ISIFUNDO 08
Ungaba Ngumngane KaJehova
UJehova ufuna ubemazi. Ngenxa yani? Ngoba uyakwazi ukuthi nxa ungafunda okunengi ngaye langenjongo yakhe ungacina ufuna ukuba ngumngane wakhe. Kodwa uyakukholwa yini ukuthi ungenelisa ukuba ngumngane kaNkulunkulu? (Bala uJakhobe 2:23.) Ungenzani ukuze ube ngumngane wakhe? IBhayibhili liyayiphendula imibuzo le njalo litshengisa ukuthi kungani ukuba ngumngane kaJehova kuyinto eqakatheke kakhulu.
1. UJehova ukunxusa ukuthi wenzeni?
“Sondelani kuNkulunkulu, laye uzasondela kini.” (UJakhobe 4:8) Kutshoni lokhu? Kutsho ukuthi uJehova ukucela ukuthi ube ngumngane wakhe. Kodwa abanye bakubona kunzima ukuthi umuntu angaba ngumngane kaNkulunkulu njengoba bengeke bambone. Lanxa kunjalo siyenelisa ukusondela kuJehova ngoba usebenzisa iLizwi lakhe iBhayibhili ukuze asincede simazi ngcono. Nxa singabala iBhayibhili sizasondela kuye, sibe ngabangane bakhe.
2. Kuyini okwenza uJehova abe ngumngane ongcono ukwedlula bonke?
UJehova ukuthanda ukwedlula loba ngubani njalo ufuna uhlale uthokoza. Uyafisa lokuthi umtshele loba kuyini okukukhathazayo. Yikho iBhayibhili lisithi ‘uphosele kuye konke okukukhathazayo ngoba yena ulendaba lawe.’ (1 UPhetro 5:7) UJehova uhlala ebancedisa, ebaduduza futhi ebalalela abangane bakhe.—Bala iHubo 94:18, 19.
3. Kumele senzeni ukuze sibe ngabangane bakaJehova?
UJehova uthanda abantu bonke, “kodwa ungumngane omkhulu wabathembekileyo.” (IZaga 3:32) UJehova ufuna labo ababa ngabangane bakhe babalekele ukwenza okubi besebezimisela ukwenza okulungileyo. Abanye abantu babona angani ngeke benelise ukwenza okufunwa nguJehova. Kodwa uJehova nguNkulunkulu olesihawu njalo uyabamukela abamthandayo labazama ngamandla wonke ukwenza okumthokozisayo.—IHubo 147:11; ImiSebenzi 10:34, 35.
GEBHA UJULE
Engxenyeni le uzabona ukuthi ungenzani ukuze ube ngumngane kaJehova lokuthi kuyini okwenza abe ngumngane ongcono ukwedlula bonke.
4. U-Abhrahama wayengumngane kaJehova
Impilo ka-Abhrahama (obizwa langokuthi ngu-Abhrama) isinceda sizwisise ukuthi kutshoni ukuba ngumngane kaNkulunkulu. Bala ngo-Abhrahama kuGenesisi 12:1-4 beselixoxa ngemibuzo le:
-
UJehova watshela u-Abhrahama ukuthi enzeni?
-
UJehova wamthembisani?
-
U-Abhrahama wakwenza yini ayekutshelwe nguJehova?
5. UJehova ukhangelele ukuthi abangane bakhe benzeni?
Zikhona izinto esingafisa ukuzenzelwa ngabangane bethu.
-
Yiziphi izinto ongafisa ukuthi abangane bakho bakwenzele zona?
Bala u-1 Johane 5:3 beselixoxa ngombuzo lo:
-
Kuyini uJehova akhangelele ukuthi abangane bakhe bakwenze?
Kuqakathekile ukuthi sitshintshe indlela esiphila ngayo ukuze sithokozise uJehova. Bala u-Isaya 48:17, 18 beselixoxa ngombuzo olandelayo:
-
Kungani uJehova esithi labo abafuna ukuba ngabangane bakhe kumele batshintshe indlela abaphila ngayo?
Umngane okuthandayo uyakuxwayisa ukuze ungaweli engozini. UJehova wenza okufananayo kulabo abangabangane bakhe
6. UJehova ubenzelani abangane bakhe?
UJehova uyabancedisa abangane bakhe nxa bephakathi kwenhlupho. Bukelani IVIDIYO beselixoxa ngombuzo olandelayo.
-
UJehova umncedise njani owesifazana lo ukuthi angakhathazeki kakhulu lanxa wehlelwa yizinto ezibuhlungu?
Bala u-Isaya 41:10, 13 beselixoxa ngemibuzo le:
-
UJehova ubathembisani abangane bakhe?
-
Ucabanga ukuthi uJehova ngumngane ongakunceda yini? Kungani usitsho njalo?
Umngane okuthandayo uhlala ezimisele ukukuncedisa. UJehova laye uzimisele ukukuncedisa
7. Ukuze sihlale singabangane bakaJehova kumele sikhulume laye njalo simlalele
Abangane abahlala bexoxa baba lobungane obuqinileyo. Bala iHubo 86:6, 11 beselixoxa ngemibuzo le:
-
Sikhuluma njani loJehova?
-
UJehova yena ukhuluma njani lathi?
Sikhuluma loJehova ngokuthandaza, yena abesekhuluma lathi esebenzisa iBhayibhili
ABANYE BATHI: “Akwenzi ukuthi umuntu abe ngumngane kaNkulunkulu.”
-
Yiphi ivesi ongayisebenzisa ukuze uncede umuntu otshonjalo abone ukuthi singenelisa ukuba ngabangane bakaJehova?
ISIFINQO
UJehova ufuna ube ngumngane wakhe futhi uzimisele ukukuncedisa.
Ufundeni?
-
UJehova ubenzelani abangane bakhe?
-
Kungani uJehova efuna abangane bakhe batshintshe indlela abaphila ngayo?
-
Ubona angani kunzima yini ukuba ngumngane kaJehova? Kungani usitsho njalo?
THOLA OKUNENGI
Bala isihloko lesi uzwe ukuthi ukuba ngumngane kaNkulunkulu kungakunceda njani.
“Yindaba Kumele Ubemazi UJehova?” (INqabayokulinda, February 15, 2003)
Bala isihloko lesi uzwe ukuthi ungenzani ukuze ube ngumngane kaNkulunkulu.
Bala uzwe ukuthi ukuba ngumngane kaJehova kwamnceda njani owesifazana othile.
Bukela ividiyo le uzwe ukuthi abasakhulayo bathini ngokuba ngabangane bakaJehova.
Nanku Okunye
IMIBUZO EJAYELE UKUBUZWA NGABANTU
OFakazi BakaJehova Babafundisa Njani Abantu IBhayibhili?
Uhlelo lokufunda iBhayibhili laboFakazi bakaJehova ngolwamahala njalo ukhululekile ukusebenzisa iBhayibhili olijayeleyo kanye lokunxusa izihlobo labangane ukuthi labo bafunde lindawonye.
