Jeová kúni-Ya ja kuni vaʼa ka-ní nu̱u̱-Ya. ¿Nakú? Chi maa-Ya ñúʼun ini-Ya ja kuu kitaʼan ini-ní jín-Ya nú kuni vaʼa ka-ní—nda ja vaʼa ini-Ya, ta saʼa-Ya tiñu—ji ja kúni-Ya ja ku̱ú nu̱u̱-ní. ¿A kuu ndija kitaʼan ini-ní jín Yandios? (Kaʼvi-ní Salmo 25:14, TNM). ¿Naguá kuu saʼa maa-ní tágua kuu kitaʼan ini-ní jín-Ya? Biblia xndikó nda tuʼun yaʼa nu̱u̱-yo de kachi nakú ja kitaʼan ini-yo jín Jeová kuu ɨn ja vaʼa tuni ka ja kuu kunevaʼa-ní.

1. ¿Naguá kúni Jeová ja saʼa-ní?

“Ma̱ni̱ ca̱ coo ro jíín Ya̱a̱ Dios, de víʼí ca̱ stéʼe̱n ya̱ ja̱ ma̱ni̱ ya̱ jíín ro” (Santiago 4:8). ¿Naguá kúni kaʼan nda tuʼun yaʼa? Ja Jeová kúni-Ya ja kitaʼan ini-ní jín-Ya. Sanaa víjin kuu nu̱u̱ sava nda ñayí kani xini-ji ja kitaʼan ini-ji jín ɨn ñayí ja nduu ndeʼe-ji, de viʼi ka nú jín Yandios. De maa-Ya ni chisó-Ya Tuʼun-Ya, nu̱u̱ Biblia, ndɨʼɨ ja jiniñuʼun-yo tágua kuni-yo ndɨʼɨ ja vaʼa ini-Ya tágua kuñati-yo nu̱u̱-Ya. Ta kaʼvi-yo nu̱u̱ Biblia Tuʼun Yandios ja kúni-Ya kaʼan-Ya nu̱u̱-yo, ja kitaʼan ini-yo jín Jeová ndu̱u̱ ndakui ka vese nduu ndeʼe yoʼo-Ya.

2. ¿Nakú Jeová kuu ɨn ñayí ja vaʼa tuni ka kitaʼan ini jín-ní?

Jeová kutoo tuni ka-Ya maa-ní. Maa-Ya kúni-Ya ja koo sii ini-ní ji ja niini kuñati-ní nu̱u̱-Ya ta jiniñuʼun-ní Ya̱a̱. Nda̱cá ja̱ “nácani ndasí ini̱ ro si̱qui̱, de chiʼi ro ndaʼá maá ya̱” de maá ya̱ coto, chi jito ya̱ ndá ro (1 Pedro 5:7). Jeová niini iyo tuʼva-Ya tágua kunini-Ya, kaʼan-Ya tuʼun ndeé ini ji chíndeé-Ya nu̱u̱ nda ñayí kitaʼan ini jín-Ya (kaʼvi-ní Salmo 94:18, 19, TNM).

3. ¿Naguá ndetu Jeová nu̱u̱ nda ñayí ja kitaʼan ini jín-Ya?

Jeová kutoo-Ya nu̱u̱ ndɨʼɨ kuiti̱ nda ñayí, de “vaʼa tuni kitaʼan ini-Ya jín nda ñayí nda̱a̱ ini” (Proverbios 3:32, TNM). Jeová ndetu-Ya ja nda ñayí kitaʼan ini jín-Ya ka ndukundeé-ji tágua saʼa-ji tiñu vaʼa de ma saʼa-ji tiñu nduu iyo vaʼa. Sanaa sava-ji kani xini-ji ja ma kuu kuiti̱ saʼa-ji ja kúni-Ya. De maa-Ya jakuʼun ini-Ya de jetaʼvi-Ya nda ñayí ja kutoo ndija-ji Ya̱a̱ ji ka chuʼun ini-ji tágua saʼa sii ini-ji Ya̱a̱ (Salmo 147:11, TNM; Hechos 10:34, 35).

 NÁ KUTUʼVA KA-YO SƗKƗ TUʼUN YAʼA

4. Abrahán ni kuu-de amigo Jeová

Tuʼun nakani Biblia sɨkɨ Abrahán (suni ja nani Abrán) steʼen nu̱u̱-yo naguá jiniñuʼun saʼa-yo tágua kuu kitaʼan ini-yo jín Yandios. Ka kaʼvi-ní sɨkɨ Abrahán nu̱u̱ Génesis 12:1-4, TNM de ka ndatuʼun-ní sɨkɨ nda tuʼun yaʼa:

• ¿Naguá ni jikan Jeová nu̱u̱ Abrahán?

• ¿Naguá ni kachi Jeová ja kuáʼa-Ya?

• ¿Naguá ni saʼa Abrahán ta ni nini-de tuʼun ja ni tatuni Jeová?

5. Ja jikan Jeová nu̱u̱ nda ñayí ja kitaʼan ini jín-Ya

Ja nda̱a̱ niini ndetu-yo ja vaʼa nu̱u̱ nda ñayí ja kitaʼan ini jín-yo.

• ¿Naguá ndetu maa-ní nu̱u̱ nda ñayí ja kitaʼan ini jín-ní?

Ka kaʼvi-ní 1 Juan 5:3 de ka ndatuʼun-ní sɨkɨ nda tuʼun yaʼa:

• ¿Naguá ndetu Jeová nu̱u̱ nda ñayí ja kitaʼan ini jín-Ya?

Tágua kandija-yo nu̱u̱ Jeová, sanaa jiniñuʼun sa̱ma-yo ini-yo ji na̱sa saʼa-yo tiñu. Ka kaʼvi-ní Isaías 48:17, 18, TNM de ka ndatuʼun-ní sɨkɨ nda tuʼun yaʼa:

• ¿Nakú jikan Jeová nu̱u̱ nda ñayí ja kitaʼan ini jín-Ya tágua sa̱ma-ji?

 6. Ja saʼa Jeová nu̱u̱ nda ñayí ja kitaʼan ini jín-Ya

 JA NI KUTUʼVA-YO

Jeová kúni-Ya ja kitaʼan ini-ní jín-Ya de chindeé-Ya nu̱u̱-ní tágua kuu kuñati-ní nu̱u̱-Ya.

Tuʼun núku̱n ini

• ¿Na̱sa chíndeé Jeová nu̱u̱ nda ñayí ja kitaʼan ini jín-Ya?

• ¿Nakú kachi Jeová nu̱u̱ nda ñayí ja kitaʼan ini jín-Ya ja sa̱ma-ji?

• ¿A káʼán-ní ja Jeová jikan kuaʼa-Ya nu̱u̱ nda ñayí ja kitaʼan ini jín-Ya? ¿Nakú jani ini-ní sukua?