CIIYO 08
Inga Mwaba Shicibusa Wakwe Yehova
Yehova alisuni ayi mumushibe kabotu. Ino nceebo nshi? Alalangila kwaamba ayi na twashiba mibo yakwe, nshila shakwe, luyaando lwakwe, inga twasuna kuba shicibusa wakwe. Ano sa inga cakonsheka kuba shicibusa wakwe Lesa? (Amubelenge Kulumbaisha 25:14.) Ino inga mwacita buyani kwaamba ayi mube shicibusa wakwe? Baibo ilakumbula miipusho iyi alimwi ilatucafwa kushiba kuba abushicibusa a Yehova ncokuyandikila abuumbi kwiinda bushicibusa mbweenga twaba amuntu uli woonse.
1. Ino Yehova alisuni ayi mucite buyani?
“Kamusena pafwaafwi aLesa alakwe ulaakusena pafwaafwi amwebo.” (Jemusi 4:8) Ino maswi aya alasansulula nshi? Yehova alisuni ayi mube shicibusa wakwe. Bamwi inga caba ciyumu kushoma kwaamba ayi inga baba shicibusa wakwe Lesa, mukwiinga taaboneki. Nacibi boobo, Yehova kwiinda mu Maswi akwe Baibo, wakatulwiita shoonse sheenga shatucafwa kushiba mibo yakwe kwaamba ayi tube beshicibusa bakwe. Na twabelenga nshaatulwiita mu Baibo, bushicibusa bwesu anguwe bulayuminaako nabi kwaamba ayi tatuna kumubonawo kale.
2. Ino nceebonshi nceenga twaambila ayi Yehova ngushicibusa wiinditewo ngweenga twabaakwe?
Taakuwo muntu umusuni kwiinda Yehova mbwaamusuni. Alisuni ayi munoosangalala akupaila kuli nguwe kwaamba ayi anoomucafwa. Inga ‘mwatola kulisukama kwanu koonse kuli nguwe, ceebo ngoomulama.’ (1 Pita 5:7) Yehova alilibambite kucafwa, kuyuminisha, alimwi akukutika kubeshicibusa bakwe.—Amubelenge Kulumbaisha 94:18, 19.
3. Ino Yehova alalangila nshi kubeshicibusa bakwe?
Yehova alibasuni bantu boonse, “sombi balo baluleme ulanyumfwanaabo.” (Tushimpi 3:32) Yehova alalangila beshicibusa bakwe kucita shintu nshaabona ayi nshibotu akuleya kucita shintu nshaabona ayi nshibiibi. Bantu bamwi balayeeya ayi inga tabacikoonshi kukonkela njiisho shakwe Yehova pamakani ashiluleme alimwi ashitaluleme. Nacibi boobo, Yehova alicite nkumbu. Aboobo abo boonse bamusuni alimwi beelesha cankusu kucita shimusangalasha, alabasumina kuba beshicibusa bakwe.—Kulumbaisha 147:11; Milimo 10:34, 35.
AMWIIYILEWO ASHIMWI
Amwiiye nsheenga mwaciita kwaamba ayi mube shicibusa wakwe Yehova akubona nceenga twaambila ayi Yehova ngu shicibusa wiinditewo ngweenga mwabaakwe.
4. Abulaamu wakalinga shicibusa wakwe Yehova
Makani amu Baibo aamba pali Abulaamu (na Abulamu) alatucafwa kushiba nsheenga twaciita kwaamba ayi tube shicibusa wakwe Lesa. Amubelenge makani atokwaamba pali Abulaamu palilembo lya Matalikilo 12:1-4, akubandika miipusho iyi:
-
Ino Yehova wakalwiita Abulaamu kucita nshi?
-
Ino Yehova wakamushomesha nshi?
-
Ino Abulaamu wakacita buyani Yehova ndyaakamulwiita shakucita?
5. Yehova nshalangila kubeshicibusa bakwe
Liinji kulaba nshetulangila beshicibusa besu kucita.
-
Ino nshintu nshi nshemusuni ayi beshicibusa banu banoomucitila?
Amubelenge 1 Joni 5:3, akubandika mwiipusho uyu:
-
Ino Yehova alalangila beshicibusa bakwe kucita buyani?
Kwaamba ayi tunyumfwile Yehova, inga twayandika kwaalula mibo yesu alimwi ambotucita shintu. Amubelenge Isaya 48:17, 18, akubandika mwiipusho uyu:
-
Ino nceebonshi Yehova alisuni beshicibusa bakwe kwaalula buumi bwabo?
Shicibusa uli kabotu inga watwiibalusha shintu sheenga shatushitilisha alimwi akutucafwa. Yehova alakwe mbwaacita kubeshicibusa bakwe
6. Yehova nshaacitila beshicibusa bakwe
Yehova alacafwa beshicibusa bakwe kuliyumya ndyebatokwiinda mumapensho. Amweebele VIDYO, lyalo akubandika mwiipusho utokonkelaawo.
-
Ino Yehova wakamucafwa buyani mwanakashi ngomweebela muvidyo kwaamba ayi acikoonshe kucileka kulinyumfwa cibiibi akulisukama?
Amubelenge Isaya 41:10, 13, akubandika miipusho iyi:
-
Ino Yehova washomesha ayi beshicibusa bakwe boonse alaakubacitila nshi?
-
Sa Yehova inga waba shicibusa uli kabotu? Ino nceebonshi?
Beshicibusa balamucafwa paciindi ceelete. Yehova alakwe alaakumucafwa
7. Kwaamba ayi tube shicibusa wakwe Yehova, tulyeelete kubandika alimwi akukutika kuli nguwe
Kubandikishanya kulayumya bushicibusa. Amubelenge Kulumbaisha 86:6, 11, akubandika miipusho iyi:
-
Ino inga twabandika buyani a Yehova?
-
Ino Yehova alabandika buyani andiswe?
Tulabandika a Yehova kwiinda mukupaila; lyalo alabandika andiswe kwiinda mu Maswi akwe Baibo
BANTU BAMWI BALAAMBA AYI: “Inga tacikonsheki kuba shicibusa wakwe Lesa.”
-
Ino ndilembo nshi ndyeenga mwasebensesha litondesha kwaamba ayi inga twaba shicibusa wakwe Yehova?
CITEENTE CINENE
Yehova alisuni ayi abe shicibusa wanu, alimwi alaakumucafwa kuba abushicibusa buyumu anguwe.
Kwiindulukaamo
-
Ino Yehova alabacafwa buyani beshicibusa bakwe?
-
Ino nceebonshi Yehova alalwiita beshicibusa bakwe kwaalula buumi bwabo?
-
Mutoyeeya buyani, sa Yehova alalangila beshicibusa bakwe kucita shintu nsheenga tabacikoonshi? Ino nceebonshi?
AMULANGWETEEWO ASHIMWI
Ino kuba shicibusa wakwe Lesa inga kwamucafwa buyani?
“Kuyandika kwa Kushiba Yehova Lesa” (Njashi Yamulindilishi, February 15, 2003)
Amwiiye nsheenga mwaciita kwaamba ayi mube shicibusa wakwe Lesa.
Amwiiye cakapa mwanakashi umwi kulinyumfwa ayi kuba bushicibusa a Yehova kwakapulusha buumi bwakwe.
“Nshindakalinga Kusuniiwo Kufwa!” (Njashi Yamulindilishi No. 1 2017)
Amunyumfwe shaamba bacikula bwangu mbobalinyumfwa pali Yehova.
You May Also Like
MIIPUSHO LIINJI BANTU NJOBEPUSHA
Ino Nshiinshi Nsheenga Mweeya Ndyemutokwiiya Baibo a Bakamboni Bakwe Yehova?
Ndyemutokwiiya Baibo a Bakamboni Bakwe Yehova kwakubula kulipila, inga mwasebensesha Baibo ili yoonse. Mulyangulukite kwiitako bamumukwashi wanu na beshicibusa banu bali boonse mbweenga mwasuna kucanikaawo paciiyo.
