Jehova diher ni ing’eye maber. Nikech ang’o? En nikech ong’eyo ni ka wamedo ng’eyo kite, yorene, kod dwache, e kaka wabiro medo bedo osiepene. Be inyalo bedo osiep Nyasaye adier? (Som Zaburi 25:14.) Ang’o minyalo timo mondo ibed osiepne? Muma miyowa dwoko mag penjogo kendo okonyowa ng’eyo ni osiep manie kindwa gi Jehova e gima duong’ie moloyo.

1. Jehova dwaro ni itim ang’o?

“Suduru machiegni gi Nyasaye to en bende nosud iru.” (Jakobo 4:8) Wechego tiendgi en ang’o? Jehova dwaro ni ibed osiepne. Jomoko yudoga ka teknegi yie ni ginyalo bedo osiepe Nyasaye nikech ok ginyal nene. Kata kamano, Jehova osetiyo gi Muma mondo onyiswa gik moko duto ma wanyalo ng’eyo e wi kido ma en-go ma nyalo konyowa sudo machiegni kode. Sama wasomo Muma, osiep manie kindwa gi Jehova medo bedo motegno kata obedo ni pok wanene.

2. Ang’o momiyo Jehova e osiep maberie mogik ma wanyalo bedogo?

Onge ng’at moheri moloyo kaka Jehova oheri. Odwaro ni ibed mamor kendo mondo iwuo kode sa asaya midwaro kony. Inyalo ‘keto parruokni duto kuome, nikech odewi.’ (1 Petro 5:7) Kinde duto Jehova oikore konyo, hoyo, kendo chiko ite ne osiepene.​​—Som Zaburi 94:​18, 19.

3. Jehova dwaro ni watim ang’o mondo wabed osiepene?

Jehova ohero ji duto, kata kamano, “obedo osiep ng’at ma yorene tir.” (Ngeche 3:​32) Jehova dwaro ni osiepene otem timo gik moneno ni beyo kendo giwere gi gik moneno ni richo. Jomoko neno ni ok ginyal timo gik moko duto ma Jehova dwaro ni gitim kendo were gi gik moko duto maricho modwaro ni giwerego. Kata kamano, Jehova ng’won ahinya. Oyie gi ji duto mohere gadier kendo ma temo kar nyalogi mondo gimore.​​—Zaburi 147:11; Tich Joote 10:​34, 35.

 TIM NONRO

4. Ibrahim ne en osiep Jehova

Sigand Ibrahim (ma bende iluongo ni Abram) konyowa ng’eyo tiend bedo osiep Nyasaye. Som sigand Ibrahim e Chakruok 12:​1-4, kae to uwuo e wi penjo ma luwogi:

• Ang’o ma Jehova nonyiso Ibrahim ni otim?

• En ang’o ma Jehova nosingone?

• Ang’o ma Ibrahim notimo?

5. Jehova dwaro ni osiepene otim ang’o?

Nitie gik ma wadwaroga ni osiepewa otim.

• Gin ang’o ma diher ni osiepeni otimni?

Som 1 Johana 5:​3, kae to uwuo e wi penjo ma luwoni:

• Jehova dwaro ni osiepene otim ang’o?

Mondo waluw chike Jehova, samoro nyalo dwarore ni walok timbewa kata kido ma wan-go. Som Isaya 48:​17, 18, kae to uwuo e wi penjo ma luwoni:

• Ang’o momiyo Jehova dwaro ni osiepene otim lokruok moko ma dwarore?

 6. Kaka Jehova konyo osiepene

 PUONJ MADUONG’

Jehova dwaro ni ibed Osiepne, kendo obiro konyi mondo isud machiegni kode.

Ang’o ma ipuonjori?

• Ere kaka Jehova konyoga osiepene?

• Ang’o momiyo Jehova dwaro ni osiepene otim lokruok moko ma dwarore?

• Be iparo ni en gima tek bedo osiep Nyasaye? Ang’o momiyo iwacho kamano?