǎ?
“Andrini Mungu ro ndirigoti ke si ndi ndri ni ro.” (Yakobo 4:8) Føri na mana ká kʉ addu? Yova ni nzi ni é ndidzá kau. Nja ndrŭ adi riddi nari kʉ, ri ro nzá ka ndi ka le nji kau Mungu na ri, dhonalo ke ro nzɨ le nja ri. Nì mai ri kʉ fø ro, Yova d’ra krʉ ko ka ko chu ndidhó sifa djo ná lo Biblia nǎ ndiro ko kana nga ngʉ chøchø ndi na d’e. Ko di Mungu dzá lo zø Biblia nǎ ro ró, ko kana kau ka ndi ngʉ chøchø ke na nzá mai ko d’erie ke ro nja ro.
2. Yova ká ka ndi é bblo kʉ ná kau addudho?
Yova ji ni ná ngatsi ji ni ná ndrŭ ro nga kʉ ri. Ke jiri ni é hwè na ndirigoti ni nzinga ndi tso nidhó loji ngatsotsokodha ná saa djo. Ni ka ni “li ni nanga d’o ná lo krʉ ke djo, dhonalo ke ngaddi nì ni djo.” (1 Petro 5:7) Yova kʉ krʉ ddo ró tayari ndi kó ndidzá bbakau tsotso, ndi li kpa kpakpa ndirigoti ndi rr kpa po ná lo.—Azø Zaburi 94:18,19.
3. Yova ká adi riji ndidzá bbakau nji ngbá lo?
Yova ji krʉ kʉ ná ndrŭ ji, “ro ke ma kana nga e chøchø na nari kʉ chølo nji ná ndrŭ.” (Mezali 3:32) Yova adi riji ndidzá kau kʉ ná ndrŭ njí bblo lo, ndirigoti kpa pʉ chelo njidha ndima ró ro. Nja kpa ka ndima pori nari kʉ, ndima dho nzá ri ka ndi ka ndima njí Yova ji ná lo krʉ ri ndirigoti ndima pʉ chelo ndima nji nari krʉ ndima ró ro ri. Ro Yova kʉ nì adi ndrŭ famu ná ke. Ke adi bbʉbbʉ jidha dhǒ jiji ndi ná ndrŭ dho ndirigoti ndi nyǒ tho ná lo nji ná ndrŭ dho.—Zaburi 147:11; Matendo 10:34-35.
ANE LONANGA BBO
Aneri ni chu ngbaribbai ma ni ka ni ngʉ Yova dzá kau ndirigoti addudho ma ke kʉ bblo kʉ ná kau nari.
4. Abrahamu ngʉe Yova dzá kau
Abrahamu (inga Abramu) ngʉe Mungu dzá kau, ná føri ko tsotso kó ko chu Mungu dzá kau le kʉ nari na mana bblo. Azø lo Abrahamu djo Mwanzo 12:1-4 nǎ. Ndirigoti anitilo i ngadhudha djo:
-
Yova ká pongʉeri Abrahamu njí addu?
-
Yova ká tsongʉeni ngbá lo djo ke dho?
-
Yova ja ná lo dho ká Abrahamu rrngʉe nga ngbaribbai?
5. Yova adi nzǐ ndidzá bbakau njí ná lo
Ko adi riji kodhó bbakau njí ko dho ná lo ro kʉ nì.
-
Ni ká ka ni jiri nidzá bbakau njí ngbá lo ro ni dho?
Azø 1 Yohana 5:3, ndirigoti anitilo i ngadhudha djo:
-
Yova ká adi riji ndidzá bbakau njí addu?
Ndiro ko rrnga Yova dho d’e, ringani ko lé kodhó nja kʉ ná nyi thika inga kodhó nja kʉ ná sifa thika. Azø Isaya 48:17, 18, ndirigoti anitilo i ngadhudha djo:
-
Yova ká adi riji ndidzá bbakau lé ndima dhó lo thika addudho?
Bblo kʉ ná kau adi riji ko nji bblo kʉ ná lo ndirigoti ngbà nǎ ro ko ka ko ba faida ná lo. Yova ma adi riji føi ndidzá bbakau dho
6. Ngbaribbai ma Yova adi ndidzá bbakau tsotso kó nari
Yova adi ndidzá bbakau tsotso kó ndiro kpa hwini kpakpalo tso ro d’e. Aninja VIDEO, ndirigoti anitilo i ngadhudha djo.
-
Yova ká koe video nǎ ko njae ná isɨle tsotso ngbaribbai ndiro ndi hwini ndidhó che kʉ ná ngaddidha na ndirigoti ndi thí nzá ná lo na d’e?
Azø Isaya 41:10, 13, ndirigoti anitilo i ngadhudha djo:
-
Yova ká tsoni ndi si ngbá lo nji ndidzá bbakau krʉ dho?
-
Ni ká riddi Yova ka ndi é bblo kʉ ná kau bbʉbbʉ? Ká addudho?
Bblo kʉ ná kau ka ndi kó ni tsotso nidhó loji letsotsokodha ró. Yova ma si ni tsotso ko ddi
7. Ndiro ko é Yova dzá kau d’e, ringani ko di loti ke na ndirigoti ko di ke po ná lo rr
Le kana kau adi ngʉ kpakpa njati le di loti le kana ró. Azø Zaburi 86:6, 11, ndirigoti anitilo i ngadhudha djo:
-
Ko ká ka ko tilo Yova na ngbaribbai?
-
Yova ká adi loti ko na ngbaribbai?
Ko adi loti Yova na sala chulu; ndirigoti ke adi loti ko na Biblia chulu
NJA NDRŬ ADI RIPO: “Ri ro nzá ka ndi ka le nji kau Mungu na ri.”
-
Ri ka ndi kaka le nji kau Mungu na, føri ká ni ka ni dhǒ ngbá andiko chulu?
LO DZÁ DɄNGA
Yova jiri ndi e nidzá kau ndirigoti ke si ni tsotso ko nja ni ndrini chøchø ndi ro d’e.
Lo djolu le ngʉ nari
-
Yova ká adi ndidzá bbakau tsotso kó ngbaribbai?
-
Yova ká adi rija ndidzá bbakau lé ndima dhó nyi thika addudho?
-
Ni ká riddi Yova dzá kau le ka le é nari ka ndi e kpakpa? Ká addudho, inga nga addudho?
NI KA NI CHU NÁ NJA LO
Mungu na le kau nji nari ká ka ndi lø nidhó maisha ronga ngbaribbai?
“Kumujua Yehova Kutakuletea Faida” (Munara wa Mulinzi, 15 Mwezi wa 2, 2003)
Aneri ni chu ngbaribbai ma le ka le ngʉ Mungu dzá kau nari.
Aneri ni chu addudho ma ddikpa isɨle ma kana kau kʉ Yova na nari liri ledhó maisha e bblo nari.
Arr ngbaribbai ma jadda kpa ndima mbu Yova djo nari kpa d’ra nari.
