Jehová kineki kuali xikixmati. ¿Tijmati kenke? Pampa tlaj tijmatis tlake kuajkuali tlamantli kinextia, kenijkatsa kichiua se keski tlamantli uan kenijkatsa kineki xiitsto teipa, mitspaleuis nojua tijnekis kuali timouikas iuaya. ¿Timoiljuia nelia uelis timouampojchiuas ika toTeotsij? (Xijpoua Salmo 25:14). Biblia kiijtoua tlake moneki tijchiuas tlaj tijneki timouampojchiuas ika Jehová uan nojkia kiijtoua kenke san nopa tlauel ipati.

1. ¿Tlake mitsiljuia Jehová xijchiua?

“Ximonechkauikaj kampa toTeko uan yajaya inmechnechkauis” (Santiago 4:8). Ika ni tlajtoli Jehová mitsiljuia kineki ximouampojchiua iuaya. Maske sekij moiljuiaj amo uelis mouampojchiuasej ika toTeotsij pampa amo ueli kiitaj, Biblia kiijtoua kenijkatsa eli uan nopa techpaleuia ma tijnechkauikaj. Kema tikitaj ipan Biblia tlen Jehová techiljuia, techpaleuia nojua kuali ma timouikakaj iuaya maske amo ueli tikitaj.

2. ¿Kenijkatsa mitspaleuis tlaj kuali timouampojchiuas ika Jehová?

San Jehová tlauel mitsiknelia. Ya kineki kuali xiitsto uan nojkia kineki xikiljui ma mitspaleui. Uelis tikiljuis toTeotsij nochi mokuesol pampa ya kitekipachoua tlen mitspano (1 Pedro 5:7). Jehová nochipa kinpaleuia, kinyoltlalia uan kintlakakilia iuampoyouaj (xijpoua Salmo 94:18, 19).

3. ¿Tlake moneki tijchiuasej tlaj tijnekij timouampojchiuasej ika Jehová?

Maske Jehová kiniknelia nochi maseualmej, nojua tlauel “kiniknelia tlen itstokej xitlauakej iixpa” (Proverbios 3:32). Jehová kineki iuampoyouaj ma kichiuakaj tlen ya kipaktia uan amo tlen kikualankaita. Sekij moiljuiaj amo kema uelis kichiuasej tlen Jehová kineki. Maske kiampa moiljuiaj, Jehová kimati nochi timokuapolouaj, uan ya kikaua ma timouikakaj iuaya kema kiita tijchiuaj kampeka tijyolpakiltisej (Salmo 147:11; Hechos 10:34, 35).

 KUALI XIMOMACHTI

4. Abraham mouampojchijki iuaya Jehová

Tlen kipanok Abraham (nojkia itoka Abram) techpaleuia ma tijkuamachilikaj tlake kiijtosneki timouampojchiuasej iuaya Jehová. Xijpouakaj tlen kipanok Abraham ipan Génesis 12:1-4 uan xijnankilikaj ni tlajtlanili:

• ¿Tlake kiiljuik Jehová ma kichiua Abraham?

• ¿Tlake tlateochiualistli kiiljuik kimakaskia?

• ¿Tlake kichijki Abraham kema Jehová kiiljuik tlen monekiyaya kichiuas?

5. ¿Tlake kineki Jehová ma kichiuakaj iuampoyouaj?

Tojuantij tijnekij touampoyouaj ma techpaleuikaj.

• ¿Kenijkatsa tijneki ma elikaj mouampoyouaj?

Xijpouakaj 1 Juan 5:3 uan xijnankilikaj ni tlajtlanili:

• ¿Tlake kineki Jehová ma kichiuakaj iuampoyouaj?

Tlaj tijnekij tijchiuasej tlen Jehová techiljuia, moneki tijpatlasej tlen tijchiuaj uan tlen timoiljuiaj. Xijpouakaj Isaías 48:17, 18 uan xijnankilikaj ni tlajtlanili:

• ¿Kenke Jehová kiniljuia iuampoyouaj ma kipatlakaj se keski tlamantli ipan ininnemilis?

 6. ¿Kenijkatsa kinpaleuia Jehová iuampoyouaj?

 TLEN TIMOMACHTIJKEJ

Jehová kineki ximouampojchiua iuaya uan ya mitspaleuis tijmatis kenijkatsa tijnechkauis.

¿Tlake tijyekok?

• ¿Kenijkatsa Jehová kinpaleuia iuampoyouaj?

• ¿Kenke Jehová kiniljuia iuampoyouaj ma kipatlakaj se keski tlamantli ipan ininnemilis?

• ¿Timoiljuia tlauel ouij tlen Jehová kineki ma kichiuakaj iuampoyouaj? ¿Kenke kiampa timoiljuia?