TUTO 08
Mwakona Kuba Mulikanaa Jehova
Jehova ubata kuli mumuzibe hande. Libaka? Kakuli usepa kuli hamunze muituta tulemeno twahae, mwaezeza lika, ni zalela kumiezeza kwapili, mukaba mulikanaa hae. Kono kana luli mwakona kuba mulikanaa Mulimu? (Mubale Samu 25:14.) Ki lika mañi zemuswanela kueza kuli mube mulikanaa Mulimu? Bibele ialaba lipuzo zeo mi italusa hande libaka kuba mulikanaa Mulimu haili yeñwi ya lika za butokwa hahulu zemukona kueza.
1. Jehova umimema kuli muezeñi?
“Musutelele ku Mulimu, mi ukasutelela ku mina.” (Jakobo 4:8) Taba yeo italusañi? Jehova umimema kuli mube mulikanaa hae. Batu babañwi kukona kubabela taata kulumela kuli bakona kuba mulikanaa Mulimu, kakuli habakoni kumubona. Kono mwa Linzwi lahae yona Bibele, Jehova ulutaluseza lika kaufela zelutokwa kuziba ka za hae ilikuli lukone kusutelela ku yena. Halubala litaba ze mwa Bibele, zelutaluseza ka za Mulimu, silikani saluna ni Jehova sikatiya nihaike kuli halukoni kumubona.
2. Ki kabakalañi Jehova hali yena mulikani yomunde ka kufitisisa?
Jehova umilata hahulu kufita mutu ufi kamba ufi mwamilatela. Ubata kuli mube ni tabo ni kuli mumukupange kuli amituse ka nako kaufela. Mwakona ‘kunepela lipilaelo zamina kaufela ku yena, kakuli wamiisa pilu.’ (1 Pitrosi 5:7) Kamita Jehova ubata kumitusa, kumiomba-omba, ni kuteeleza ku mina ka kuba balikani bahae.—Mubale Samu 94:18, 19.
3. Jehova ubata kuli balikani bahae baezeñi?
Jehova ulata batu kaufela, “kono uitama bulikani bobutuna ni babalukile.” (Liproverbia 3:32) Jehova ubata kuli balikani bahae balike mobakonela kaufela kulata zalata ni kutoya zatoile. Babañwi baikutwa kuli habakoni kueza lika kaufela zabata Jehova kuli baeze ni kutoya lika kaufela zemaswe. Kono Jehova habati kuli mueze lika zemusa koni. Walata mutu kaufela yamulata kuzwelela kwa pilu ni yalika mwakonela kaufela kumutabisa.—Samu 147:11; Likezo 10:34, 35.
MUBATISISE
Muitute zeñata zekona kumitusa kuba mulikanaa Jehova, mi mubone libaka kuba mulikanaa Jehova haili nto ya butokwa.
4. Abrahama neli mulikanaa Jehova
Litaba ka za Abrahama (yanaabizwa hape kuli Abrame) zeñozwi mwa Bibele lilutusa kuutwisisa zekutalusa kuba mulikanaa Mulimu. Mubale ka za Abrahama kwa Genese 12:1-4. Kihona mukanyakisisa lipuzo zelatelela:
-
Jehova naabulelezi Abrahama kuli aezeñi?
-
Jehova naasepisizeñi Abrahama?
-
Abrahama naaezizeñi Jehova hanaa mufile litaelo?
5. Zabata Jehova kuli balikani bahae baeze
Hañata lubatanga kuli balikani baluna baluezeze lika zeñwi.
-
Ki lika mañi zemutabela kuli balikani bamina bamiezeze?
Mubale 1 Joani 5:3, mi kihona mukanyakisisa puzo yelatelela:
-
Jehova ubata kuli balikani bahae baezeñi?
Kuli luutwe Jehova, lutokwa kucinca mupilelo waluna ni butu bwaluna. Mubale Isaya 48:17, 18, mi kihona mukanyakisisa puzo yelatelela:
-
Ki kabakalañi Jehova habatanga kuli balikani bahae baeze licinceho mwa bupilo bwabona?
Mulikani yomunde uka luhupulisa lika zekona kulusileleza ni zekona kulutusa. Jehova ni yena uezanga nto yeswana kwa balikani bahae
6. Zaezanga Jehova kuli atuse balikani bahae
Jehova utusanga balikani bahae kutiyela miinelo yetaata. Mubuhe VIDIO, mi kihona mukanyakisisa puzo yelatelela.
-
Jehova utusize cwañi musali yemuboni mwa vidio kutiyela maikuto amaswe?
Mubale Isaya 41:10, 13, mi kihona mukanyakisisa lipuzo zelatelela:
-
Jehova usepisa kuezezañi balikani bahae?
-
Kana munahana kuli Jehova wakona kuba mulikanaa mina yomunde? Ki kabakalañi hamubulela cwalo?
Balikani babande bamitusanga hamutokwa kutusiwa. Ni mina Jehova uka mitusa
7. Kuli lube balikani ba Jehova lutokwa kuambolanga ni yena
Balikani habaambolisana, silikani sabona satiyanga. Mubale Samu 86:6, 11, mi kihona mukanyakisisa lipuzo zelatelela:
-
Lukona kuambola cwañi ni Jehova?
-
Jehova uambolanga cwañi ni luna?
Luambolanga ni Jehova ka tapelo; mi yena uambolanga ni luna halubala Bibele
BABAÑWI BABULELANGA KULI: “Hakukonahali feela kuba mulikanaa Mulimu.”
-
Ki liñolo mañi lemukona kuitusisa lelibonisa kuli lwakona kuba balikani ba Jehova?
LITABA KA BUKUSWANI
Jehova ubata kuli mube mulikanaa hae mi uka mitusa kuli musutelele ku yena.
Mulundulule
-
Jehova utusanga cwañi balikani bahae?
-
Ki kabakalañi Jehova hatalusezanga balikani bahae kuli baeze licinceho mwa bupilo bwabona?
-
Kana munahana kuli Jehova ubata kuli balikani bahae baeze lika zebasa koni kueza? Ki kabakalañi hamubulela cwalo?
MUBONE LITABA ZEÑWI
Kuba mulikanaa Mulimu kukona kumitusa cwañi mwa bupilo?
“Jehova ki Mulimu Yalukelwa Kuzibwa” (Tawala ya Mulibeleli, February 15, 2003)
Mubone mo mukona kubela mulikanaa Mulimu.
Mubone libaka musali yomuñwi haikutwa kuli kuba mulikanaa Jehova nekucincize bupilo bwahae.
Mubone zebatalusa babanca babañwi ka za kulapelanga ku Jehova.
Hape Mwendi Mwakona Kutabela Litaba Ze
LIPUZO ZEBUZIWANGA HAÑATA
Tuto ya Bibele Yebazamaisanga Lipaki za Jehova ki Nto Mañi?
Hamunze muituta Bibele ni Lipaki za Jehova, mwakona kuitusisa toloko ya Bibele ifi kamba ifi yemutabela. Mulukuluhile kumema lubasi lwamina kaufela kamba mulikani wamina ufi kamba ufi kuli afumanehe kwa tuto yamina.
