Zeova anvi ki ou aprann konn Li pli bien. Kifer? Parski Li kone ki plis ou pou aprann konn so bann kalite, so fason azir, ek seki Li anvi pou ou, plis ou pou anvi vinn so kamarad. Eski ou panse ki li posib ki nou vinn kamarad Bondie? (Lir Psom 25:14.) Ki ou kapav fer pou vinn so kamarad? Labib reponn sa bann kestion-la ek li explike kifer lamitie ki ou ena avek Zeova, samem lamitie pli inportan ki ou kapav ena.

1. Ki Zeova invit ou pou fer?

“Apros zot ar Bondie, e li pou vinn pros ar zot.” (Zak 4:8) Ki savedir? Zeova invit ou pou vinn so kamarad. Sertin kapav trouv sa difisil pou vinn kamarad Bondie parski zot pa kapav trouv Li. Ena lezot ki panse ki nou pou mank respe anver Bondie si nou panse ki nou kapav vinn so kamarad. Me pourtan, dan so Parol, Labib, Zeova finn fer ekrir tou seki nou bizin kone lor Li, pou ki nou kapav vinn pros avek Li. Dan Labib ena mesaz ki Bondie finn fer ekrir pou nou. Alor, kan nou lir Labib nou lamitie avek Li pou vinn pli for, mem si pa kapav trouv Li.

2. Kifer Zeova se samem pli bon kamarad ki ou kapav ena?

Zeova kontan ou plis ki ninport kisannla. Li anvi ki ou ere ek ki ou priye Li ninport kan. Ou kapav ‘met tou ou traka lor Li, parski Li pran ou swin.’ (1 Pier 5:7) Zeova Li touletan pre pou soutenir, rekonfort, ek ekout so bann kamarad.​—Lir Psom 94:18, 19.

3. Ki nou bizin fer pou vinn kamarad Zeova?

Zeova kontan tou dimounn, “me Li vinn enn kamarad bien pros avek bann dimounn ki drwat.” (Proverb 3:32) Zeova ena bann prinsip lor seki bon ek pa bon. Alor, pou ki nou vinn so kamarad, nou bizin fer zefor pou fer bann kitsoz ki Li trouv bon ek rezet bann kitsoz ki Li trouv pa bon. Me sertin trouv sa inposib pou viv an-akor avek bann prinsip ki Zeova ena. Me Zeova Li konpran nou. Li aksepte ninport kisannla ki vremem kontan Li ek ki fer so maximum pou fer Li plezir.​—Psom 147:11, NW; Zistwar Bann Apot 10:34, 35.

 ANOU GET INPE PLIS

4. Abraam ti kamarad Zeova

Labib koz lor Abraam (ki nou apel osi Abram) ek so zistwar ed nou pou konpran ki savedir vinn kamarad Zeova. Lir Zenez 12:1-4, ek apre sa, get sa bann kestion-la ansam:

• Ki Zeova ti demann Abraam pou fer?

• Ki Zeova ti promet li?

• Kouma Abraam ti reazir kan Zeova ti donn li bann instriksion?

5. Seki Zeova atann so bann kamarad fer

An zeneral, nou atann ki nou bann kamarad fer sertin kitsoz pou nou.

• Sit sertin kitsoz ki ou ti pou kontan ou bann kamarad fer pou ou.

Lir 1 Zan 5:3, ek apre sa, get sa kestion-la ansam:

• Ki Zeova atann so bann kamarad fer?

Pou obeir Zeova, kitfwa nou pou bizin sanz nou fason azir, nou personalite ouswa nou latitid. Lir Izai 48:17, 18, ek apre sa, get sa kestion-la ansam:

• Kifer Zeova demann so bann kamarad pou fer bann sanzman?

 6. Seki Zeova fer pou so bann kamarad

 SEKI NOU’NN APRANN

Zeova anvi vinn ou kamarad, ek Li pou ed ou pou vinn pli pros avek Li.

Eski Ou Rapel?

• Kouma Zeova ed so bann kamarad?

• Kifer Zeova demann so bann kamarad pou fer bann sanzman?

• Eski ou panse ki li tro difisil pou vinn kamarad Zeova? Kifer ou pans sa?